FAMAHAʼÖ 41
Hadia Niwaʼö Zura Niʼamoniʼö Sanandrösa ba Waʼorudu?
Ato niha si lö omasi na ladunö-dunö sanandrösa ba waʼorudu. Ba ginötö itutunö Sura Niʼamoniʼö sanandrösa ba waʼorudu, ihaogö izara-zara wangombakha, hizaʼi tenga si möi fangaila. So gunania khöda niwaʼö Zura Niʼamoniʼö andre börö me moroi khö Yehowa Zura Niʼamoniʼö. Yehowa Zomböi yaʼita ba aboto ba dödönia hadia zabölö sökhi khöda. Ifatunö khöda hadia zinangea tafalua ba wangomusoiʼö tödönia ba hadia zanolo yaʼita enaʼö tasöndra waʼohahau dödö sagötö faʼara.
1. Hewisa wamaigi Yehowa sanandrösa ba waʼorudu?
Faʼorudu andrö buala moroi khö Yehowa. Omasi ia na lasöndra waʼomuso dödö ba waʼorudu si samösa ira matua hegöi ira alawe si no tefaböbö ba wangowalu. Börö mbuala andre wa tola mongaʼötö zi sambua fongambatö. Hizaʼi, moguna laforomaʼö waʼomasira ba lala si tefaudu ba sinangea, irege tola tobali fangomuso dödöra daʼö. Andrö imane Taromali Lowalangi, ”Yaʼomuso dödöu khö woʼomou ira alawe nihalöu me awuyu-wuyu ndraʼugö.” (Amaedola 5:18, 19) Iʼandrö Yehowa ba niha Keriso enaʼö lö faröi ira khö ngambatöra. Na laʼoʼö daʼö, lö lafalua waʼorudu ba zi tenga foʼomora.—Baso Heberaiʼo 13:4.
2. Hadia gamuata fohorö andrö?
Imane Sura Niʼamoniʼö, ”Niha sohorö . . . tebai tefaʼamöi ba Wamatörö Lowalangi.” (1 Korindro 6:9, 10) Ngawua wehede Yunani niʼogunaʼö ndra sanura Sura Niʼamoniʼö sanandrösa ba gamuata wohorö, yaʼia daʼö porneia. Eluahania (1) faʼorudu a ndra matua hegöi ira alawe si lö sangowalu, (2) faʼorudu ndra matua khö nawönia ira matua, ira alawe khö nawönia ira alawe, ba (3) faʼorudu ba gurifö. Na taʼaröuʼö ita ba ”gamuata wohorö”, no taʼomusoiʼö dödö Yehowa ba tatema howu-howu.—1 Tesalonika 4:3.
ODÖDÖGÖ NASA WANGALUI
Tatutunö dania hewisa enaʼö taʼaröuʼö ita ba gamuata wohorö. Tafatunö göi dania, hadia mbuania khöda na lö raʼiö ita ba wangera-ngera, ba wehede hegöi ba gamuata.
3. Miʼaliokö wanimba amuata wohorö
Samösa nono mbanua Lowalangi sotöi Yosefo, itimbagö wondrönisi dödö nifalua ndra alawe sedöna orudu khönia. Baso 1 Moze 39:1-12, ba beʼe wanema li ba wanofu-nofu daʼa:
-
Hadia mbörö wa moloi Yosefo moroi khö ndra alawe daʼö?—Faigi ayati 9.
-
Moloʼö yaʼugö, hadia tefaudu gangetula nihalö Yosefo andrö? Hana wa öwaʼö zimanö?
Hewisa ndraono si bohou ebua woloʼöra duma-duma Yosefo enaʼö laʼanemaiʼö wanimbagö amuata wohorö? Futa VIDEO.
Omasi Yehowa na tatimbagö gamuata wohorö. Baso 1 Korindro 6:18, ba beʼe wanema li ba wanofu-nofu daʼa:
-
Hadia manö ginötö si möi börö wa tola ifalua gamuata wohorö si samösa niha?
-
Hadia nifaluamö enaʼö öʼila ötimbagö gamuata wohorö?
4. Tola ölawa wondrönisi dödö
Hadia mbörö wa abua khöda ba wolawa fondrönisi dödö ba wamalua amuata wohorö? Futa VIDEO, ba beʼe wanema li ba wanofu daʼa:
-
Ba video andrö mege, hadia nifalua dalifusöda ira matua me iʼokhögö wangera-ngera hegöi amuata si tola möi börö waʼafaröinia khö woʼomonia?
Itaria abua ba niha Keriso si lö faröi ba wondrorogö fangera-ngerara enaʼö lö raʼiö. Hadia manö zinangea öfalua enaʼö lö öʼera-era gamuata wohorö? Baso Wilifi 4:8, ba beʼe wanema li ba wanofu-nofu daʼa:
-
Hadia manö zinangea taʼangeragö?
-
Na asese tabaso Zura Niʼamoniʼö ba möi ita manuriaigö, hadia mbörö wa möi fanolo khöda daʼö ba wolawa fondrönisi dödö?
