FAMAHAʼÖ 05
Ösi Zura Niʼamoniʼö Andrö Fehede moroi khö Lowalangi
No ibeʼe khöda mbuala sahöli-höli dödö Yehowa yaʼia daʼö Sura Niʼamoniʼö. So 66 mbuku ba Zura Niʼamoniʼö. Te manofu-nofu ndraʼugö, ’Hezo moroi Zura Niʼamoniʼö? Bua gera-era haniha Zura Niʼamoniʼö?’ Enaʼö taʼila wanema linia, datatutunö hewisa wa tola ofeta khöda wehede Lowalangi si so ba Zura Niʼamoniʼö.
1. Na niha zanura Sura Niʼamoniʼö, hana wa tola tawaʼö bua gera-era Lowalangi Zura Niʼamoniʼö andre?
So mato 40 niha ndra matua sanura Sura Niʼamoniʼö te ba zi 1.600 fakhe, iʼotarai 1513 SM irugi te me 98 M. No faböʼö-böʼö lala waʼaurira ba zilalö. Hewaʼae simanö, oi moʼamakhaita fefu zi no tesura ba daʼö. Hana wa simane daʼö? Börö me bua gera-era Lowalangi Zura Niʼamoniʼö. (Baso 1 Tesalonika 2:13.) Fefu nisurara tenga bua gera-erara samösa. Hizaʼi, moroi khö ’Lowalangi fefu nifaʼemara börö me eheha niʼamoniʼö zameʼe ba dödöra’. a (2 Fetero 1:21) Iʼogunaʼö gehehania Lowalangi ba wamarou yaʼira enaʼö lasura hadia zinangea ifaʼema ba niha.—2 Timoteo 3:16.
2. Haʼökhö manö moguna Zura Niʼamoniʼö?
Fefu niha moroi ba ”ngawalö soi, ba ngawalö mado, banua, hegöi li” moguna khöra duria somuso dödö moroi ba Zura Niʼamoniʼö. (Baso Wamaʼeleʼö 14:6.) Iadaʼa, no tehenaigö Zura Niʼamoniʼö ba ngawalö li, töra moroi ba waʼoya mbuku tanö böʼö. Arakhagö fefu niha tola labaso Zura Niʼamoniʼö, gofu hezo toröi ira ba hadia li niʼogunaʼöra.
3. Hadia nifalua Yehowa ba wondrorogö Sura Niʼamoniʼö enaʼö ofeta khöda iadaʼa?
Me mböröta, tesura Zura Niʼamoniʼö ba gölu-gölu zura nifazökhi moroi ba guli gurifö hegöi sinanö papirus. Alio tekiko daʼö. Hizaʼi, niha sangomasiʼö Sura Niʼamoniʼö, lahaogö lasali nösinia. Hewaʼae so ndra samatörö mazui sondröniaʼö ba agama sangalui lala enaʼö tehori Zura Niʼamoniʼö, so manö niha sanehegö faʼaurira enaʼö terorogö Zura Niʼamoniʼö. Ba daʼa taʼila wa omasi Yehowa wangogunaʼö Sura Niʼamoniʼö ba wamaʼema fehedenia khöda. Lö si tola manaisi yaʼia ba wamalua daʼö. Imane Sura Niʼamoniʼö, ”Lö tebulö daromali Lowalangi andrö irugi zi lö aetu.”—Yesaya 40:8.
ODÖDÖGÖ NASA WANGALUI
Datatohugö wanutunö hadia nifalua Lowalangi ba wamarou ira matua si hadauga niha enaʼö lasura Zura Niʼamoniʼö, hadia nifaluania ba wondrorogö Sura Niʼamoniʼö ba hewisa wotatugöinia enaʼö dozi niha labaso nösinia.
4. Itutunö Sura Niʼamoniʼö wa moroi khö Lowalangi nösinia
Futa VIDEO. Aefa daʼö baso 2 Timoteo 3:16, ba beʼe wanema li ba wanofu-nofu daʼa:
-
Na niha zanura Sura Niʼamoniʼö, hana wa mufotöi ia Taromali Lowalangi?
-
Moloʼö yaʼugö, hadia tola ifaʼema mbua wangera-ngerania Lowalangi ba niha sanura Sura Niʼamoniʼö?
