FAMAHAʼÖ 24
Haniha Sindruhunia Ndra Malaʼika Andrö ba Hadia Halöwöra?
Omasi Yehowa na tafahaʼö ita ba sanandrösa ba nösi nomonia si so ba zorugo. Tefarahu ba daʼö ndra malaʼika. Tefotöi ira ’ono Lowalangi’. (Yobi 38:7) Hadia nifahaʼö Zura Niʼamoniʼö sanandrösa khö ndra malaʼika? Hadia nifalua ndra malaʼika ba niha gulidanö? Hadia fefu ndra malaʼika andrö ösi nomo Lowalangi?
1. Haniha ndra malaʼika andrö?
Ifazökhi ndra malaʼikania Yehowa fatua lö iwöwöi gulidanö. Simane Yehowa, ira malaʼika andrö toröi ira ba zorugo ba lö oroma ba höröda ira. (Heberaiʼo 1:14) So mato ngaotu zuta ndra malaʼika ba zorugo, tola manö naʼi miliaran waʼatora. No faböʼö-böʼö gamuatara zamösana. (Famaʼeleʼö 5:11) Lafalua ’Daromali Yehowa ba laʼoʼö wehedenia’. (Sinunö 103:20) Me mböröta, itaria ifatenge malaʼikania Yehowa ba wamaʼema oroisa hegöi ba wangefaʼö ono mbanuania. Iadaʼa labeʼe wanuturu lala ira malaʼika khö ndra niha Keriso enaʼö tola falukha ira ba niha somasi mangokhögö faʼaboto ba dödö sanandrösa khö Lowalangi.
2. Haniha Zatana hegöi malaʼika si lö sökhi?
So ndra malaʼika si faröi khö Yehowa. Malaʼika si oföna samadaö khö Yehowa yaʼia daʼö malaʼika nifotöi ”Afökha ba Satana, samaelungu niha ba gulidanö maʼasagörö”. (Famaʼeleʼö 12:9) Omasi Zatana na yaʼia zamatörö ulidanö. Börö daʼö, idönisi dödö niha siföföna enaʼö lalawa Lowalangi. Aefa daʼö idönisi göi dödö ndra malaʼika tanö böʼö irege fao ira göi ba wolawa Lowalangi. Ira malaʼika daʼö tefotöi ira malaʼika si lö sökhi. No ifofanö ira Yehowa moroi ba zorugo ba itiboʼö ira ba gulidanö, ba lö ara tö tehori ira.—Baso Wamaʼeleʼö 12:9, 12.
3. Hewisa Zatana hegöi ira malaʼika si lö sökhi ba wamaelungura yaʼita?
Satana hegöi ira malaʼika si lö sökhi lafaelungu niha sato ba wakelemusa. Fakelemusa andrö yaʼia daʼö famorege enaʼö fahuhuo ba malaʼika si lö sökhi. Duma-dumania, so niha sanofu ba zanahö döfi, samaʼeleʼö, samaigi suʼa danga ba sameʼe dalu-dalu. So göi zamalua fakelemusa enaʼö lö mofökhö ia. Baero daʼö, so göi niha nilimo irege tola fahuhuo ira ba niha si no mate. Hizaʼi, ifangelama ita Yehowa, ”Böi miʼaeʼe ba zogaoni bekhu niha si no mate ba böi miʼandrö wanuturu lala khö zamaʼeleʼö.” (3 Moze 19:31) Ibeʼe khöda wamangelama andre Yehowa enaʼö telumöʼö ita moroi khö Zatana hegöi ira malaʼika si lö sökhi. Yaʼira andrö udu Lowalangi ba edöna lafaʼala ita.
ODÖDÖGÖ NASA WANGALUI
Tafatunö dania hadia manö ngawalö zi sökhi nifalua ndra malaʼika si lö faröi. Tatutunö göi hadia lua-luania wakelemusa ba hewisa lala wolumöʼöda yaʼita moroi ba waʼabölö Zatana hegöi malaʼika si lö sökhi.
4. Latolo niha ira malaʼika enaʼö aboto ba dödöra sanandrösa khö Yehowa
Tenga ira malaʼika zamalukhaisi niha ba wanuriaigö turia somuso dödö, hizaʼi labeʼe wanuturu lala ba nono mbanua Lowalangi enaʼö tola falukha ira niha somasi manöndra faʼaboto ba dödö sanandrösa khö Lowalangi. Baso Wamaʼeleʼö 14:6, 7, ba beʼe wanema li ba wanofu-nofu daʼa:
-
Hana wa moguna khöda wanolo moroi khö ndra malaʼika ba ginötö möi ita manuriaigö turia somuso dödö?
-
Me no öʼila wa labeʼe khöu wanuturu lala ira malaʼika irege tola falukha ndraʼugö ba niha somasi mamondrongo turia somuso dödö moroi ba Zura Niʼamoniʼö, hadia lö tefarou dödöu? Hana wa öwaʼö zimanö?
