Simane si no tatutunö ba wamahaʼö si no tataluʼi, lö fefu agama itema Lowalangi. Hizaʼi tola tafosumange Zomböi yaʼita moloʼö somasi ia. Hadia lala wamosumange sangomusoiʼö tödö Lowalangi? (Yakobo 1:27) Datafatunö hadia nifahaʼö Zura Niʼamoniʼö.

1. Hewisa enaʼö taʼila lala wamosumange sangomusoiʼö tödö Lowalangi?

Tola tafahaʼö ita moroi ba Zura Niʼamoniʼö. Imane Yesu khö Lowalangi, ”Taromalimö zindruhu.” (Yohane 17:17) Oya agama sangosiwawöi sindruhu si so ba Daromali Lowalangi yaʼia daʼö Sura Niʼamoniʼö. Fangera-ngera niha nifahaʼöra mazui si toʼölö mufalua. Lö omasi Yehowa ba niha ’sangalui lala enaʼö lö laʼoʼö goroisa Lowalangi’. (Baso Mareko 7:9.) Hizaʼi, omuso dödönia na taʼoʼö wamahaʼö hegöi mene-mene Zura Niʼamoniʼö.

2. Hewisa zatulönia na tafosumange Yehowa?

Börö me yaʼia Zomböi yaʼita, andrö wa ha Yehowa zinangea tafosumange. (Famaʼeleʼö 4:11) Eluahania lö tola löʼö taʼomasiʼö ia ba tebai taʼogunaʼö nadu mazui tanö böʼö ba wamosumange yaʼia.—Baso Yesaya 42:8.

Famosumange nifaluada enaʼö teʼamoniʼö ba tefaudu ba zomasi Yehowa. (Roma 12:1) Eluahania hasambalö taʼoʼö goroisania ba waʼaurida. Duma-dumania, niha sangomasiʼö Yehowa laʼoʼö goi-goinia sanandrösa ba wangowalu. Baero daʼö, lö omasi ira lafalua zi tola mamakiko botora simane foroko, fonganga afo mazui fangogunaʼö narkoba simanö göi wamadu-madu tuo. a

3. Hana wa fao ita khö ndra talifusöda si sara lala wamati ba wamosumange Yehowa?

Ba ginötö möi ita ba gangowuloa ero migu, no fao ita ba ’wanuno Yehowa ba gangowuloa niha sato’. (Sinunö 111:1, 2) Sambua zi tola tafalua yaʼia daʼö manunö ita ba wanuno Lowalangi. (Baso Zinunö 104:33.) Börö me iʼomasiʼö ita Yehowa andrö wa iwaʼö khöda weʼamöi ba gangowuloa. Aboto ba dödönia wa möi fanoloda gangowuloa andrö ba wanöndra faʼauri si lö aetu sagötö faʼara. Ba gangowuloa, faoma tafarou dödö nawöda si sara lala wamati.

 ODÖDÖGÖ NASA WANGALUI

4. Tebai taʼogunaʼö nadu ba wamosumange Lowalangi

5. Na Yehowa nifosumangeda tola teʼefaʼö ita moroi ba wamahaʼö si fasala

 6. Tafosumange Yehowa ba gangowuloa

Ba ginötö manunö ita ba tabeʼe mbua gera-erada ba gangowuloa, daʼö zi tola tafalua ba wamosumange Yehowa hegöi ba wamarou tödö ndra talifusöda si sara lala wamati. Baso Zinunö 22:22, ba beʼe wanema li ba wanofu-nofu daʼa:

• Hadia omuso dödöu me örongo mbua gera-era nifaʼema ba gangowuloa?

• Hadia no öhenaigö öfaʼanö ndraʼugö enaʼö tola öbeʼe mbua gera-eramö?

7. Omuso dödö Yehowa na tafatunö ba niha böʼö hadia zi no tafahaʼö yaʼita

Fefu ita, tebeʼe khöda ginötö ba wamatunö ba niha böʼö sanandrösa ba zindruhu moroi ba Zura Niʼamoniʼö. Baso Zinunö 9:1 hegöi 34:1, ba beʼe wanema li ba wanofu daʼa:

• Hadia zindruhu moroi ba Zura Niʼamoniʼö sedöna öfatunö ba niha böʼö?

 RAHU-RAHU WAMAHAʼÖ

Tola taʼomusoiʼö dödö Zomböi yaʼita na ha yaʼia nifosumangeda, tasuno ia ba gangowuloa ba tafatunö ba niha böʼö hadia zi no tafahaʼö yaʼita.

Hadia Wamahaʼö si Tola Öhalö?

• Hewisa enaʼö taʼila lala wamosumange sangomusoiʼö tödö Lowalangi?

• Hana wa ha Yehowa zinangea tafosumange?

• Na tafosumange Lowalangi, hana wa moguna fao ita ba niha sangomusoiʼö tödönia?