Te so gafalo zangandrö khö sekretarisnia ba wanura sura, hizaʼi ösinia moroi khö gafalonia. Simanö göi Zura Niʼamoniʼö, hewaʼae niha gulidanö zanura yaʼia, ösinia lö tebulö wa moroi khö Lowalangi
5. Lö irai tehori Zura Niʼamoniʼö hewaʼae oya wanaisi
Börö me moroi khö Lowalangi Zura Niʼamoniʼö, andrö wa itatugöi enaʼö ofeta khöda iadaʼa. Sagötö sejarah, laforege ira samatörö ba wangohori Sura Niʼamoniʼö. Ato ndra sondröniaʼö ba agama, lö omasi ira na so zombaso Sura Niʼamoniʼö. Hizaʼi, ato göi zolumöʼö Sura Niʼamoniʼö hewaʼae lafetaʼu mazui lafakao ira ofeta mate. Enaʼö öʼila duma-dumania, futa VIDEO, ba beʼe wanema li ba wanofu-nofu daʼa:
-
Me no öʼila hadia manö nitehegö niha ba wondrorogö Sura Niʼamoniʼö, hadia itugu adöni dödöu wombaso yaʼia? Hadia mbörö?
Baso Zinunö 119:97, ba beʼe wanema li ba wanofu daʼa:
-
Hadia zamarou niha ba wamoʼeluaha hegöi ba wamazaewe Sura Niʼamoniʼö hewaʼae teʼala waʼaurira?
6. Buku ba niha fefu
Sagötö sejarah, Sura Niʼamoniʼö zabölö oya mufoʼeluaha ba ngawalö li ba mufazaewe misa. Baso Halöwö Zinenge 10:34, 35, ba beʼe wanema li ba wanofu-nofu daʼa:
-
Hana wa omasi Lowalangi na tefazaewe Daromalinia ba zi sagörö ulidanö ba lafoʼeluaha ba ngawalö li?
-
Hadia zadöni dödöu ba Zura Niʼamoniʼö?
Arakhagö
100%
niha gulidanö
laʼokhögö Zura Niʼamoniʼö ba li niʼilara
Tehenaigö ba zi töra
3.000
ngawalö li
sahori so mazui ha matonga
5.000.000.000
Faʼoya Zura Niʼamoniʼö si no mufazökhi,
oya ia moroi ba mbuku böʼö
SO ZANGUMAʼÖ: ”No tebulö nösi Zura Niʼamoniʼö, tenga simane me tesura ba mböröta.”
-
Hewisa moloʼö yaʼugö?
-
Hadia zangoromaʼö wa Sura Niʼamoniʼö andrö Taromali Lowalangi ba lö si tebulö nösinia?
RAHU-RAHU WAMAHAʼÖ
Sura Niʼamoniʼö andrö Taromali Lowalangi, ba no itatugöi enaʼö fefu niha tola labaso nösinia.
Hadia Wamahaʼö si Tola Öhalö?
-
Hadia nifalua Lowalangi ba wamarou ira matua si hadauga niha ba wanura Sura Niʼamoniʼö?
-
Me no tatutunö wamahaʼö daʼa, hadia zadöni dödöu ba wamoʼeluaha hegöi ba wamazaewe Sura Niʼamoniʼö?
-
Hewisa dödöu me no öʼila nifalua Lowalangi ba wamaʼema Taromalinia khöu?
ALUI NASA DANÖ BÖʼÖ
Hewisa manuskrip Zura Niʼamoniʼö siföföna wa tola tabaso ba li niʼilada iadaʼa? Baso waö-waönia.
Hewisa wa tola ofeta khöda Zura Niʼamoniʼö hewaʼae so tölu ngawalö daha-taha sebua?
Faigi hadia manö nifalua niha samoʼeluaha Sura Niʼamoniʼö hewaʼae so wamaʼala.
Laʼandrö Saohagölö ba Zura Niʼamoniʼö (Tehenaigö ba li Indonesia) (14:26)
No hauga kali musali ba mufoʼeluaha Zura Niʼamoniʼö ba ngawalö li. Hana wa faduhu dödöu wa lö si tebulö nösinia?
a Simane nitutunöda dania ba Wamahaʼö si 07, eheha niʼamoniʼö andrö faʼabölö moroi khö Lowalangi.
Te Göi Adöni Dödöu
SASESE LASOFU NIHA
Hewisa Wamahaʼö Zura Niʼamoniʼö Nifaʼema Ndra Samaduhuʼö Yehowa?
Lö muʼandrö gefe ba program daʼa. Tola öʼogunaʼö gofu hadia manö wamoʼeluaha Zura Niʼamoniʼö somasiʼö. Tola göi ökaoni nawöu mazui ösi nomou ba wefao khöu.
