FAMAHAʼÖ 10
Hadia Gunania Na Möiʼö ba Gangowuloa Ndra Samaduhuʼö Yehowa?
Hadia no irai möiʼö ba gangowuloa ndra Samaduhuʼö Yehowa? Na löʼö, te alawö-lawö ndraʼugö börö me awena möiʼö. Tola manö ömane tödöu, ’Hewisa dania na lafalua gangowuloara andrö? Hana wa moguna sibai lafalua daʼö? Hadia gunania khögu?’ Ba wamahaʼö daʼa, tafatunö dania hadia mbörö wa möi fanolou gangowuloa andrö enaʼö itugu ahatö ndraʼugö khö Lowalangi. Tatutunö göi hadia manö mbuania khöu na möiʼö ba gangowuloa.
1. Hadia sibai mbörö wa owulo ndra Samaduhuʼö Yehowa?
No irai itutunö si samösa sanura Sura Niʼamoniʼö hadia sibai mbörö wa owulo nono mbanua Lowalangi. Imane, ”Usuno Yehowa ba gotalua nono mbanuania sato.” (Sinunö 26:12) Simane ono mbanua Lowalangi me mböröta, omasi göi ndra Samaduhuʼö Yehowa na owulo ira. Ba zi sagörö ulidanö, owulo ira ero migu ba wamosumange hegöi ba wanuno Lowalangi, manunö ba lalau mangandrö. Barö zi döfi, lafalua göi mato hauga kali gangowuloa sebua.
2. Hadia nifahaʼöu yaʼugö ba gangowuloa?
Ba gangowuloa, lafahaʼö ndraʼaga ba Daromali Lowalangi, ba ”lahaogö wanutunö ba laʼombakhaʼö geluahania”. (Baso Nehemia 8:8.) Na möiʼö ba gangowuloa, ba daʼö öfahaʼö ndraʼugö sanandrösa khö Yehowa hegöi amuatania sahöli-höli dödö. Ba oya nasa danö böʼö nifahaʼöu yaʼugö sangoromaʼö wa iʼomasiʼö ndraʼugö Yehowa. Daʼö mbörö wa itugu ahatö ndraʼugö khönia. Baero daʼö, öfahaʼö göi ndraʼugö hewisa wa tola owua-wua dödöu ibeʼe Yehowa ba ösöndra waʼomuso dödö.—Yesaya 48:17, 18.
3. Hadia gunania na fariawö ndraʼugö ba niha si falukha khöu ba gangowuloa?
Iʼandrö khöda Yehowa enaʼö ”taʼameʼegö tödö nawöda ba wamarou tödö ba waʼomasi hegöi ba mbua-bua si sökhi, böi taböhöli weʼamöi ba gangowuloa”. (Heberaiʼo 10:24, 25) Omasi Yehowa na lö taböhöli weʼamöi ba gangowuloa irege tatema mbuania ba waʼaurida. Hadia manö daʼö? Ba gangowuloa, falukhaʼö ba daʼö dania niha sangomasiʼö awöra. Omasi ira göi na monönö waʼaboto ba dödöra sanandrösa khö Lowalangi simane yaʼugö. Omasi ira lafatunö hadia manö zi möi famarou dödöu moroi ba Zura Niʼamoniʼö. (Baso Roma 1:11, 12.) Tola göi fahuhuo ndraʼugö ba niha si no irai manaögö abula dödö, simane si toʼölö lataögö si lö sangowalu hegöi si no mangowalu!
ODÖDÖGÖ NASA WANGALUI
Tatutunö dania hewisa zindruhunia gangowuloa ndra Samaduhuʼö Yehowa andrö ba hadia manö mbuania khöda na no taforege weʼamöi ba gangowuloa.
4. Angowuloa ndra Samaduhuʼö Yehowa
Me götö siföföna, lö laböhöli ira niha Keriso weʼamöi ba gangowuloa ba wamosumange Yehowa. (Roma 16:3-5) Baso Kolose 3:16, ba beʼe wanema li ba wanofu daʼa:
-
Hadia nifalua niha Keriso me götö siföföna na owulo ira ba wamosumange Yehowa?
Iadaʼa, lö göi laböhöli ira Samaduhuʼö Yehowa weʼamöi ba nahia gangowuloara. Enaʼö öʼila hewisa zindruhunia gangowuloara, futa VIDEO. Aefa daʼö, faigi gambara gangowuloa si so ba wamahaʼö andre ba beʼe wanema li ba wanofu-nofu daʼa:
-
Hadia manö zi fagölö nifalua ba nahia gorahua Mbanua Lowalangi moroi ba zi no öbaso ba Kolose 3:16?
-
Ba video mazui ba gambara daʼö, hadia so zadöni dödöu?
