Niha si bohou mangowalu, latötöna wa faʼomuso dödö nirasoira ba zi maʼökhö andrö enaʼö simane daʼö manö irugi zi lö aetu. Ba tenga si tebai alua daʼö. Ato niha Keriso si no ara mongambatö, laforege wamalua mene-mene Zura Niʼamoniʼö irege larasoi waʼomuso dödö simane daʼö.

1. Hadia mene-mene Zura Niʼamoniʼö khö woʼomo ira matua?

No itatugöi Yehowa wa ira matua zi tobali högö yomo ba nomo. (Baso Efeso 5:23.) Iʼandrö Yehowa khö woʼomo ira matua enaʼö lahalö gangetula si sökhi ba nösi nomora. Imane Sura Niʼamoniʼö khö woʼomo ira matua, ”Miʼomasiʼö woʼomomi ira alawe.” (Efeso 5:25) Hadia geluahania? Foʼomo ira matua sebua faʼomasi, ihaogö gamuatania khö woʼomonia ba ginötö ha darua ira mazui föna niha sato. Ihaogö wotatugöi enaʼö lasöndra waʼahono dödö hegöi faʼohahau dödö. Iʼasogö zoguna ba mboto ba iʼameʼegö tödö göi hadia nirasoi woʼomonia. (1 Timoteo 5:8) Sabölö moguna yaʼia daʼö itolo woʼomonia enaʼö lö tebulö tobali ia si fahuwu khö Yehowa. (Mataiʼo 4:4) Duma-dumania, fao ira na mangandrö hegöi na labaso Zura Niʼamoniʼö. Na ifalua daʼö foʼomo ira matua si fao faʼomasi, no irorogö wahuwusania khö Yehowa.—Baso 1 Fetero 3:7.

2. Hadia mene-mene Zura Niʼamoniʼö khö woʼomo ira alawe?

Imane Taromali Lowalangi khö woʼomo ira alawe, ”Sindruhu-ndruhu miʼoʼö li ndra matuami.” (Efeso 5:33) Hewisa wamaluania daʼö? Tola iʼangeragö hadia manö gamuata si sökhi nifalua woʼomonia ira matua hegöi faʼerege dödönia ba wombönökhi soguna khönia awö zoguna ba ndraonora. Ifosumange göi woʼomonia ira matua yaʼia na ituhini gangetula woʼomonia. Baero daʼö ihaogö na fahuhuo ia, lö fambara-mbara ia ba lö göi iʼailasi woʼomonia. Lö tola löʼö ifalua daʼö hewaʼae na tenga samosumange Yehowa woʼomonia.

3. Hewisa woʼomo ira matua hegöi foʼomo ira alawe ba wangaʼaroʼö fongambatöra?

Ifatunö khöda Sura Niʼamoniʼö wa niha si no mangowalu ”ha sambua boto ira”. (Mataiʼo 19:5) Eluahania, laforege wolawa si tola mangetuʼö fahuwusara. Börö daʼö, moguna asese fahuo-huo ira, lafaehagö nösi dödöra khö nawöra si fao faʼomasi. Tebai göi latehegö gofu hadia ia mazui gofu haniha baero Yehowa zabölö laʼofönaiʼö ba waʼaurira. Moguna göi mangelama ira enaʼö böi talafo ahatö ira ba niha böʼö moroi khö woʼomora samösa.

 ODÖDÖGÖ NASA WANGALUI

4. Yaʼami foʼomo ira matua—miʼomasiʼö woʼomomi ba mibönökhi zoguna khöra

5. Yaʼami foʼomo ira alawe—miʼomasiʼö ba mifosumange woʼomomi

Ibeʼe mene-mene Sura Niʼamoniʼö khö woʼomo ira alawe, enaʼö lafosumange woʼomora ira matua hewaʼae na tenga samosumange Yehowa woʼomora andrö. Baso 1 Fetero 3:1, 2, ba beʼe wanema li ba wanofu-nofu daʼa:

• Na tenga samosumange Yehowa woʼomomö ira matua, tatu omasi ndraʼugö na tobali ia samosumange Yehowa. Moloʼö yaʼugö, hadia lala sabölö sökhi ba wanolo yaʼia: hadia lö aetu ödunö-dunö khönia nösi Daromali Lowalangi mazui öforomaʼö khönia gamuata si sökhi ba öfosumange ia? Hadia mbörö wa öwaʼö zimanö?

Foʼomo ira matua hegöi ira alawe, tola fao ira ba wangai angetula si sökhi. Hizaʼi, itaria lö fao dödö ndra alawe ba gangetula nihalö woʼomonia  ira matua. Na simane daʼö zalua, moguna ihaogö wamaʼema bua wangera-ngerania si fao famosumange. Moguna itörö tödönia wa Yehowa zameʼe noro dödö khö woʼomo ira matua ba wangai angetula si sökhi ba nösi nomonia. Börö daʼö, moguna iforege woloʼö angetula nihalö woʼomonia. Na ifalua daʼö, no iʼasogö waʼomuso dödö ba nösi nomonia. Baso 1 Fetero 3:3-5, ba beʼe wanema li ba wanofu daʼa:

• Hewisa dödö Yehowa na so woʼomo ira alawe samosumange foʼomonia ira matua?

6. Tola öʼasiwai gabula dödö salua ba wongambatö

 RAHU-RAHU WAMAHAʼÖ

Tola lasöndra waʼohahau dödö si no mongambatö na faoma laʼomasiʼö nawöra, lafosumange ba lafalua goi-goi Zura Niʼamoniʼö ba waʼaurira.

Hadia Wamahaʼö si Tola Öhalö?

• Hadia nifalua woʼomo ira matua enaʼö so waʼohahau dödö ba wongambatönia?

• Hadia nifalua woʼomo ira alawe enaʼö so waʼohahau dödö ba wongambatönia?

• Na no mangowalu ndraʼugö, hadia goi-goi Zura Niʼamoniʼö sangaʼaroʼö fongambatömö?