FAMAHAʼÖ 55
Tuhini Mbanua Niha Keriso si Fao Yaʼugö
Ba zi sagörö ulidanö, zuta niha si fao ba wamosumange Yehowa ba zi hauga ribu mbanua niha Keriso. Laʼandrö sibai saohagölö börö me tola tefahaʼö ba tebeʼe khöra wanuturu lala ba mbanua niha Keriso andrö. Oya zi tola lafalua ba wangoromaʼö wa latuhini mbanua niha Keriso si fao yaʼira. Hadia öʼandrö göi saohagölö ba omasiʼö ötuhini mbanua niha Keriso si fao yaʼugö?
1. Hadia manö lala si tola öfalua ba wangogunaʼö inötö hegöi faʼabölöu ba wotuhini banua niha Keriso?
Fefu ita tola tabeʼe wanolo ba mbanua niha Keriso. Duma-dumania, ba mbanua niha Keriso si fao yaʼugö, hadia so ndra talifusöda si no alawa döfi mazui si tebai boto? Hadia tola ötolo ira weʼamöi ba gangowuloa? Mazui so danö böʼö si tola öfalua ba wanolo yaʼira, duma-dumania ba wowöli soguna khöra mazui ba wangehaogö omora? (Baso Yakobo 1:27.) Tola göi fao ita ba wangehaogö hegöi ba wondrorogö Nahia Gangowuloada. Lö lafaso ita wamalua daʼö. Tafalua fefu daʼö ’si fao faʼaohagölö’ börö me taʼomasiʼö Lowalangi hegöi ira talifusöda.—Sinunö 110:3.
So lala tanö böʼö si tola lafalua ira Samaduhuʼö Yehowa si no tebayagö idanö ba wotuhini banua niha Keriso si fao yaʼira. Ira talifusöda ira matua si no moloʼö goi-goi Zura Niʼamoniʼö, tola mangai halöwö ira tobali enoni ba samuza inötö dania tola göi tobali ira satua sokubaloi. Ira talifusöda ira matua hegöi ira alawe, tola ladouʼö wotuhinira halöwö fanuriaigö yaʼia daʼö na lahalö halöwö tobali perintis. So göi ndra talifusöda solului halöwö ba wamazökhi nahia gangowuloa mazui findra ira ba mbanua niha Keriso tanö böʼö si lö ato sanuriaigö.
2. Hewisa wangogunaʼöda okhötada ba wotuhini banua niha Keriso?
Tola ’tafosumange Yehowa faoma gama-gamada sebua böli’. (Amaedola 3:9) Tola tabeʼe gefeda hegöi okhötada tanö böʼö ba wotuhini banua niha Keriso si fao yaʼita hegöi halöwö fanuriaigö nifalua ba zi sagörö ulidanö. No töi sebua daʼa. (Baso 2 Korindro 9:7.) Tolo-tolo nibeʼeda, tola göi laʼogunaʼö ia ba wanolo ira talifusöda si göna bencana. Ato ndra talifusöda ’sameʼe yawa kefera’ enaʼö tola labeʼe dolo-tolo si no aoha gölö ero inötö. (Baso 1 Korindro 16:2.) Tola tabeʼe dolo-tolo ba kotak sumbangan si so ba nahia gangowuloa mazui tafaʼoheʼö secara online ba donate.pr418.com. Daʼö fefu ginötö nibeʼe Yehowa khöda enaʼö taforomaʼö waʼomasida khönia.
ODÖDÖGÖ NASA WANGALUI
Tatutunö dania hadia manö zi tola öfalua ba wotuhini banua niha Keriso.
3. Tola taʼogunaʼö gokhötada
Yehowa hegöi Yesu laʼomasiʼö niha soböwö. Duma-dumania, so samösa lakha mbanua, isuno ia Yesu börö me soroi ba dödönia wameʼe tolo-tolo khö Yehowa hewaʼae na tosasa ia. Baso Luka 21:1-4, ba beʼe wanema li ba wanofu-nofu daʼa:
-
Hadia balazi ebua dolo-tolo nibeʼeda awena omuso dödö Yehowa?
-
Hewisa dödö Yehowa hegöi Yesu na tabeʼe dolo-tolo si fao faʼaohagölö?