Baso 2 Korindro 9:7, ba beʼe wanema li ba wanofu daʼa:
-
Hana wa lö laʼandrö gameʼela ba gangowuloa ndra Samaduhuʼö Yehowa?
Fao khö zamahaʼö yaʼugö ba Zura Niʼamoniʼö, mifaigi hadia manö nifatunö ba gangowuloa barö migu daʼa.
-
Moloʼö yaʼugö, hadia manö zabölö omasiʼö mazui sabölö moguna khöu?
Hadia öʼila?
Ba jw.org, tola öʼila ginötö gangowuloa hegöi alamat Balai Mbanua Lowalangi ba zi sagörö ulidanö.
-
Ba gangowuloa, so huhuo sebua, famadumaisi na manuriaigö hegöi video. Labörögö gangowuloa faoma sinunö hegöi fangandrö simanö göi dania na teʼasiwai
-
So ösa faosatö nifalua ba gangowuloa, tola labeʼe mbua gera-erara yaʼira sangondrasi
-
Gofu haniha manö tola möi, ira matua, ira alawe, satua hegöi iraono
-
Ba gangowuloama, lö laʼandrö gefe ira Samaduhuʼö Yehowa mazui ameʼela
5. Moguna muforege weʼamöi ba gangowuloa
Nehegö duma-duma moroi ba nösi nomo Yesu. Ero röfi, latörö tanö iʼotarai Nazareta numalö ba Yeruzalema na möi ira ba gosali. So mato 100 kilometer latörö tanö ba oya hili sagalawa nitöröra. Baso Luka 2:39-42, ba beʼe wanema li ba wanofu-nofu daʼa:
-
Moloʼö yaʼugö, hadia aoha ba nösi nomo Yesu me latörö tanö weʼamöi ba Yeruzalema?
-
Hana wa moguna öforege sibai weʼamöi ba gangowuloa?
-
Moloʼö yaʼugö hadia so gunania khöu nifaluamö andrö? Hana wa öwaʼö zimanö?
Iwaʼö Sura Niʼamoniʼö wa moguna sibai möi ita ba gangowuloa. Baso Heberaiʼo 10:24, 25, ba beʼe wanema li ba wanofu daʼa:
-
Hadia mbörö wa lö taböhöli weʼamöi ba gangowuloa?
SO ZANGUMAʼÖ: ”Obönö yaʼi na ba nomo manö tafahaʼö ita ba Zura Niʼamoniʼö. Lö moguna saʼae owulo ita fao ba niha böʼö.”
-
Hadia so ayati mazui duma-duma bakha ba Zura Niʼamoniʼö sangoromaʼö wa omasi Yehowa na owulo ita ba wamosumange yaʼia?
RAHU-RAHU WAMAHAʼÖ
Na lö öböhöli weʼamöi ba gangowuloa, oya zi tola öfahaʼö yaʼugö sanandrösa khö Yehowa. Itugu aro wahuwusamö khönia ba fao ndraʼugö ba niha sato ba wamosumange yaʼia.
Hadia Wamahaʼö si Tola Öhalö?
-
Hana wa omasi Yehowa na owulo ita ba wamosumange yaʼia?
-
Hadia manö nifahaʼöu yaʼugö ba gangowuloa ndra Samaduhuʼö Yehowa?
-
Moloʼö yaʼugö, hadia manö nasa gunania khöu na möiʼö ba gangowuloa?
ALUI NASA DANÖ BÖʼÖ
Hewisa na alawö-lawö ndraʼugö me awena möiʼö ba gangowuloa? Faigi zi no irai alua khö zi samösa ira matua si no irai morasoi simane daʼö, hizaʼi omuso dödönia weʼamöi ba gangowuloa iadaʼa.
Faigi hewisa waʼomuso dödö zi samösa si bohou ebua me möi ia ba gangowuloa, ba hadia nifaluania enaʼö lö iböhöli weʼamöi ba gangowuloa andrö.
Hadia manö niwaʼö niha sanandrösa ba gangowuloa?
”Hadia Gunania Na Möi Ita ba Nahia Gangowuloa?” (Artikel web)
Faʼauri zi samösa anggota geng safaito, tebulö gamuatania me no möi ia ba gangowuloa ndra Samaduhuʼö Yehowa. Baso waö-waö waʼaurinia.
”Gofu Hezo Möido Uʼohe Pistol” (Menara Pengawal, 1 Mbaŵa si Fitu 2014)
Te Göi Adöni Dödöu
SASESE LASOFU NIHA
Hewisa Wamahaʼö Zura Niʼamoniʼö Nifaʼema Ndra Samaduhuʼö Yehowa?
Lö muʼandrö gefe ba program daʼa. Tola öʼogunaʼö gofu hadia manö wamoʼeluaha Zura Niʼamoniʼö somasiʼö. Tola göi ökaoni nawöu mazui ösi nomou ba wefao khöu.
