Hadia so niha niʼomasiʼömö si no mate? Tatu manö abu sibai dödömö me luo daʼö. Ba te manofu-nofu ndraʼugö, ’Hadia zalua ba niha si no mate? Hadia tola ifuli falukha ita ba niha niʼomasiʼöda si no mate?’ Ba wamahaʼö daʼa hegöi ba wamahaʼö ba zi so miföna, tafatunö hadia wanema li moroi ba Zura Niʼamoniʼö si möi fondrara dödöda.

1. Hadia zalua ba niha si no mate?

Me fahuhuo Yesu, iʼamaedolagö niha si no mate andrö hulö niha sabölö-bölö femörö. Hana wa tefaudu na muʼamaedolagö niha si no mate hulö niha si no mörö? Na abölö-bölö wemörö zi samösa niha, lö iʼila hadia zalua ba zi fasuinia. Simanö göi na mate niha, lö saʼae irasoi waʼafökhö. Lö irasoi wa lö awö-awönia hewaʼae na iʼomasiʼö sibai mböröta zi fahuwu khönia, simanö göi nösi nomonia. Ifatunö khöda Sura Niʼamoniʼö wa ”niha si no mate lö laʼila hadia ia”.—Baso Zangombakha 9:5.

2. Hadia gunania khöda na taʼila zindruhu sanandrösa ba niha si no mate?

Ato niha sataʼu mate, ba ataʼu ira göi ba niha si no mate. Hizaʼi, terara dödöu na no öʼila hadia zindruhunia nifahaʼö Zura Niʼamoniʼö sanandrösa ba niha si no mate. Imane Yesu, ”Sindruhu andrö zangefaʼö yaʼami.” (Yohane 8:32) Oya agama samahaʼö na no mate zi samösa niha, ba auri nasa nosonia. Hizaʼi, tenga simane daʼö wamahaʼö Zura Niʼamoniʼö. Na no mate zi samösa niha, lö saʼae irasoi waʼafökhö. Börö me lö laʼila hadia ia niha si no mate, andrö wa tebai lafakao ita. Daʼö mbörö wa lö tafalua gowasa ba wamahono noso niha si no mate, lö tafosumange mazui mangalulu ita ba niha si no mate. Lö göi moguna taʼohe ira ba wangandröda.

So zangumaʼö wa tola fahuhuo ira ba niha si no mate. Faya-faya daʼö. Simane si no tafahaʼö yaʼita, niha si no mate ”lö laʼila hadia ia”. Niha sangumaʼö wa no fahuhuo ira ba niha si no mate, sindruhunia khö ndra malaʼika si lö sökhi fahuhuo ira, samatewu yaʼira ba mboto niha si no mate. Börö daʼö, na no taʼokhögö waʼaboto ba dödö sanandrösa ba niha si no mate, tola telumöʼö ita moroi khö ndra malaʼika si lö sökhi. Iʼila Yehowa wa tobali famaʼalada na fahuhuo ita khö ndra malaʼika si lö sökhi. Andrö wa ibeʼe khöda wamangelama enaʼö lö fahuhuo ita ba niha si no mate.—Baso 5 Moze 18:10-12.

3. Hadia nifahaʼö Zura Niʼamoniʼö sanandrösa ba niha si no mate?

Ba zi sagörö ulidanö, no faböʼö-böʼö zi faduhu dödö niha sanandrösa ba niha si no mate. Tatu manö lö fefu oi atulö nifaduhusira tödö andrö.

• Ba mbanua si so yaʼugö, hadia manö nifaduhusi tödö niha sato sanandrösa ba niha si no mate?

 4. Hadia gunania khöda na taʼila zindruhu sanandrösa ba niha si no mate?

Na no taʼila zindruhu sanandrösa ba niha si no mate, lö saʼae ataʼu ita khöra. Baso Zangombakha 9:10, ba beʼe wanema li ba wanofu daʼa:

• Hadia tola ifaʼala ita niha si no mate?

Famahaʼö moroi ba Zura Niʼamoniʼö zolumöʼö yaʼita moroi ba nifaduhusi tödö niha sato wa moguna mufahono noso niha si no mate, mufosumange mazui mangalulu ita khöra. Baso Yesaya 8:19 hegöi Famaʼeleʼö 4:11, ba beʼe wanema li ba wanofu daʼa:

• Moloʼö yaʼugö, hewisa dödö Yehowa na so niha sangalulu mazui sangandrö fanolo ba niha si no mate?

5. Tobali fondrara dödöda zindruhu sanandrösa ba niha si no mate

Ato niha sanema famahaʼö wa tefakao ira dania na no mate börö zala nifaluara. Hizaʼi, terara dödöda börö me no taʼila wa lö tefakao niha si no mate hewaʼae no lafalua gamuata si lö sökhi me mböröta. Baso Roma 6:7, ba beʼe wanema li ba wanofu daʼa:

• Ifatunö khöda Sura Niʼamoniʼö wa no teʼefaʼö horö zi samösa niha na no mate ia. Moloʼö yaʼugö, hadia tefakao nasa niha si no mate ha börö zala nifaluania ba zilalö?

Na itugu aboto ba dödöda haniha Yehowa andrö, monönö waʼafaduhu dödöda khönia wa lö irai ifakao niha si no mate. Baso 5 Moze 32:4 hegöi 1 Yohane 4:8, ba beʼe wanema li ba wanofu-nofu daʼa:

• Hadia ifakao niha si no mate Lowalangi sangokhögö bua-bua si sökhi simane nitutunö ba ayati daʼö?

• Hadia terara dödöu me no ösöndra waʼaboto ba dödö sanandrösa ba niha si no mate? Hadia mbörö wa öwaʼö daʼö?

 RAHU-RAHU WAMAHAʼÖ

Niha si no mate lö laʼila hadia ia, lö tefakao ira ba tebai göi lafaʼala mazui lafalua khöda zi lö sökhi.

Hadia Wamahaʼö si Tola Öhalö?

• Hadia zalua ba niha si no mate?

• Hadia gunania khöu me no aboto ba dödöu sanandrösa ba niha si no mate?

• Hadia mbörö wa terara dödöda me no taʼila zindruhu sanandrösa ba niha si no mate?