Enaʼö öʼila hezo manö laʼogunaʼö dolo-tolo nibeʼeda, futa VIDEO. Aefa daʼö, beʼe wanema li ba wanofu-nofu daʼa:
-
Hewisa lala wangogunaʼö tolo-tolo si no tabeʼe ba wotuhini banua niha Keriso ba zi sagörö ulidanö?
4. Tola tatehegö ginötöda hegöi faʼabölöda ba wameʼe fanolo
Ba götö Zura Niʼamoniʼö, owölö-ölö sibai nono mbanua Yehowa ba wondrorogö nahia wamosumange Lowalangi. Ba wamaluara daʼö, tenga ha labeʼe gefera. Baso 2 Ngaʼötö 34:9-11, ba beʼe wanema li ba wanofu daʼa:
-
Hewisa ndraono Gizaraʼeli zamösana ba wondrorogö omo Yehowa mazui nahia wamosumangera Lowalangi?
Enaʼö öʼila hewisa ndra Samaduhuʼö Yehowa woloʼöra duma-duma ndraono Gizaraʼeli me föna, futa VIDEO. Aefa daʼö, beʼe wanema li ba wanofu-nofu daʼa:
-
Hadia mbörö wa tarorogö enaʼö lö taʼunö ba lö tekiko Nahia Gangowuloada?
-
Hadia manö zi tola öfalua?
5. Yaʼami talifusö ira matua, miforege wangai halöwö ba mbanua niha Keriso
Sura Niʼamoniʼö zameʼe famarou dödö khö ndra talifusöda ira matua, enaʼö laforege wanuhini banua niha Keriso. Enaʼö öʼila duma-dumania, futa VIDEO. Aefa daʼö, beʼe wanema li ba wanofu daʼa:
-
Ba video andrö, hewisa Ryan wangodödögönia ba wotuhini banua niha Keriso?
Ifatunö khöda Sura Niʼamoniʼö hadia goi-goi sinangea lafalua ira talifusöda ira matua somasi mangai halöwö tobali enoni hegöi satua sokubaloi. Baso 1 Timoteo 3:1-13, ba beʼe wanema li ba wanofu-nofu daʼa:
TE SO ZANOFU: ”Hezo lahalö gefe niʼogunaʼöra ira Samaduhuʼö Yehowa ba wamalua halöwöra?”
-
Hewisa wameʼemö fanema li?
RAHU-RAHU WAMAHAʼÖ
Omuso dödö Yehowa na taʼogunaʼö ginötö, faʼabölöda hegöi okhötada ba wotuhini banua niha Keriso.
Hadia Wamahaʼö si Tola Öhalö?
-
Hewisa wangogunaʼöda inötö hegöi faʼabölöda ba wotuhini banua niha Keriso?
-
Hewisa wangogunaʼöda okhötada ba wotuhini banua niha Keriso?
-
Hadia manö zomasiʼö öfalua ba wotuhini banua niha Keriso?
ALUI NASA DANÖ BÖʼÖ
Baso hadia mbörö wa lö iʼandrö ba nono mbanuania Lowalangi iadaʼa ba wameʼe si sambua niʼofulu.
”Hadia Niwaʼö Zura Niʼamoniʼö Sanandrösa ba zi Sambua Niʼofulu?” (Artikel web)
Ba Zura Niʼamoni’ö, so ösa halöwö nibeʼe khö ndra talifusöda ira matua si no tebayagö idanö. Hizaʼi, hewisa na so ndra alawe si no tebayagö idanö samalua halöwö andrö?
Faigi hadia nifalua ndra talifusöda si lö faʼataʼu enaʼö tola lafasao publikasi khö ndra talifusöra si sara lala wamati.
Lala ba wangaʼasogö kefe niʼogunaʼö ba wamalua halöwöda, faböʼö sibai moroi ba organisasi tanö böʼö. Hadia manö gamaehutania?
”Hewisa Wangaʼasogö Kefe Soguna ba Halöwö Nifalua Ndra Samaduhuʼö Yehowa?” (Artikel web)
Te Göi Adöni Dödöu
SASESE LASOFU NIHA
Hewisa Wamahaʼö Zura Niʼamoniʼö Nifaʼema Ndra Samaduhuʼö Yehowa?
Lö muʼandrö gefe ba program daʼa. Tola öʼogunaʼö gofu hadia manö wamoʼeluaha Zura Niʼamoniʼö somasiʼö. Tola göi ökaoni nawöu mazui ösi nomou ba wefao khöu.
