FAMAHAʼÖ 30
Tola Ifuli Auri Niha Niʼomasiʼöu si No Mate!
Ba ginötö mate zi samösa niha, tarasoi waʼabu dödö ba faʼafatö dödö. Daʼö mbörö wa iwaʼö Sura Niʼamoniʼö faʼamate andrö udu. (1 Korindro 15:26) Ba Wamahaʼö 27, no öfahaʼö ndraʼugö wa iheta waʼamate andrö Yehowa. Hizaʼi, hewisa niha si no mate? No ifabuʼu Yehowa wa isusugi niha si no mate si miliaran faʼato enaʼö lasöndra waʼomuso dödö sagötö faʼara! Ba wamahaʼö daʼa, oya zinangea öfahaʼö ndraʼugö sanandrösa ba mbuʼusa li Yehowa sahöli-höli dödö. Hadia sindruhu-ndruhu alua wanusugi andrö? Hezo tesusugi niha si no mate, ba zorugo mazui ba gulidanö?
1. Hadia zedöna ifalua Yehowa ba niha niʼomasiʼöda si no mate?
Omasi sibai Yehowa isusugi niha si no mate. Samösa ndra matua samati sotöi Yobi, faduhu dödönia wa lö iʼolifugö ia Lowalangi hewaʼae na mate ia. Imane khö Lowalangi, ”Ökaoni dania ndraʼo ba utema liu [moroi ba Lewatö].”—Baso Yobi 14:13-15.
2. Hadia mbörö wa faduhu dödöda wa tesusugi niha si no mate?
Me so Yesu ba gulidanö, ibeʼe khönia waʼabölö Lowalangi ba wanusugi niha si no mate. No irai isusugi nono alawe si 12 fakhe, simanö göi nono matua khö zi samösa lakha mbanua. (Mareko 5:41, 42; Luka 7:12-15) Samuza inötö mate göi Lazaro si fahuwu khö Yesu. Hewaʼae no mate Lazaro ba no lakoʼo ia öfa hari waʼara, tola isusugi ia Yesu. Me no aefa mangandrö ia khö Lowalangi, ebua li Yesu wangumaʼö, ”He Lazaro, ae baero!” Ba ”möi baero niha si no mate andrö”. Sindruhu, no ifuli auri Lazaro! (Yohane 11:43, 44) Khalaigö hawaʼomuso dödö nösi nomonia hegöi si fahuwu khönia!
3. Hadia dötönafö ba niha niʼomasiʼöda si no mate?
No ifabuʼu Sura Niʼamoniʼö, ”So wanusugi niha si no mate.” (Halöwö Zinenge 24:15) Me isusugi mböröta niha si no mate Yesu, tenga ba zorugo so ira. (Yohane 3:13) Omuso dödöra börö me isusugi ira Yesu ba ifuli auri ira ba gulidanö. Ba zi lö ara tö, ifuli ifalua wanusugi ba niha si miliaran faʼato enaʼö tola lasöndra waʼohahau dödö sagötö faʼara ba gulidanö faradaiso. Iwaʼö Yesu wa ”dozi si so ba lewatö” tesusugi ira dania. Yaʼira andrö niha si no mate si lö itörö tödö niha böʼö, hizaʼi lö olifu Lowalangi ira.—Yohane 5:28, 29.
ODÖDÖGÖ NASA WANGALUI
Tatutunö dania hadia manö dandra-tandra si so ba Zura Niʼamoniʼö sangoromaʼö wa tola tesusugi niha si no mate. Tafatunö göi wa möi fondrara dödö mbuʼusa li sanandrösa ba wanusugi andrö ba ibeʼe khöda wanötöna.
4. Iforomaʼö Yesu wa tola isusugi niha si no mate
Tafatunö göi dania hadia manö nifalua Yesu khö zi fahuwu khönia sotöi Lazaro. Baso Yohane 11:14, 38-44, ba beʼe wanema li ba wanofu-nofu daʼa:
-
Hezo taʼila wa no mate Lazaro?—Faigi ayati 39.
