FAMAHAʼÖ 19
Hadia Niha Keriso Sindruhu Ndra Samaduhuʼö Yehowa?
Yaʼaga Samaduhuʼö Yehowa, faduhu dödöma wa yaʼaga andre niha Keriso sindruhu. Hadia mbörö? Datatutunö zi tölu ngawalö andre: Hadia dane-dane nifaduhusima tödö? Hana wa mafotöi ndraʼaga Samaduhuʼö Yehowa? Ba hadia nifaluama ba wangoromaʼö faʼomasi khö ndra talifusöma?
1. Hadia dane-dane nifaduhusi tödö ndra Samaduhuʼö Yehowa?
Imane Yesu, ”Taromalimö zindruhu.” (Yohane 17:17) Simane Yesu, fefu nifaduhusi tödö ndra Samaduhuʼö Yehowa teʼodane-dane daʼö ba Daromali Lowalangi. Faigi sejarah ndra Samaduhuʼö Yehowa, mufotöi ira me föna Iraono Zekola Zura Niʼamoniʼö. Te me döfi 1870-an, Iraono Zekola Zura Niʼamoniʼö, lahaogö wamahaʼö yaʼira ba Zura Niʼamoniʼö ba wangalui hadia zindruhunia nifahaʼö Zura Niʼamoniʼö. Fefu zindruhu nisöndrara moroi ba Zura Niʼamoniʼö, daʼö zi tobali dane-dane nifaduhusira tödö hewaʼae na faböʼö nifaduhusira tödö andrö moroi ba nifahaʼö gereja. Lafatunö göi ba niha böʼö zindruhu andrö moroi ba Zura Niʼamoniʼö. a
2. Hana wa mafotöi ndraʼaga Samaduhuʼö Yehowa?
Yehowa zamotöi ono mbanuania samaduhuʼö khönia, börö me yaʼira niʼogunaʼönia ba wamatunö sindruhu sanandrösa khönia. (Heberaiʼo 11:4–12:1) Duma-dumania ba götö föna, imane Yehowa ba nono mbanuania, ”Yaʼami zamaduhuʼö khögu.” (Baso Yesaya 43:10.) Yesu manö göi tefotöi ia ”Samaduhuʼö si Lö Faröi”. (Famaʼeleʼö 1:5) Börö daʼö, iʼotarai me döfi 1931 maʼogunaʼö döi Samaduhuʼö Yehowa. Omuso sibai dödöma me tebeʼe khöma döi andrö.
3. Hewisa ndra Samaduhuʼö Yehowa ba wamalua faʼomasi simane nifalua Yesu?
Iʼomasiʼö sibai Yesu ndra nifahaʼönia hulö nösi nomonia samösa. (Baso Mareko 3:35.) Simane daʼö göi ndra Samaduhuʼö Yehowa ba zi sagörö ulidanö. So khöra wahasara dödö ba faoma laʼomasiʼö nawöra amaedola zi sambua omo. Daʼö mbörö wa faoma makaoni khö nawöma talifusö. (Filemo 1, 2) Na mafalua waʼomasi, no maʼoʼö goroisa sangumaʼö, ”Miʼomasiʼö dalifusömi ba wamati.” (1 Fetero 2:17) Oya lala nifaluama ba wangoromaʼö wa maʼomasiʼö nawöma. Duma-dumania matolo ndra talifusöma ba zi sagörö ulidanö ba ginötö göna ira abula dödö
ODÖDÖGÖ NASA WANGALUI
Tatutunö nasa dania hadia manö sejarah ndra Samaduhuʼö Yehowa, ba hadia dandra sangoromaʼö wa yaʼaga andre niha Keriso sindruhu.
Dane-dane waʼafaduhu dödö niha Keriso sindruhu yaʼia daʼö Sura Niʼamoniʼö, ba latutunö ba niha böʼö zindruhu moroi ba Zura Niʼamoniʼö
4. Teʼodane-dane ba Zura Niʼamoniʼö nifaduhusima tödö
No ifaʼeleʼö Yehowa wa ba götöda andre fahöna waʼaboto ba dödö sindruhu moroi ba Zura Niʼamoniʼö. Baso Danieli 12:4, ba beʼe wanema li ba wanofu daʼa:
-
Ba ginötö lahaogö wamareso Sura Niʼamoniʼö ira niha Keriso sindruhu, hadia ’waʼafahöna’ nisöndrara?
Tafaigi dania hewisa zi sambua ngawawa lahaogö wamahaʼö yaʼira ba Daromali Lowalangi, fao ba daʼö Charles Russell. Futa VIDEO, ba beʼe wanema li ba wanofu daʼa:
-
Ba video andrö mege, hadia nifalua Charles Russell hegöi ira awönia ba wamahaʼö yaʼira ba Zura Niʼamoniʼö?
Hadia öʼila?
So ösa wamahaʼöma sinangea mabulöʼö. Hadia mbörö? Börö me izara-zara Lowalangi ba wameʼe faʼaboto ba dödö sanandrösa ba Daromalinia. Ifagölösi daʼö Sura Niʼamoniʼö simane haga luo, itugu mohaga ofeta ba zi laluo irege oroma fefu hadia ia. (Baso Gamaedola 4:18.) Sindruhu wa lö irai tebulö nösi Zura Niʼamoniʼö, hizaʼi me itugu aboto ba dödöma nösi Zura Niʼamoniʼö so ösa wamahaʼöma sinangea mubohouni.
