FAMAHAʼÖ 13
Agama Sofaya Sangobousi Töi Lowalangi
Lowalangi andrö no faʼomasi, hizaʼi oya agama samalua si lö sökhi hewaʼae lafaduhuʼö wa yaʼira andrö salahi Lowalangi. Hadia mbörö? Börö me agama sofaya fefu daʼö. Fehede hegöi nifaluara möi fangobousi döi Lowalangi. Hadia nifaluara ba wangobousi töi Lowalangi? Hewisa dödö Lowalangi ba nifaluara? Ba hadia dania nifalua Lowalangi khöra?
1. Hadia nifahaʼö agama sofaya ba wangobousi töi Lowalangi?
Fefu agama sofaya no ”lafalalini zindruhu sanandrösa khö Lowalangi faoma faya”. (Roma 1:25) Duma-dumania, oya agama lö lafahaʼö niha sanandrösa ba döi Lowalangi. Sindruhunia no iwaʼö Sura Niʼamoniʼö, wa lö tola löʼö taʼogunaʼö döi Lowalangi. (Roma 10:13, 14) Na alua ngawalö zi lö sökhi, ato ndra sondröniaʼö ba agama sangumaʼö wa no ohitö dödö Lowalangi daʼö. Lö atulö daʼö. Lö irai ifalua zi lö sökhi Lowalangi. (Baso Yakobo 1:13.) Börö walimosa simane daʼö ato niha sangerogö Lowalangi.
2. Hadia nifalua agama sofaya ba wangobousi töi Lowalangi?
Fefu agama sofaya lö laʼoʼö duma-duma nifalua Yehowa ba niha. Iwaʼö Sura Niʼamoniʼö wa ”no falawu [horöra] irugi mbanua si yawa”. (Famaʼeleʼö 18:5) Ba zi hauga ngaotu fakhe, no fao agama sofaya ba politik, latuhini wasuwöta ba yaʼira mbörö wa ato niha si mate. Ato göi ndra sondröniaʼö ba agama somasi kayo, lafaso zoloʼö khöra enaʼö labeʼe gameʼela. Fefu nifaluara andrö daʼö zangoromaʼö wa lö aboto ba dödöra Lowalangi. Andrö wa tenga sinangea na tobali ira salahi Lowalangi.—Baso 1 Yohane 4:8.
3. Hewisa dödö Lowalangi ba agama sofaya?
Te mofönu ndraʼugö me örongo mazui me öʼila ngawalö zi lö sökhi nifalua agama sofaya. Na simanö, hewisa göi dödö Yehowa? Iʼomasiʼö niha gulidanö. Hizaʼi mofönu ia khö ndra sondröniaʼö ba agama sangobousi töinia ba samakao niha si fao khöra. Ifabuʼu wa ihori agama sofaya ba ”lö saʼae oroma [ira]”. (Famaʼeleʼö 18:21) Ba zi lö ara tö, ihori fefu agama sofaya Lowalangi.—Famaʼeleʼö 18:8.
ODÖDÖGÖ NASA WANGALUI
Tatutunö nasa dania hewisa dödö Lowalangi ba agama sofaya hegöi ba ngawalö zi lö sökhi nifaluara. Tafatunö göi hadia mbörö wa lö tobali taha-taha daʼö ba wamahaʼö yaʼugö sanandrösa khö Yehowa.
4. Lö fefu agama itema Lowalangi
Ato niha si faduhu tödö wa agama andrö amaedola lala si faböʼö-böʼö, hizaʼi ha sambua lua-lua yaʼia daʼö Lowalangi. Hadia atulö daʼö? Baso Mataiʼo 7:13, 14, ba beʼe wanema li ba wanofu daʼa:
-
Moloʼö Sura Niʼamoniʼö, hewisa lala sofeta ba waʼauri andrö?
Futa VIDEO, ba beʼe wanema li ba wanofu daʼa:
-
Hadia no iwaʼö Sura Niʼamoniʼö wa oya agama sangomusoiʼö tödö Lowalangi?
5. Fefu agama sofaya lö laʼoʼö Lowalangi safönu faʼomasi
Oya lala nifalua agama sofaya ba wangobousi töi Lowalangi. Sambua duma-duma sabölö ebua yaʼia daʼö fao ira ba wasuwöta. Enaʼö öʼila duma-dumania, futa VIDEO. Aefa daʼö, beʼe wanema li ba wanofu-nofu daʼa:
-
Hadia nifalua gereja sagötö Wasuwöta Gulidanö II?