-
Na ba zorugo numalö Lazaro, hadia ifuli isusugi ia Yesu ba gulidanö andre? Hewisa moloʼö yaʼugö?
5. Ato sibai niha nisusugi!
Baso Zinunö 37:29, ba beʼe wanema li ba wanofu daʼa:
-
Ba ginötö tesusugi niha si miliaran faʼato, hezo auri ira?
Ba zi so miföna, tenga ha samosumange Yehowa nisusugi Yesu. Baso Halöwö Zinenge 24:15, ba beʼe wanema li ba wanofu daʼa:
-
Na tesusugi niha si no mate, haniha dania zomasiʼö öfalukhaisi?
Tandraigö angeragö daʼa: Aoha khö Yesu ba wanusugi niha si no mate fagölö simane si samösa ama na isusugi nononia si no mörö
6. Buʼusa li sanandrösa ba wanusugi möi fondrara dödöu ba ibeʼe khöu wanötöna
Fanusugi ono Yaʼiro ono alawe si no tesura bakha ba Zura Niʼamoniʼö, möi fondrara dödö ba famarou dödö niha sato si göna abula dödö. Baso waö-waö salua andrö ba Luka 8:40-42, 49-56.
Fatua lö isusugi nono Yaʼiro ono alawe, imane Yesu khö Yaʼiro, ”Böi busi dödöu. Amati manö.” (Faigi ayati 50.) Hewisa wa möi fanolomö dötönafö sanandrösa ba wanusugi ba ginötö . . .
-
mate niha niʼomasiʼöu?
-
teʼala waʼaurimö?
Futa VIDEO, ba beʼe wanema li ba wanofu daʼa:
-
Hewisa dötönafö sanandrösa ba wanusugi tobali fondrara dödö ba famarou dödö khö zatua Phelicity?
SO ZANGUMAʼÖ: ”Lö faduhu dödögu wa ifuli auri niha si no mate ba gulidanö.”
-
Hewisa moloʼö yaʼugö?
-
Hadia ayati niʼogunaʼömö ba wamaduhuʼö khönia wa ifuli auri niha si no mate ba gulidanö?
RAHU-RAHU WAMAHAʼÖ
No ifabuʼu Sura Niʼamoniʼö wa ifuli tesusugi niha si no mate si miliaran faʼato. Omasi Yehowa na ifuli auri ira ba no ibeʼe kuaso khö Yesu ba wanusugi yaʼira.
Hadia Wamahaʼö si Tola Öhalö?
-
Hadia dania nifalua Yehowa hegöi Yesu ba niha si no mate?
-
Hezo dania tesusugi niha si miliaran faʼato, hadia ba zorugo mazui ba gulidanö? Hana wa öwaʼö zimanö?
-
Hadia mbörö wa faduhu dödöu wa ifuli auri niha niʼomasiʼöu?
ALUI NASA DANÖ BÖʼÖ
Lala si tola tafalua na göna ita abula dödö börö waʼamate.
”Fanolo ba Niha si Göna Abula Dödö Börö Waʼamate” (Sadarlah! No. 3 2018)
Na so niha si göna abula dödö börö me no mate niha niʼomasiʼönia, hadia möi fondrara dödönia niwaʼö Zura Niʼamoniʼö?
Hadia zi tola manolo iraono na mate niha niʼomasiʼöra?
Hadia so dania niha nisusugi ba zorugo? Haniha manö zi lö tesusugi?
Te Göi Adöni Dödöu
SASESE LASOFU NIHA
Hewisa Wamahaʼö Zura Niʼamoniʼö Nifaʼema Ndra Samaduhuʼö Yehowa?
Lö muʼandrö gefe ba program daʼa. Tola öʼogunaʼö gofu hadia manö wamoʼeluaha Zura Niʼamoniʼö somasiʼö. Tola göi ökaoni nawöu mazui ösi nomou ba wefao khöu.
