Na so ita ba gotalua ndra talifusöda, tarasoi simane nirasoi Razo Dawido. Imane, ”Hawaʼasökhi ba ha lö omasiö na owulo zi fatalifusö si fao fahasara dödö!” (Sinunö 133:1) Lö alua manö wahasara dödö na lö börö-börö. Dozi ita moguna tarorogö wahasara dödö.

1. Hana wa no sahöli-höli dödö wahasara dödö nono mbanua Lowalangi?

Na möiʼö ba gangowuloa ndra Samaduhuʼö Yehowa ba mbanua tanö böʼö, te lö aboto ba dödöu li niʼogunaʼö ba daʼö. Hizaʼi, lö örasoi wa hulö ba danö zotanö so ndraʼugö. Hadia mbörö? Börö me fefu ita taʼogunaʼö publikasi si fagölö ba wamahaʼö yaʼita ba Zura Niʼamoniʼö. Baero daʼö, no taforege ba wangoromaʼö faʼomasi. Gofu hezo toröi ita ’taʼangaröfili döi Yehowa, ba hasara dödöda ba wamosumange yaʼia’.—Zefania 3:9, nisura ba gahe zura.

2. Hadia nifaluamö ba wondrorogö fahasara dödö?

Iʼamenesi ita Sura Niʼamoniʼö, ”Sindruhu-ndruhu faoma miʼomasiʼö nawömi soroi ba dödö.” (1 Fetero 1:22) Hewisa woloʼömö mene-mene daʼa? Böi osambuaʼö dödömö ba gamuatara si lö baga. Hizaʼi, osambuaʼö dödömö ba gamuata si sökhi niