FAMAHAʼÖ 15
Haniha Yesu Andrö?
Arakhagö fefu niha no larongo sanandrösa khö Yesu. Ato ba gotaluara zangila töinia, hizaʼi lö laʼila haniha ia andrö sindruhunia. No faböʼö-böʼö niwaʼö niha sanandrösa khönia. Na simanö, hadia nifahaʼö Zura Niʼamoniʼö sanandrösa khö Yesu?
1. Haniha Yesu andrö?
Yesu andrö malaʼika sabölö, ba zorugo toröi ia. Yaʼia zi oföna sibai niwöwöi Lowalangi Yehowa fatua lö iwöwöi fefu hadia ia. Börö daʼö, mufotöi ia ’siaʼa moroi ba nifazökhi’. (Kolose 1:15) Börö me Yehowa samösa zamazökhi Yesu, andrö wa mufotöi ia ba Zura Niʼamoniʼö ’Ono si ha sambua’ khö Lowalangi. (Yohane 3:16) Falulu fohalöwö Yesu khö Namania Yehowa ba wamazökhi fefu hadia ia. (Baso Gamaedola 8:30.) Iʼotarai mböröta ofeta iadaʼa, lö tebulö aro wahuwusa Yesu khö Yehowa. Lö faröi ia ba wamaʼema oroisa mazui fanuturu lala moroi khö Lowalangi. Daʼö mbörö wa ifotöi ia Sura Niʼamoniʼö, ”Taromali”.—Yohane 1:14.
2. Hadia mbörö wa möi Yesu ba gulidanö?
Mato 2.000 fakhe silalö, ifalua dandra sahöli-höli dödö Yehowa. Iʼogunaʼö gehehania niʼamoniʼö ba wamawuʼa faʼauri Yesu. Ba wamobörö, Yesu andrö malaʼika sabölö ba zorugo. Hizaʼi iʼadonogö ia Maria ba tobali ia niha. (Baso Luka 1:34, 35.) Möi Yesu ba gulidanö tobali ia Mesia mazui Keriso si no mufabuʼu ba sangefaʼö niha gulidanö. a Fefu wamaʼeleʼö sanandrösa khö Mesia, alua ia ba waʼauri Yesu irege laʼila niha wa yaʼia andrö sindruhu-ndruhu ”Keriso . . . Ono Lowalangi sauri”.—Mataiʼo 16:16.
3. Hezo so Yesu iadaʼa?
Me no mate Yesu, ifuli isusugi ia Lowalangi tobali boto eheha, aefa daʼö mangawuli ia ba zorugo. Ba daʼö ”ibeʼe khönia Lowalangi dadaoma sabölö alawa moroi ba zi oföna”. (Filifi 2:9) Iadaʼa no teʼalawaʼö Yesu, tobali ia samatörö numero dua aefa Yehowa.
ODÖDÖGÖ NASA WANGALUI
Tatutunö dania haniha Yesu andrö sindruhunia ba hana wa moguna tafahaʼö ita sanandrösa khönia.
4. Yesu andrö tenga Lowalangi Fondrege Zabölö
Yesu andrö malaʼika sabölö ba zorugo. Hizaʼi, ifatunö khöda Sura Niʼamoniʼö wa iʼoʼö niwaʼö Lowalangi hegöi Amania sotöi Yehowa. Futa VIDEO enaʼö öʼila hadia manö nifahaʼö Zura Niʼamoniʼö khöda sangoromaʼö wa faböʼö Yesu moroi khö Lowalangi Fondrege Zabölö.
Ayati daʼa dania zanolo yaʼita enaʼö aboto ba dödöda wa faböʼö Yesu andrö moroi khö Yehowa. Baso fefu ayatinia ba beʼe wanema li ba wanofu-nofu daʼa:
Baso Luka 1:30-32.
-
Moroi ba wehede malaʼika andrö, hadia zangoromaʼö wa faböʼö Yesu moroi khö Yehowa, Lowalangi ’Fondrege Zalawa’?
Baso Mataiʼo 3:16, 17.
-
Hadia wehede si otarai ba zorugo me tebayagö idanö Yesu?
-
Moloʼö yaʼugö, fehede haniha daʼö?
Baso Yohane 14:28.
-
Haniha zabölö atua ba sangokhögö kuaso sabölö ebua ba wamatörö? Ama mazui ono?
-
Hadia geluahania me faʼama Yesu khö Yehowa? Hadia rahu-rahu si tola tahalö moroi ba wehedenia andrö?
Baso Yohane 12:49.
-
Moloʼö Yesu, hadia fagölö ia khö Namania? Hewisa moloʼö yaʼugö?