5. Moguna khöda goi-goi Yehowa
Iʼila Yehowa hadia zabölö sökhi khöda. Andrö wa ifatunö khöda hewisa lala enaʼö lö raʼiö ita ba wehede, ba wangera-ngera hegöi ba gamuata, ba hadia mbuania na tafalua daʼö. Baso Gamaedola 7:7-27 mazui futa VIDEO, ba beʼe wanema li ba wanofu-nofu daʼa:
-
Hewisa wa tola tedönisi dödö nono matua daʼö?—Faigi Gamaedola 7:8, 9.
-
Moloʼö sura Gamaedola 7:23, 26, amuata wohorö tola iʼasogö khöda ngawalö gabula dödö si lö sökhi. Na lö raʼiö ita ba wangera-ngera hegöi ba gamuatada, hadia manö gabula dödö si lö alua khöda?
-
Na lö raʼiö ita ba wangera-ngera hegöi ba gamuata, hana wa tola tasöndra waʼohahau dödö sagötö faʼara?
So zangumaʼö wa fehede Zura Niʼamoniʼö sanandrösa ba waʼorudu ndra matua khö nawönia ira matua, ira alawe khö nawönia ira alawe, no amakhoita si lö faʼomasi. Hizaʼi, Yehowa andrö Lowalangi sebua faʼomasi ba omasi ia na dozi niha lasöndra waʼohahau dödö sagötö faʼara. Enaʼö tola tasöndra waʼauri simane daʼö, moguna taʼoʼö goi-goi Yehowa. Baso 1 Korindro 6:9-11, ba beʼe wanema li ba wanofu daʼa:
-
Hadia ha faʼomasi ba waʼorudu ndra matua khö nawönia ira matua mazui faʼorudu ndra alawe khö nawönia ira alawe zi fatuwu khö Lowalangi?
Enaʼö tola taʼomusoiʼö dödö Lowalangi, so zinangea tabulöʼö. Na taforege wamalua daʼö, hadia so mbuania khöda? Baso Zinunö 19:8, 11, ba beʼe wanema li ba wanofu-nofu daʼa:
-
Moloʼö yaʼugö, hadia tola taʼoʼö goi-goi Yehowa sanandrösa ba gamuata? Hana wa öwaʼö zimanö?
Ato niha si no itolo Yehowa ba woloʼö goi-goinia sanandrösa ba gamuata. Tola göi itolo ndraʼugö
SO ZANGUMAʼÖ: ”Tola lafalua waʼorudu asala faoma so waʼomasi.”
-
Hewisa na so zangumaʼö khöu simane daʼö? Hadia öbeʼe fanema li?
RAHU-RAHU WAMAHAʼÖ
Faʼorudu no sambua buala moroi khö Yehowa enaʼö tola lasöndra waʼomuso dödö si sambua fongambatö.
Hadia Wamahaʼö si Tola Öhalö?
-
Hadia manö zi farahu ba gamuata wohorö andrö?
-
Hadia manö zi tola manolo yaʼita ba wanimbagö amuata wohorö?
-
Hadia gunania khöda na taʼoʼö goi-goi Yehowa sanandrösa ba gamuata?
ALUI NASA DANÖ BÖʼÖ
Baso hewisa wamaigi Lowalangi niha sorudu ba zi sambua omo fatua lö mangowalu.
”Hadia Niwaʼö Zura Niʼamoniʼö ba Niha Sorudu ba zi Sambua Omo Fatua Lö Mangowalu?” (Artikel web)
Hewaʼae lö nitehegö Zura Niʼamoniʼö waʼorudu ndra matua khö nawönia ira matua mazui ira alawe khö nawönia ira alawe, hizaʼi tenga daʼö geluahania wa fatuwu ita ba niha samalua daʼö. Baso hadia mbörö.
Hewisa wa möi folumöʼöda goroisa Lowalangi sanandrösa ba waʼorudu?
”Hadia Seks Oral Fagölö Ira Zamalua Faʼorudu?” (Artikel web)
Baso hadia mbörö wa tebulö zi samösa ira matua sorudu khö nawönia ira matua me mböröta, hizaʼi ba gafuriata tola iʼomusoiʼö dödö Lowalangi. Tuhonia ”Urasoi Wa Laʼameʼegö Tödö Ndraʼo.”
”Sura Niʼamoniʼö Zombulöʼö Faʼauri” (Menara Pengawal, 1 Mbaŵa si Öfa 2011)
a Faʼorudu si tebai mufalua nitutunö ba daʼa, yaʼia daʼö sex oral, seks anal mazui fombambaya saila nawöra.
Te Göi Adöni Dödöu
SASESE LASOFU NIHA
Hewisa Wamahaʼö Zura Niʼamoniʼö Nifaʼema Ndra Samaduhuʼö Yehowa?
Lö muʼandrö gefe ba program daʼa. Tola öʼogunaʼö gofu hadia manö wamoʼeluaha Zura Niʼamoniʼö somasiʼö. Tola göi ökaoni nawöu mazui ösi nomou ba wefao khöu.