-
Hewisa dödöu ba nifaluara andrö?
Baso Yohane 13:34, 35 hegöi 17:16. Aefa daʼö, beʼe wanema li ba wanofu-nofu daʼa:
-
Moloʼö yaʼugö, hewisa dödö Yehowa ba agama si fao ba wasuwöta?
-
Agama sofaya zamobörö ngawalö zi lö sökhi. Hadia so dandra tanö böʼö niʼilamö sangoromaʼö wa agama sofaya lö iʼoʼö Lowalangi safönu faʼomasi?
Agama sofaya lö laʼoʼö Lowalangi safönu faʼomasi
6. Omasi Lowalangi ba wangefaʼö niha moroi ba agama sofaya
Baso Wamaʼeleʼö 18:4, a ba beʼe wanema li ba wanofu daʼa:
-
Hewisa dödöu me no öʼila wa omasi sibai Lowalangi ba wangefaʼö niha si no ifaelungu agama sofaya?
7. Böi böhöli wamahaʼö yaʼugö sanandrösa khö Lowalangi sindruhu
Hewaʼae oya ngawalö zi lö sökhi nifalua agama sofaya, hadia mbörö wa lö moguna afatö dödöu khö Lowalangi? Khalaigö atö daʼa: So samösa ndraono solawa amania, mofanö ia moroi ba nomo ba ilau fafoya-foya. Lö fao dödö namania ba nifalua nononia andrö. Moloʼö yaʼugö, hadia atulö na tatahigö namania börö me lö sökhi lala waʼauri nononia andrö?
-
Na simanö, hadia moguna tatahigö Yehowa ba taböhöli wamahaʼö yaʼita sanandrösa khönia ha börö nifalua agama sofaya?
SO ZANGUMAʼÖ: ”Fagölö-gölö manö fefu agama, oi si sökhi nifahaʼöra.”
-
Hadia fao dödöu ba daʼö?
-
Hewaʼae oya agama sangumaʼö wa si sökhi nifahaʼöra, hadia mbörö wa lö fefu agama ahori itema Yehowa?
RAHU-RAHU WAMAHAʼÖ
No teʼobousi döi Lowalangi ba agama sofaya börö wamahaʼöra si fasala hegöi amuatara si lö sökhi. Ihori fefu agama sofaya Lowalangi.
Hadia Wamahaʼö si Tola Öhalö?
-
Hewisa dödöu ba wamahaʼö hegöi nifalua agama sofaya?
-
Hewisa dödö Yehowa ba agama sofaya?
-
Hadia dania nifalua Lowalangi ba agama sofaya?
ALUI NASA DANÖ BÖʼÖ
Hadia zi dombua ngawalö nifalua agama si lö omasi Lowalangi?
”Hadia Fagölö Manö Fefu Agama? Hadia Fefu Oi Saekhu khö Lowalangi?” (Artikel web)
Hana wa omasi Yehowa na owulo ita ba wamosumange yaʼia?
”Hadia Moguna Fao Ita ba Agama si No Laʼorganisasi?” (Artikel web)
Samösa pastor si lö fao tödö ba agamania. Hewaʼae simanö, lö afatö dödönia khö Lowalangi. Lö iböhöli wamahaʼö yaʼia ba zindruhu sanandrösa khö Lowalangi.
”Samösa Pastor Sangeheta Yaʼia ba Gereja. Hadia Mbörö?” (Sedarlah! Baŵa si Dua 2015)
Sagötö ba zi hauga ngaotu fakhe, lafahaʼö walimosa agama sofaya irege so zangumaʼö wa lö sökhi Lowalangi andrö ba lö iʼameʼegö tödö ita. Baso tölu ngawalö duma-dumania ba alui hadia nifahaʼö Zura Niʼamoniʼö ba zi tölu ngawalö andre.
a Enaʼö aboto ba dödöu hadia mbörö wa iwaʼö ba mbuku Wamaʼeleʼö wa agama sofaya andrö amaedola ndra alawe nifotöi Babilona Sebua, faigi Gonönöta 1.
Te Göi Adöni Dödöu
SASESE LASOFU NIHA
Hewisa Wamahaʼö Zura Niʼamoniʼö Nifaʼema Ndra Samaduhuʼö Yehowa?
Lö muʼandrö gefe ba program daʼa. Tola öʼogunaʼö gofu hadia manö wamoʼeluaha Zura Niʼamoniʼö somasiʼö. Tola göi ökaoni nawöu mazui ösi nomou ba wefao khöu.
