Ahori toföfö fefu nifalua Yehowa. (1 Korindro 14:33, 40) Börö daʼö, oi toföfö fefu nifalua nono mbanuania. Na simanö, hewisa woʼorganisasi banua niha Keriso? Hewisa enaʼö fao ita ba wondrorogö banua niha Keriso enaʼö lö fawuka?

1. Haniha högö mbanua niha Keriso?

”Keriso . . . högö mbanua niha Keriso.” (Efeso 5:23) Moroi ba zorugo, ifaigi-faigi Yesu halöwö nono mbanua Yehowa ba zi sagörö ulidanö. Ifataro ndra ’sawuyu si lö faröi ba satua-tua’ yaʼia daʼö mato hadauga ndra satua sokubaloi saro ba wamati nifotöi iadaʼa Boto Solohe. (Baso Mataiʼo 24:45-47.) Simane ira sinenge hegöi ira satua sokubaloi si so ba Yeruzalema me götö siföföna, ira Boto Solohe labeʼe wanuturu lala iadaʼa ba mbanua niha Keriso ba zi sagörö ulidanö. (Halöwö Zinenge 15:2) Hizaʼi, tenga yaʼira zamatörö organisasima. Lö laböhöli wangalui fanuturu lala moroi khö Yehowa ba Zura Niʼamoniʼö, ba soroi ba dödöra laʼoʼö wanuturu lala nibeʼe Yesu.

2. Hadia halöwö ndra satua sokubaloi?

Ira satua sokubaloi yaʼia daʼö ira matua niha Keriso si no aro ba wamati. Lafahaʼö zindruhu si teʼodane-dane ba Zura Niʼamoniʼö. Lakubaloi nono mbanua Yehowa, latolo ba labeʼe wamarou dödö. Lö lagazi ira ba wamalua halöwöra andrö. Lafalua daʼö ”si fao faʼaoha gölö föna Lowalangi ba faʼowölö-ölö, tenga ba wangalui hare si lö atulö”. (1 Fetero 5:1, 2) So göi ndra enoni sanolo ira satua sokubaloi, ba samuza inötö dania, tola göi tobali ira satua sokubaloi.

So ösa ndra satua sokubaloi nifataro ndra Boto Solohe tobali satua samasui. Möi ndra satua samasui andre ba wangondrasi banua niha Keriso ba wameʼe fanuturu lala hegöi famarou dödö khö ndra talifusöda. Yaʼira zamataro satua sokubaloi hegöi ira enoni. Ira matua si no lafataro andre, moguna laʼoʼö goi-goi si so ba Zura Niʼamoniʼö.—1 Timoteo 3:1-10, 12; Tito 1:5-9.

3. Hadia halöwö nifalua ndra Samaduhuʼö Yehowa zamösana?

Dozi niha si so ba mbanua niha Keriso ’lasuno döi Yehowa’ yaʼia na möi ira ba gangowuloa, labeʼe mbua gera-erara, lafalua wamadumaisi ba manunö ira. So göi ba gotaluara zamaʼema huhuo. Lala tanö böʼö nifaluara ba wanuno Yehowa yaʼia daʼö laforege wanuriaigö turia somuso dödö.—Baso Zinunö 148:12, 13.

 ODÖDÖGÖ NASA WANGALUI

4. Yesu andrö sondröniaʼö si sökhi tödö

Si fao faʼasökhi dödö ikaoni ita Yesu enaʼö tobali ita ono mbanua niha Keriso nifatörönia. Baso Mataiʼo 11:28-30, ba beʼe wanema li ba wanofu daʼa:

• Hadia mbua-bua niʼokhögö Yesu me tobali ia sondröniaʼö ba hadia nirasoi niha nifatörönia?

5. Mamahaʼö ndra satua sokubaloi ba labeʼe ira duma-duma

1. Laʼodödögö sibai ira satua sokubaloi hegöi ösi nomora enaʼö lö tebulö ahatö ira khö Lowalangi

2. Ira satua sokubaloi laʼameʼegö tödö zoguna khö ndra talifusöra ba mbanua niha Keriso

3.   Owölö-ölö ndra satua sokubaloi ba wanuriaigö turia somuso dödö

4. Ira satua sokubaloi lafahaʼö niha ba Zura Niʼamoniʼö, fao ira ba wangehaogö nahia gangowuloa ba lafalua göi halöwö tanö böʼö

6. Moguna falulu fohalöwö ita khö ndra satua sokubaloi

Ifatunö khöda Sura Niʼamoniʼö hadia sibai mbörö wa falulu fohalöwö ita khö ndra satua sokubaloi. Baso Heberaiʼo 13:17, ba beʼe wanema li ba wanofu-nofu daʼa:

• Hadia mbörö wa ibeʼe khöda mene-mene Sura Niʼamoniʼö enaʼö taʼoʼö li zondröniaʼö yaʼita ba mbanua niha Keriso? Moloʼö yaʼugö, hadia moguna taʼoʼö mene-mene Zura Niʼamoniʼö andrö?

Baso Luka 16:10, ba beʼe wanema li ba wanofu daʼa:

• Hadia mbörö wa falulu fohalöwö ita khö ndra satua sokubaloi hewaʼae ba ngawalö halöwö sigide-ide?

 RAHU-RAHU WAMAHAʼÖ

Yesu zi tobali högö ba mbanua niha Keriso. Laʼoʼö ira satua sokubaloi wanuturu lala nibeʼe Yesu. Omasi ita falulu fohalöwö khö ndra satua sokubaloi börö waʼasökhi dödö niforomaʼöra khöda ba labeʼe ira duma-duma si sökhi ba wamahaʼö yaʼita.

Hadia Wamahaʼö si Tola Öhalö?

• Haniha högö ba mbanua niha Keriso?

• Hewisa ndra satua sokubaloi ba wameʼe fanolo ba mbanua niha Keriso?

• Hadia halöwö nono mbanua Yehowa zamösana?