5. Tandra sangoromaʼö wa Yesu andrö Mesia
Oya wamaʼeleʼö si so ba Zura Niʼamoniʼö sanandrösa khö Mesia, nifili Lowalangi ba wangorifi niha gulidanö. Famaʼeleʼö daʼö zi tobali fanolo ba niha irege aboto ba dödöra Mesia si no mufabuʼu andrö. Futa VIDEO enaʼö öʼila hadia manö wamaʼeleʼö salua khö Yesu me möi ia ba gulidanö.
Baso wamaʼeleʼö andre ba beʼe wanema li ba wanofu-nofu daʼa:
Baso Mikha 5:2 enaʼö öʼila hezo tumbu Mesia. b
-
Hadia tefaudu nahia waʼatumbu Yesu moloʼö si no mufaʼeleʼö andre?—Mataiʼo 2:1.
Baso Zinunö 34:20 hegöi Zakharia 12:10 enaʼö öʼila hadia manö wamaʼeleʼö soʼamakhaita ba waʼamate Mesia.
-
Hadia sindruhu-ndruhu alua fefu wamaʼeleʼö andrö?—Yohane 19:33-37.
-
Moloʼö yaʼugö, hadia no itatugöi fefu zalua andrö Yesu enaʼö itörö simane si no mufaʼeleʼö?
-
Na simanö, hadia gangetula sinangea öhalö sanandrösa khö Yesu?
6. So gunania khöda na tafahaʼö ita sanandrösa khö Yesu
Ifatunö khöda Sura Niʼamoniʼö wa moguna sibai tafahaʼö ita sanandrösa khö Yesu hegöi halöwö nibeʼe Lowalangi khönia. Baso Yohane 14:6 ba 17:3, ba beʼe wanema li ba wanofu daʼa:
-
Hana wa moguna sibai tafahaʼö ita sanandrösa khö Yesu?
Yesu zamokai lala khöda enaʼö tobali ita si fahuwu khö Lowalangi. Ifahaʼö zindruhu sanandrösa khö Yehowa, ba börö höli nibeʼe Yesu andrö wa tola tasöndra waʼauri si lö aetu
SO ZANGUMAʼÖ: ”Lö faduhu dödö ndra Samaduhuʼö Yehowa khö Yesu.”
-
Hewisa moloʼö yaʼugö, hadia öbeʼe fanema li na so zangumaʼö simane daʼö?
RAHU-RAHU WAMAHAʼÖ
Yesu andrö malaʼika sabölö. Ono Lowalangi ia ba Mesia.
Hadia Wamahaʼö si Tola Öhalö?
-
Hana wa mufotöi Yesu ’siaʼa moroi ba nifazökhi Lowalangi’?
-
Fatua lö möi Yesu ba gulidanö, hadia nifaluania?
-
Hadia dandra sangoromaʼö wa Yesu andrö Mesia?
ALUI NASA DANÖ BÖʼÖ
Baso gonönöta tanö böʼö sangoromaʼö wa Yesu andrö Mesia.
”Hadia Sindruhu Wa Yesu Andrö Mesia si No Mufaʼeleʼö?” (Artikel web)
Hadia no itutunö khöda Sura Niʼamoniʼö wa so nono Lowalangi simane faʼatumbu nono niha ba gulidanö?
”Hadia Geluahania Wa Yesu Andrö Ono Lowalangi?” (Artikel web)
Baso hadia manö zangoromaʼö wa Lowalangi si Sambua Tölu tenga famahaʼö moroi ba Zura Niʼamoniʼö.
”Hadia Lowalangi Yesu Andrö?” (Menara Pengawal, 1 Mbaŵa si Öfa 2009)
Baso waö-waö zi samösa ira alawe sombulöʼö faʼaurinia me no ifareso hadia niwaʼö Zura Niʼamoniʼö sanandrösa khö Yesu.
a Ba Wamahaʼö 26 ba 27 tatutunö dania hadia mbörö wa muhöli niha gulidanö ba hadia nifalua Yesu ba wangöhöli yaʼita.
b Faigi Gonönöta 2 enaʼö öʼila wamaʼeleʼö sangombakha hamega tohare Mesia ba gulidanö.
Te Göi Adöni Dödöu
SASESE LASOFU NIHA
Hewisa Wamahaʼö Zura Niʼamoniʼö Nifaʼema Ndra Samaduhuʼö Yehowa?
Lö muʼandrö gefe ba program daʼa. Tola öʼogunaʼö gofu hadia manö wamoʼeluaha Zura Niʼamoniʼö somasiʼö. Tola göi ökaoni nawöu mazui ösi nomou ba wefao khöu.
