FAMAHAʼÖ 07
Hewisa Yehowa Andrö?
Hadia zi so ba wangera-ngeramö na örongo latötöi döi Lowalangi Yehowa? Hadia ahöli-höli dödöu me awena örongo döi Lowalangi, hizaʼi tebai öfahatö ndraʼugö khönia börö me fandröndröu sibai ia simane döfi ba galaksi böʼö? Mazui, hadia yaʼia andrö faʼabölö si lö moboto, simane gari mbanua? Hewisa zindruhunia Yehowa andrö? Ba Zura Niʼamoniʼö, itutunö khöda Yehowa hadia manö gamuatania. Ifatunö göi ba Daromalinia wa iʼameʼegö tödö ndraʼugö.
1. Hana wa tebai taʼila Lowalangi?
”Lowalangi andrö Eheha.” (Yohane 4:24) Lö moboto Yehowa andrö, tenga simane niha. Yaʼia andrö Eheha, ba zorugo toröi ia. Daʼö nahia si tebai taʼila höröda.
2. Hadia manö mbua-bua Yehowa?
Hewaʼae lö taʼila Yehowa, hizaʼi sindruhu-ndruhu so ia. Na aboto ba dödöda sanandrösa khönia, tatu taʼomasiʼö ia börö mbua-buania sahöli-höli dödö. Imane Sura Niʼamoniʼö, ”Iʼomasiʼö waʼatulö Yehowa, ba lö iröi ndra enoninia si lö faröi.” (Sinunö 37:28) Baero daʼö, ”safönu faʼomasi Yehowa ba sahakhö tödö”, mendrua manö ba niha nifakao. (Yakobo 5:11) ”Ahatö Yehowa ba niha sarasa tödö; iʼefaʼö niha safatö tödö.” (Sinunö 34:18, nisura ba gahe zura) Hadia öʼila wa tola omuso dödö Yehowa mazui abu dödönia ba nifaluada? Na tafalua zi lö sökhi, afökhö dödö Yehowa ba afatö dödönia. (Sinunö 78:40, 41) Hizaʼi, na tafalua zatulö, omuso dödönia.—Baso Gamaedola 27:11.
3. Hadia nifalua Yehowa ba wangoromaʼö faʼomasinia khöda?
Amuata Yehowa fondrege zebua yaʼia daʼö faʼomasi. Sindruhunia, ”Lowalangi andrö no faʼomasi.” (1 Yohane 4:8) Tenga ha ba Zura Niʼamoniʼö iforomaʼö waʼomasinia Yehowa, hizaʼi ba ngawalö niwöwöinia maʼafefu. (Baso Halöwö Zinenge 14:17.) Duma-dumania, angeragö hewisa me ifazökhi ita. Ibeʼe khöda waʼatua-tua enaʼö tola taʼila ngawalö laʼa-laʼa si sökhi, tola tafondrondrongo musik si sökhi, ba tola taʼa gö sami. Omasi ia na tasöndra waʼomuso dödö ba waʼauri.
ODÖDÖGÖ NASA WANGALUI
Tatutunö dania hadia niʼogunaʼö Yehowa ba wamalua ngawalö zahöli-höli dödö. Tafatunö göi hadia nifalua Yehowa ba wangoromaʼö bua-buania sahöli-höli dödö.
4. Eheha niʼamoniʼö—faʼabölö Lowalangi
Taʼogunaʼö dangada ba wamalua hadia ia. Simane daʼö göi Yehowa, iʼogunaʼö gehehania niʼamoniʼö ba wamalua somasi ia. Ifatunö khöda Sura Niʼamoniʼö wa eheha niʼamoniʼö andrö faʼabölö niʼogunaʼö Lowalangi ba wamalua fefu hadia ia. Hizaʼi, ato niha sangumaʼö wa eheha niʼamoniʼö andrö moboto. Baso Luka 11:13 hegöi Halöwö Zinenge 2:17, ba beʼe wanema li ba wanofu-nofu daʼa:
-
Ba ayati daʼö, ifatunö khöda wa ’ifaduwa gehehania’ Lowalangi na so zangandrö khönia. Na simanö, hadia moboto geheha niʼamoniʼö? Hadia mbörö wa öwaʼö daʼö?
