Moguna sibai ndro. Tebai auri ita na lö hadöi do. Börö me Lowalangi Zomböi faʼauri, andrö wa ha yaʼia zinangea motatugöi hewisa wangogunaʼö do. Hadia niwaʼö Lowalangi sanandrösa ba ndro? Hadia tola taʼa ndro mazui tatema transfusi darah? Hewisa enaʼö öʼila öhalö gangetula si tefaudu sanandrösa ba wangogunaʼö do?

1. Hewisa wamaigi Yehowa sanandrösa ba ndro?

Ifatunö mböröta ba nono mbanuania Yehowa, ”Noso zauri fefu yaʼia daʼö donia”. (3 Moze 17:14) Ba wamaigi Yehowa, do andrö amaedola waʼauri. Börö me faʼauri andrö buala fondrege niʼamoniʼö moroi khö Lowalangi, andrö göi wa muʼamoniʼö sibai ndro.

2. Hezo manö lö itehegö Lowalangi ba wangogunaʼö do?

Fatua lö tefasindro mbanua niha Keriso, no ibeʼe goroisa ba nono mbanuania Yehowa enaʼö lö laʼa ndro. (Baso 1 Moze 9:4 hegöi 3 Moze 17:10.) Me no aefa tefasindro mbanua niha Keriso, ifuli zui ibeʼe goroisa daʼö. Lafaʼema daʼö ira Boto Solohe ba mbanua niha Keriso, ”Miʼaröuʼö ami . . . moroi ba ndro.”—Baso Halöwö Zinenge 15:28, 29.

Hadia geluahania taʼaröuʼö ita moroi ba ndro? Na iwaʼö khöu doto enaʼö öböhöli wamadu tuo, tatu lö saʼae öbadu duo. Hizaʼi, hadia öʼa nasa gö si no mufaruka tuo mazui ösuti daʼö ba mbotomö? Tatu manö löʼö. Simane daʼö göi, na taʼoʼö goroisa Lowalangi enaʼö taʼaröuʼö ita moroi ba ndro, eluahania lö taʼa mazui tabadu ndro. Lö göi taʼa nagole si lö niduwagö do mazui ö si no mufaruka ba ndro.

Hewisa göi wangogunaʼö do nibaliʼö dalu-dalu? So ösa dalu-dalu si fasala moloʼö oroisa Lowalangi. Duma-dumania, taransfusi darah utuh mazui si öfa faosatö moroi ba ndro yaʼia daʼö sel darah merah, sel darah putih, trombosit hegöi plasma. Hizaʼi, sanandrösa ba wangogunaʼö dalu-dalu tanö böʼö, lö nitutunö Zura Niʼamoniʼö hadia fasala daʼö mazui löʼö. Duma-dumania, so lala wameʼe dalu-dalu sangogunaʼö fraksi moroi ba zi sambua faosatö ndro. So göi lala wamadöhö tanö böʼö nifalua ndra doto yaʼia daʼö laʼogunaʼö ndro niha nifadöhöra andrö. Dozi niha, yaʼira samösa zangai angetula hadia latema mazui löʼö lala wameʼe dalu-dalu simane daʼö. a—Galatia 6:5.

 ODÖDÖGÖ NASA WANGALUI

3. Fili lala wameʼe dalu-dalu sangomusoiʼö tödö Yehowa

Ba ginötö öfili lala wameʼe dalu-dalu, hewisa enaʼö öʼila öhalö gangetula si tefaudu ba wamaigi Yehowa sanandrösa ba ndro? Futa VIDEO, ba tutunö hadia mbörö wa moguna tafalua wanuturu lala andre:

• Andrö waʼatua-tua moroi khö Yehowa.—Yakobo 1:5.

• Alui goi-goi Zura Niʼamoniʼö si tefaudu, ba angeragö hewisa wamalua daʼö.—Amaedola 13:16.

• Alui hadia manö lala wameʼe dalu-dalu si so ba mbanua si toröi yaʼugö.

• Tatugöi hadia manö lala wameʼe dalu-dalu si lö ötema.

• Tatugöi nifilimö enaʼö lö itegu ndraʼugö tödöu side-ide.—Halöwö Zinenge 24:16. b

• Ba ginötö öhalö gangetula soʼamakhaita ba dödö side-ide, törö tödöu wa tebai so zamaso yaʼugö ba wangai angetula hewaʼae na daʼö foʼomou samösa, satua sokubaloi mazui samahaʼö yaʼugö ba Zura Niʼamoniʼö.—Roma 14:12.

• Na no öhalö gangetula, sura gangetula daʼö enaʼö laʼila niha tanö böʼö.

4. Laforege ira Samaduhuʼö Yehowa enaʼö latema lala wameʼe dalu-dalu sabölö sökhi

Tola taʼoʼö goroisa Lowalangi sanandrösa ba ndro ba tola göi tasöndra lala wameʼe dalu-dalu si tefaudu si lö mangogunaʼö do. Futa VIDEO.

Baso Dito 3:2, ba beʼe wanema li ba wanofu daʼa:

• Ba ginötö fahuhuo ita khö ndra doto, hadia mbörö wa tafosumange ira ba tahaogö-haogö wahuhuosa khöra?

 5. Lala wameʼe dalu-dalu sangogunaʼö fraksi darah

So öfa faosatö ndro: sel darah merah, sel darah putih, trombosit hegöi plasma. Si öfa faosatö daʼa, tola mubagi-bagi ia tobali faosatö sigide-ide yaʼia nifotöi fraksi darah. c So ösa fraksi darah niʼogunaʼö ndra doto ba wamadöhö niha sofökhö mazui ba wanaha faʼaduwa ndro.

Dozi niha Keriso yaʼira samösa zangai angetula ba ginötö lafili lala wamadöhö fökhö sangogunaʼö fraksi darah. Fefu gangetula nihalöra andrö teʼodane-dane ba dödöra side-ide si no tefomaha ba goi-goi Zura Niʼamoniʼö. Te so niha Keriso sangai angetula wa lö omasi ia itema lala wamadöhö sangogunaʼö fraksi darah. Hizaʼi, so göi niha keriso sanemaʼö fraksi darah börö me itehegö daʼö tödönia side-ide.

Ba ginötö öhalö gangetula simane daʼö, angeragö wanofu daʼa:

• Hewisa lalagu wamatunö khö ndra doto hana wa so ösa fraksi darah somasido utema ba so göi zi löʼö?

 RAHU-RAHU WAMAHAʼÖ

Omasi Yehowa enaʼö teʼamoniʼö ndro andrö ba wamaigida.

Hadia Wamahaʼö si Tola Öhalö?

• Hadia mbörö wa niʼamoniʼö ndro andrö ba wamaigi Yehowa?

• Me ibeʼe goroisania Lowalangi enaʼö taʼaröuʼö ita moroi ba ndro, hezo taʼila wa tefarahu ba daʼö transfusi darah?

• Hewisa enaʼö tola öhalö gangetula si tefaudu sanandrösa ba wameʼe dalu-dalu sangogunaʼö do?