Omasi Yehowa na tasöndra waʼomuso dödö ba waʼauri hegöi na tafalua gowasa. Hizaʼi, hadia fefu gowasa hegöi ngaluo sebua nifalua ba gulidanö andre ahori möi fangomuso dödö Lowalangi? Hewisa wangoromaʼöda wa taʼomasiʼö Yehowa ba ginötö tahalö gangetula sanandrösa ba wamalua owasa?

1. Hadia mbörö wa lö fefu gowasa ahori möi fangomuso dödö Yehowa?

Te tokea ndraʼugö na öʼila wa sindruhunia oya gowasa si lö teʼodane-dane ba Zura Niʼamoniʼö mazui soʼamakhaita ba wamosumange adu. So göi gowasa soʼamakhaita ba agama sofaya, ba wakelemusa mazui si teʼodane-dane ba wamahaʼö niha wa so nasa noso niha si no mate. So göi gowasa nifalua si teʼodane-dane ba nifaduhusi tödö niha sato wa hasambalö alua zi lö sökhi ba lö moharazaki zi samösa niha na lö iʼoʼö zasese lafalua niha. (Yesaya 65:11) Ifangelama nono mbanuania Yehowa, ”Mifabali ami [khöra] . . . ba böi mibabaya saʼae zi raʼiö.”—2 Korindro 6:17. a

2. Hewisa dödö Yehowa ba gowasa sohöni-hönisi niha?

Ifangelama ita Yehowa enaʼö böi ’tafaduhusi tödö nawöda niha’. (Baso Yeremia 17:5.) So gowasa nifalua ba wamosumange ira samatörö mazui ira saradadu si möi fasuwö. So göi gowasa nifalua ba wamosumange lambang negara mazui ba wangowasaini hari kemerdekaan. (1 Yohane 5:21) Baero daʼö, ato göi niha sangowasaini ngawalö zoʼamakhaita ba politik mazui salua ba mbanuara. Hewisa dödö Yehowa na tahöni-höni zi samösa niha mazui si sambua organisasi, mendrua manö na organisasi daʼö mazui si samösa niha andrö lafalua ngawalö zi lö tefaudu ba gohitö dödö Lowalangi?

3. Hadia gamuata si lö tefaudu ba zomasi Lowalangi na mufalua gowasa?

Itegu ita Sura Niʼamoniʼö enaʼö böi tafalua ’wemabu-mabu, famalua owasa si lö sökhi, ba fatandrisa ba wamadu tuo’. (1 Fetero 4:3) Ba zi hauga owasa, ato zi lö fanaha tödö ba wamalua si lö sökhi ba lafalua göi gamuata wohorö. Enaʼö lö tebulö tobali ita si fahuwu khö Yehowa, moguna taʼaröuʼö ita ba gamuata simane daʼö.

 ODÖDÖGÖ NASA WANGALUI

 5. Forege enaʼö laʼameʼegö tödö niha böʼö zi no öfaduhusi tödö

6. Omasi Yehowa na tasöndra waʼomuso dödö

Omasi Yehowa tasöndra waʼomuso dödö ba wefao ba nösi nomoda hegöi khö ndra awöda. Baso Zangombakha 8:15, ba beʼe wanema li ba wanofu daʼa:

• Moroi ba ayati daʼa, hadia zangoromaʼö wa omasi Yehowa na tasöndra waʼomuso dödö?

Omasi Yehowa na larasoi iraono mbanuania wariawösa si sökhi ba si möi fangomuso dödö. Futa VIDEO enaʼö öʼila hewisa nono mbanua Yehowa ba worasoi fariawösa si sökhi ba gangowuloa internasional.

Baso Galatia 6:10, ba beʼe wanema li ba wanofu-nofu daʼa:

• Hadia ha ba ginötö tafalua gowasa awai ba daʼö tafalua ”zi sökhi” ba niha böʼö?

• Hezo zabölö ohahau dödöu: Lafaso ndraʼugö wameʼe buala na mufalua gowasa mazui mamuala ndraʼugö börö me omasiʼö öfalua daʼö soroi ba dödöu?

• Ato ndra Samaduhuʼö Yehowa sameʼe buala ba ndraonora, lafalua daʼö ba ginötö si no mutatugöi irege tokea ndraonora ba waʼomuso dödö. Na so ndraonomö, hadia manö zi sökhi si tola öfalua khöra?

 RAHU-RAHU WAMAHAʼÖ

Omasi Yehowa tasöndra waʼomuso dödö ba wefao ba nösi nomoda hegöi khö ndra awöda. Hizaʼi, iʼandrö khöda enaʼö taʼaröuʼö ita ba gowasa si lö möi fangomuso dödönia.

Hadia Wamahaʼö si Tola Öhalö?

• Hewisa enaʼö öʼila hadia möi fangomuso dödö Yehowa gowasa nifalua niha?

• Hadia zinangea tafalua enaʼö aboto ba dödö nösi nomoda hegöi ira awö-awöda gangetula nihalöda wa so gowasa si lö tafalua?

• Hezo taʼila wa omasi Yehowa na tasöndra waʼomuso dödö ba tarasoi göi wariawösa si sökhi si möi fangomuso dödöda?