5. Fefu nifaluama tefaudu moloʼö töima
Hana wa mafotöi ndraʼaga Samaduhuʼö Yehowa? Futa VIDEO, ba beʼe wanema li ba wanofu daʼa:
-
Hana wa tefaudu sibai na mafotöi ndraʼaga Samaduhuʼö Yehowa?
Hana wa ifili ngawawa niha Yehowa tobali samaduhuʼö khönia? Börö me oya walimosa niwaʼö niha sanandrösa khö Lowalangi, andrö wa omasi ia na latutunö zindruhu ira samaduhuʼö khönia. Faigi atö zi dombua ngawalö walimosa sasese lawaʼö niha sanandrösa khö Lowalangi.
So ösa agama samahaʼö niha wa omasi Lowalangi na laʼogunaʼö nadu ba wamosumange yaʼia. Hizaʼi, nehegö hadia nifahaʼö Zura Niʼamoniʼö. Baso 3 Moze 26:1, ba beʼe wanema li ba wanofu-nofu daʼa:
-
Hewisa moloʼö Sura Niʼamoniʼö? Hewisa dödö Yehowa ba wangogunaʼö adu?
So ösa ndra sondröniaʼö ba agama samahaʼö wa Yesu andrö Lowalangi. Hizaʼi, faigi atö hadia nifahaʼö Zura Niʼamoniʼö. Baso Yohane 20:17, ba beʼe wanema li ba wanofu-nofu daʼa:
-
Hewisa moloʼö Sura Niʼamoniʼö? Hadia fagölö ira Yesu andrö Lowalangi?
-
Hewisa dödöu me no öʼila wa iʼandrö Yehowa khö ndra Samaduhuʼö khönia enaʼö lafatunö zindruhu sanandrösa khönia hegöi Ononia?
6. Faoma maʼomasiʼö nawöma
Iʼamaedolagö niha Keriso andrö Sura Niʼamoniʼö hulö ndroto-ndroto mboto si faböʼö-böʼö. Baso 1 Korindro 12:25, 26, ba beʼe wanema li ba wanofu-nofu daʼa:
-
Hadia nifalua niha Keriso sindruhu na göna abula dödö dalifusöra si sara lala wamati?
-
Hadia manö zi no öʼila sangoromaʼö wa faoma laʼomasiʼö nawöra ira Samaduhuʼö Yehowa?
Ba ginötö göna abula dödö ndra Samaduhuʼö Yehowa ba zi sambua soi, labeʼe wanolo ira talifusöra moroi ba soi böʼö. Enaʼö öʼila duma-dumania, futa VIDEO. Aefa daʼö, beʼe wanema li ba wanofu daʼa:
-
Hewisa ndra Samaduhuʼö Yehowa ba wangoromaʼöra faʼomasi me alua nangi sabölö-bölö?
Börö me faoma laʼomasiʼö nawöra, niha Keriso sindruhu latolo dalifusöra si sara lala wamati si göna abula dödö
SO ZANGUMAʼÖ: ”Ira Samaduhuʼö Yehowa andrö agama si bohou.”
-
Hamega ifotöi nono mbanuania Yehowa samaduhuʼö khönia?
RAHU-RAHU WAMAHAʼÖ
Ira Samaduhuʼö Yehowa andrö niha Keriso sindruhu. Ba zi sagörö ulidanö, yaʼaga andre amaedola zi sambua ösi nomo sebua safönu fahasara dödö. Sura Niʼamoniʼö zi tobali dane-dane nifaduhusima tödö. Maturiaigö zindruhu sanandrösa khö Yehowa.
Hadia Wamahaʼö si Tola Öhalö?
-
Hana wa mafotöi ndraʼaga Samaduhuʼö Yehowa?
-
Hewisa ndraʼaga wangoromaʼö faʼomasi khö ndra talifusöma si sara lala wamati?
-
Moloʼö yaʼugö, hadia niha Keriso sindruhu ndra Samaduhuʼö Yehowa?
ALUI NASA DANÖ BÖʼÖ
Alui nasa sejarah tanö böʼö sanandrösa khöma.
Ira Samaduhuʼö Yehowa—Famati si Fao Bua-Bua, Faosatö 1: Aheta moroi ba Zogömi-gömi (1:00:53)
Faigi sambua duma-duma hewisa wangoromaʼö ndra Samaduhuʼö Yehowa famahaʼö si fasala.
Baso wanema li ba wanofu-nofu sanandrösa khö ndra Samaduhuʼö Yehowa. Te no irai göi manofu-nofu ndraʼugö simane daʼö.
”Sasese Lasofu Niha Sanandrösa khö Ndra Samaduhuʼö Yehowa” (Ngaʼörö web)
Asese ibözi niha moroi ba soi böʼö Stephen börö me fatuwu sibai ia khöra. Hadia mbörö wa tebulö gamuatania?
”Itugu Fawuka Waʼaurigu” (Menara Pengawal, 1 Mbaŵa si Fitu 2015)
a Iʼotarai me döfi 1879, no lafazökhi majalah Manuriaigö iraono mbanua Yehowa sanutunö hadia nifahaʼö Zura Niʼamoniʼö.
Te Göi Adöni Dödöu
SASESE LASOFU NIHA
Hewisa Wamahaʼö Zura Niʼamoniʼö Nifaʼema Ndra Samaduhuʼö Yehowa?
Lö muʼandrö gefe ba program daʼa. Tola öʼogunaʼö gofu hadia manö wamoʼeluaha Zura Niʼamoniʼö somasiʼö. Tola göi ökaoni nawöu mazui ösi nomou ba wefao khöu.
