Khalaigö zi samösa ina sanolo ononia side-ide fatua lö mofanö ba zekola. Ifaigi hadia no mondri nononia ba hadia sökhi ba lö taʼunö nukha nononia andrö. Daʼö zangoromaʼö wa iʼameʼegö tödö nononia enaʼö lö mofökhö ba laʼila niha wa yaʼia andrö satua si sökhi sondrorogö ononia. Simane daʼö Namada Yehowa sebua faʼomasi. Omasi ia na lö taʼunö mbotoda, fangera-ngera, fehede hegöi amuatada. Na tarorogö enaʼö lö taʼunö ita, so mbuania khöda ba tefolakhömi Yehowa.

1. Hewisa enaʼö lö taʼunö mbotoda?

Imane khöda Yehowa, ”Miʼamoniʼö ami.” (1 Fetero 1:16) Fangamoniʼö andrö moʼamakhaita ia ba walötaʼunö mboto, fangera-ngera, fehede hegöi amuata. Enaʼö lö taʼunö mbotoda, taʼaseseʼö mondri, tasasai nukhada, tahaogö nomoda simanö göi hondra hegöi moto nifakeda. Tola göi talului wangehaogö Nahia Gangowuloada. Na lö taʼunö mbotoda, tobali famolakhömi Yehowa daʼö.—2 Korindro 6:3, 4.

2. Enaʼö lö taʼunö ita, hadia manö zinangea taböhöli?

Ifarou ita Sura Niʼamoniʼö enaʼö ’taʼehaogö ita moroi ba ngawalö zi tola manaʼunöisi botoda hegöi fangera-ngerada’. (2 Korindro 7:1) Eluahania, moguna taforege ba wanimbagö gofu hadia ia zi tola mamakiko boto hegöi fangera-ngerada. Moguna göi tarorogö wangera-ngerada enaʼö möi fangomuso dödö Yehowa. Börö daʼö, dataforege ba wanimbagö fangera-ngera si lö sökhi. (Sinunö 104:34) Moguna göi tazago wehededa enaʼö böi raʼiö.—Baso Kolose 3:8.

Hadia nasa zi tola manaʼunöisi botoda, fangera-ngera, fehede hegöi amuatada? So zi tola manaʼunöisi botoda, duma-dumania foroko, femanga bago, fonganga afo mazui fangogunaʼö narkoba. Na taʼaröuʼö ita moroi ba daʼö, tola itugu sökhi waʼaurida ba no taforomaʼö wa taʼameʼegö tödö waʼauri si no iʼamualagö khöda. Moguna göi tarorogö enaʼö lö raʼiö gamuatada, fangera-ngera hegöi nifaluada yaʼia na talawa gamuata si raʼiö simane masturbasi mazui pornografi. (Sinunö 119:37; Efeso 5:5) Tola manö abua khöda ba wamöhöli amuata simane daʼö. Hizaʼi, hasambalö itolo ita Yehowa.—Baso Yesaya 41:13.

 ODÖDÖGÖ NASA WANGALUI

3. Tefolakhömi Yehowa na lö taʼunö mbotoda

Moroi ba goroisa Yehowa nibeʼenia ba ndraono Gizaraʼeli, ba daʼö taʼila wa omasi ia na lahaogö mbotora iraono mbanuania. Baso 2 Moze 19:10 ba 30:17-19, ba beʼe wanema li ba wanofu-nofu daʼa:

• Moroi ba ayati daʼö, hewisa wamaigi Yehowa fangehao mboto?

• Hadia zi tola öfalua ba wondrorogö enaʼö lö taʼunö mbotomö?

Sindruhu sa wa moguna ginötö hegöi famorege ba wondrorogö enaʼö lö taʼunö mbotoda. Hizaʼi, tola tafalua daʼö gofu hezo toröi ita mazui gofu hewisa waʼatosasa hegöi faʼakayoda. Futa VIDEO, ba beʼe wanema li ba wanofu daʼa:

• Na tarorogö enaʼö lö taʼunö ba toföfö gama-gamada, hana wa möi famarou dödö daʼö ba niha nifalukhaisida ba wanuriaigö enaʼö lasuno Yehowa?

4. Böhöli wamalua amuata si raʼiö

Na asese moroko ndraʼugö mazui öʼogunaʼö narkoba, te aboto ba dödöu wa abua sibai wamöhöli si toʼölö öfalua andrö. Hadia zi tola manolo yaʼugö? Angeragö hadia lua-luania. Baso Mataiʼo 22:37-39, ba tutunö hadia lua-luania ba zi samösa niha na moroko ia, iʼa mbago mazui na ibadu narkoba . . .

• ba wahuwusania khö Yehowa.

• ba nösi nomonia mazui ba niha si so ba zi fasuinia.

Angeragö hadia manö zi tola öfalua ba wamöhöli ngawalö zi raʼiö si toʼölö öfalua. a Futa VIDEO.

Baso Wilifi 4:13, ba beʼe wanema li ba wanofu daʼa:

• Na asese mangandrö zi samösa niha, ifahaʼö ia ba Zura Niʼamoniʼö ba möi ia ba gangowuloa, hana wa tola möi fangabölönia daʼö ba wamöhöli ngawalö zi raʼiö si toʼölö ifalua?

 5. Timbagö wangera-ngera hegöi si raʼiö si toʼölö öfalua

Baso Kolose 3:5, ba beʼe wanema li ba wanofu-nofu daʼa:

• Hezo tola taʼila wa pornografi, sexting b hegöi masturbasi no amuata si raʼiö daʼö ba wamaigi Yehowa?

• Moloʼö yaʼugö, hadia tola tarorogö enaʼö lö raʼiö wangera-ngerada, fehede hegöi amuatada simane niʼandrö Yehowa? Hana wa öwaʼö zimanö?

Hewisa wolawada fangera-ngera si raʼiö? Futa VIDEO.

So sambua gamaedola nitutunö Yesu sangoromaʼö wa moguna sibai taʼaliokö wangai angetula enaʼö lö raʼiö ita ba wangera-ngera, fehede hegöi ba gamuata. Baso Mataiʼo 5:29, 30, ba beʼe wanema li ba wanofu daʼa:

• Tenga daʼö geluaha niwaʼö Yesu enaʼö tafaʼala ita, hizaʼi moguna taʼanemaiʼö wangai angetula. Hadia gangetula si lö tola löʼö ihalö si samösa niha ba wolawa fangera-ngera si raʼiö? c

Na öforege ba wolawa fangera-ngera si raʼiö, lö olifu Yehowa nifaluamö andrö. Baso Zinunö 103:13, 14, ba beʼe wanema li ba wanofu daʼa:

• Na öforege ba wolawa ngawalö zi raʼiö si toʼölö öfalua, hewisa wa möi fanolomö ayati daʼa enaʼö lö awuwu ndraʼugö?

 RAHU-RAHU WAMAHAʼÖ

Na tarorogö enaʼö lö taʼunö mbotoda, fangera-ngera hegöi amuatada, no taʼomusoiʼö dödö Yehowa.

Hadia Wamahaʼö si Tola Öhalö?

• Hana wa lö tola löʼö tarorogö enaʼö lö taʼunö mbotoda?

• Hewisa wondrorogömö enaʼö lö taʼunö mbotomö?

• Hewisa enaʼö lö raʼiö wangera-ngera hegöi amuatamö?