Iʼogunaʼö gehehania Yehowa ba wamalua ngawalö zahöli-höli dödö. Baso Zinunö 104:30 ba 2 Fetero 1:20, 21, ba beʼe wanema li ba wanofu daʼa:
-
Hadia manö nifalua Yehowa me iʼogunaʼö gehehania niʼamoniʼö?
5. Amuata Yehowa sahöli-höli dödö
No ara mangai halöwö Moze ba wamosumange Lowalangi, hizaʼi omasi ia nasa na aboto ba dödönia Zomböi yaʼia. Börö daʼö, imane Moze khö Yehowa, ”Tolo ndraʼo ba wangiʼila lalamö enaʼö aboto ba dödögu ndraʼugö.” (2 Moze 33:13) Andrö wa ifatunö khö Moze gamuatania Yehowa. Baso 2 Moze 34:4-6, ba beʼe wanema li ba wanofu-nofu daʼa:
-
Hadia manö gamuata Yehowa nifatunönia khö Moze?
-
Hadia gamuata Yehowa sabölö omasiʼö?
6. Iʼameʼegö tödö fefu niha Yehowa
Me mböröta, niha Heberaiʼo andrö ono mbanua Lowalangi. No irai tobali ira sawuyu ba Miserai, ba tefakao sibai waʼaurira. Hewisa dödö Yehowa me iʼila wamakao si göna khöra? Futa AUDIO ba osisiʼö wombaso yaʼia, mazui baso 2 Moze 3:1-10. Aefa daʼö, beʼe wanema li ba wanofu-nofu daʼa:
-
Simane nitutunönia ba ayati daʼö, hewisa dödö Yehowa me iʼila tefakao niha?—Faigi ayati 7 ba 8.
-
Moloʼö yaʼugö, hadia sindruhu-ndruhu omasi Yehowa ba wanolo niha, ba hadia sagu khönia wamalua daʼö? Hana wa öwaʼö zimanö?
7. Tola tafahaʼö ita ba gamuata Yehowa moroi ba niwöwöinia
Oroma gamuata Yehowa moroi ba niwöwöinia. Futa VIDEO. Aefa daʼö, baso Roma 1:20, ba beʼe wanema li ba wanofu daʼa:
-
Hadia gamuata Yehowa niʼilamö moroi ba niwöwöinia?
SO ZANGUMAʼÖ: ”Börö me lö taʼila Lowalangi, andrö wa tebai aboto ba dödöda ia.”
-
Hewisa moloʼö yaʼugö?
-
Hana wa öwaʼö zimanö?
RAHU-RAHU WAMAHAʼÖ
Yehowa andrö Boto Eheha irege lö taʼila ia. Hizaʼi, iʼokhögö mbua-bua si sökhi, ba sabölö ebua yaʼia daʼö faʼomasi.
Hadia Wamahaʼö si Tola Öhalö?
-
Hana wa tebai taʼila Yehowa?
-
Hadia geheha niʼamoniʼö andrö?
-
Hadia duma-duma gamuata Yehowa?
ALUI NASA DANÖ BÖʼÖ
Alui nasa danö böʼö sanandrösa ba zi öfa gamuata Yehowa si tohude.
”Hadia Manö Gamuata Lowalangi Andrö?” (Manuriaigö No. 1 2019)
Baso hadia manö dandra sangoromaʼö wa lö hadöi Lowalangi ba nahia tanö böʼö.
Ba Zura Niʼamoniʼö hana wa ifagölösi geheha niʼamoniʼö andrö faoma tanga Lowalangi?
Samösa ndra matua si lö hörö sangumaʼö wa lö iʼameʼegö tödö ia Lowalangi. Hizaʼi, ba gafuriata faböʼö wangera-ngerania. Hadia mbörö?
”Tola Utolo Niha Böʼö Iadaʼa” (Menara Pengawal, 1 Mbaŵa si Fulu 2015)
Te Göi Adöni Dödöu
SASESE LASOFU NIHA
Hewisa Wamahaʼö Zura Niʼamoniʼö Nifaʼema Ndra Samaduhuʼö Yehowa?
Lö muʼandrö gefe ba program daʼa. Tola öʼogunaʼö gofu hadia manö wamoʼeluaha Zura Niʼamoniʼö somasiʼö. Tola göi ökaoni nawöu mazui ösi nomou ba wefao khöu.
