Yesu zi tobali högö ba mbanua niha Keriso. (Efeso 5:23) Ba zorugo so ia iadaʼa, ba iʼogunaʼö ndra ’sawuyu si lö faröi ba satua-tua’ ba wameʼe fanuturu lala ba niha soloʼö khönia si so ba gulidanö. (Baso Mataiʼo 24:45.) Börö me Yesu zamataro yaʼira, andrö wa sinangea na yaʼira zangai angetula, hizaʼi lö tebulö laʼoʼö niwaʼö Keriso ba labönökhi zoguna ba wamati khö ndra talifusö Keriso. Haniha ”zawuyu si lö faröi ba satua-tua”? Hewisa zawuyu andrö wombönökhi soguna khöda?

1. Haniha ”zawuyu si lö faröi ba satua-tua”?

Iʼotarai mböröta, lö tebulö iʼogunaʼö Yehowa zi samösa ira matua mazui ngawawa ndra matua si lö atoto ba wameʼe fanuturu lala ba nono mbanuania. (Maleakhi 2:7; Heberaiʼo 1:1) Me no aefa mate Yesu, ira sinenge hegöi ira satua sokubaloi si so ba Yeruzalema zondröniaʼö banua niha Keriso. (Halöwö Zinenge 15:2) Simanö göi iadaʼa, so sambua ngawawa ndra satua sokubaloi si lö atoto, yaʼia daʼö Boto Solohe ndra Samaduhuʼö Yehowa. Yaʼira zameʼe gö ba wamati ba sanuturu lala ba halöwö fanuriaigö. Lafotöi ngawawa daʼa ’sawuyu si lö faröi ba satua-tua nifataro Yesu’. (Mataiʼo 24:45a) Fefu ndra Boto Solohe, yaʼira andrö niha Keriso si no tebayoini faoma eheha niʼamoniʼö. Yaʼira dania zi fao khö Keriso ba Wamatörönia ba zorugo na no laröi gulidanö.

2. Hadia gö wamati nihenaigö ndra sawuyu si lö faröi?

Ifatunö Yesu wa sawuyu si lö faröi andre dania ’zameʼe gö ndra niha Keriso maʼafefu ba ginötö si tefaudu’. (Mataiʼo 24:45b) Ö wamati nihenaigö ndra sawuyu andre yaʼia daʼö fanuturu lala moroi ba Daromali Lowalangi. Simane ö niʼada ero maʼökhö si tobali fangabölö mbotoda enaʼö lö mofökhö, simane daʼö göi gö ba wamati, tobali fanolo khöda enaʼö abölö ba lö faröi ita khö Yehowa ba tafalua halöwö nibeʼe Yesu khöda. (1 Timoteo 4:6) Tatema gö wamati ba gangowuloa ero migu, ba gangowuloa sebua ba zi sambua wilayah hegöi ba gangowuloa sebua ba zi sambua regional. No tehenaigö göi ia ba publikasi hegöi video si teʼodane-dane ba Zura Niʼamoniʼö enaʼö aboto ba dödöda gohitö dödö Lowalangi ba aro wahuwusada khönia.

 ODÖDÖGÖ NASA WANGALUI

3. Moguna muʼorganisasi nono mbanua Yehowa

Barö wanuturu lala nibeʼe Yesu, ira Boto Solohe laʼorganisasi halöwö nifalua ndra Samaduhuʼö Yehowa. Simane daʼö göi nifalua Yesu ba wameʼe fanuturu lala ba niha Keriso me götö siföföna. Futa VIDEO.

Baso 1 Korindro 14:33, 40, ba beʼe wanema li ba wanofu daʼa:

• Moroi ba ayati daʼö, hadia zangoromaʼö wa omasi Yehowa na toföfö nono mbanuania?

4. Ira sawuyu si lö faröi, laʼorganisasi halöwö fanuriaigö

Halöwö si tohude nifalua niha Keriso me götö siföföna yaʼia daʼö fanuriaigö. Baso Halöwö Zinenge 8:14, 25, ba beʼe wanema li ba wanofu-nofu daʼa:

• Haniha zameʼe fanuturu lala ba halöwö fanuriaigö me götö siföföna?

• Hewisa Wetero hegöi Yohane ba wanemaʼö fanuturu lala nibeʼe ndra sinenge tanö böʼö?

Fanuriaigö, daʼö halöwö sabölö tohude niʼameʼegö tödö ndra Boto Solohe ba wameʼe fanuturu lala. Futa VIDEO.

 Ifatunö Yesu wa moguna sibai halöwö fanuriaigö andrö. Baso Mareko 13:10, ba beʼe wanema li ba wanofu-nofu daʼa:

• Hana wa moguna sibai ba wamaigi ndra Boto Solohe halöwö fanuriaigö andrö?

• Hana wa moguna khöda wanolo moroi khö ndra ’sawuyu si lö faröi ba satua-tua’ ba woʼorganisasi halöwö nifalua ba zi sagörö ulidanö andre?

5. Sawuyu si lö faröi zameʼe fanuturu lala

Ira Boto Solohe zameʼe fanuturu lala khö ndra niha Keriso ba zi sagörö ulidanö. Börö daʼö, hewisa wangaʼira angetula ba wotatugöi hadia wanuturu lala nibeʼera khöda? Nehegö hewisa ndra boto solohe wamaluara daʼö me götö siföföna. Baso Halöwö Zinenge 15:1, 2, ba beʼe wanema li ba wanofu-nofu daʼa:

• Hadia gabula dödö salua ba niha Keriso me götö siföföna irege fatiti li ira?

• Ba wangasiwai abula dödö andrö, haʼökhö möi Waulo, Baranaba hegöi niha tanö böʼö ba wangandrö fanuturu lala?

Baso Halöwö Zinenge 15:12-18, 23-29, ba beʼe wanema li ba wanofu daʼa:

• Fatua lö lahalö gangetula, hadia nifalua ndra boto solohe me götö siföföna enaʼö latema wanuturu lala moroi khö Lowalangi?—Faigi ayati 12, 15, ba 28.

Baso Halöwö Zinenge 15:30, 31 hegöi 16:4, 5, ba beʼe wanema li ba wanofu-nofu daʼa:

• Me no latema wanuturu lala moroi khö ndra boto solohe, hadia nifalua ndra niha Keriso me götö siföföna?

• Hewisa wamahowuʼö Yehowa yaʼira me no laʼoʼö wanuturu lala andrö?

Baso 2 Timoteo 3:16 hegöi Yakobo 1:5, ba beʼe wanema li ba wanofu daʼa:

• Ba götöda andre, hewisa göi ndra Boto Solohe wangalui fanuturu lala moroi khö Lowalangi fatua lö lahalö gangetula?

 RAHU-RAHU WAMAHAʼÖ

Ira Boto Solohe yaʼia daʼö ’sawuyu si lö faröi ba satua-tua’ nifataro Keriso. Yaʼira zameʼe fanuturu lala hegöi ö ba wamati khö ndra niha Keriso si so ba zi sagörö ulidanö.

Hadia Wamahaʼö si Tola Öhalö?

• Haniha zamataro ’sawuyu si lö faröi ba satua-tua’?

• Hewisa ndra Boto Solohe ba wangaʼasogö soguna khöda?

• Hadia faduhu dödöu wa ira Boto Solohe andrö ’sawuyu si lö faröi ba satua-tua’?