5. Timbagö wakelemusa
Si faʼudu khö Yehowa Zatana hegöi ira malaʼika si lö sökhi. Yaʼira andrö göi ududa. Baso Luka 9:38-42, ba beʼe wanema li ba wanofu daʼa:
-
Hadia nifalua malaʼika si lö sökhi ba niha?
Lö omasi ita na lafaelungu ita ira malaʼika si lö sökhi. Baso 5 Moze 18:10-12, ba beʼe wanema li ba wanofu-nofu daʼa:
-
Hadia manö lala niʼogunaʼö ndra malaʼika si lö sökhi ba wondrönisi tödöda hegöi ba wahuhuosa khöda? Ba mbanuada andre, hadia zi toʼölö lafalua niha ba wahuhuosa khö ndra malaʼika si lö sökhi?
-
Moloʼö yaʼugö, hadia so gunania khöu goroisa Yehowa enaʼö öʼaröuʼö ndraʼugö moroi ba wakelemusa? Hana wa öwaʼö zimanö?
Futa VIDEO, ba beʼe wanema li ba wanofu-nofu daʼa:
-
Moloʼö yaʼugö, hadia lua-luania me no ibeʼe Palesa hazima khö nononia? Hadia mbörö?
-
Hadia nifalua Palesa enaʼö tola telumöʼö ira moroi khö ndra malaʼika si lö sökhi?
Iʼotarai mböröta, lö laböhöli ira niha Keriso sindruhu ba wolawa malaʼika si lö sökhi. Baso Halöwö Zinenge 19:19 hegöi 1 Korindro 10:21, ba beʼe wanema li ba wanofu daʼa:
-
Na so khöu gama-gama soʼamakhaita ba wakelemusa, hana wa moguna öhori gama-gama daʼö fefu?
6. Tola möna ndraʼugö ba wolawa Satana hegöi ira malaʼika si lö sökhi
Satana zondröniaʼö ira malaʼika si lö sökhi. Hizaʼi, Mikhaʼeli zondröniaʼö ira malaʼika si lö faröi. Daʼö döi böʼö khö Yesu. Hawaʼabölö Mikhaʼeli andrö? Baso Wamaʼeleʼö 12:7-9, ba beʼe wanema li ba wanofu-nofu daʼa:
-
Na simanö, haniha zabölö ba gotaluara, Mikhaʼeli hegöi ira malaʼikania mazui Satana hegöi ira malaʼika si lö sökhi?
-
Moloʼö yaʼugö, hadia moguna ataʼu ndra nifahaʼö Yesu khö Zatana hegöi khö ndra malaʼika si lö sökhi iadaʼa?
Tola möna ndraʼugö ba wolawa Satana hegöi ira malaʼikania si lö sökhi. Baso Yakobo 4:7, ba beʼe wanema li ba wanofu daʼa:
-
Hewisa wa tola telumöʼö ndraʼugö moroi khö Zatana hegöi malaʼika si lö sökhi?
SO ZANGUMAʼÖ: ”Lö fasala na famai game ita mazui na tafaigi film soʼamakhaita ba wakelemusa. Ha hiburan daʼö.”
-
Hana wa fasala lala wangera-ngera simane daʼö?
RAHU-RAHU WAMAHAʼÖ
Lö laböhöli wanolo yaʼita ira malaʼika si lö faröi. Udu Yehowa Zatana hegöi ira malaʼika si lö sökhi ba laʼogunaʼö wakelemusa ba wamaelungu niha gulidanö.
Hadia Wamahaʼö si Tola Öhalö?
-
Hewisa ndra malaʼika Yehowa ba wanolo niha enaʼö aboto ba dödöra sanandrösa khö Lowalangi?
-
Haniha Zatana hegöi ira malaʼika si lö sökhi?
-
Hana wa moguna öʼaröuʼö ndraʼugö ba ngawalö wakelemusa?
ALUI NASA DANÖ BÖʼÖ
Hadia dandra sangoromaʼö wa Yesu andrö Mikhaʼeli sondröniaʼö mazui kafalo malaʼika?
Baso atö zi tobali tandra sangoromaʼö wa Satana andrö tenga ha amuata faʼalösökhi si so ba dödö niha.
Baso waö-waö salua khö zi samösa ira alawe si no mofozu ba wangeheta yaʼia moroi ba waʼabölö malaʼika si lö sökhi.
”Isöndra Geluaha Waʼauri” (Menara Pengawal, 1 Mbaŵa si Fitu 1993)
Hewisa Zatana wangogunaʼönia fakelemusa ba wolimo niha?
”Sindruhu Sanandrösa ba Wakelemusa” (Jalan Menuju Kehidupan Abadi, faosatö 5)
Te Göi Adöni Dödöu
SASESE LASOFU NIHA
Hewisa Wamahaʼö Zura Niʼamoniʼö Nifaʼema Ndra Samaduhuʼö Yehowa?
Lö muʼandrö gefe ba program daʼa. Tola öʼogunaʼö gofu hadia manö wamoʼeluaha Zura Niʼamoniʼö somasiʼö. Tola göi ökaoni nawöu mazui ösi nomou ba wefao khöu.
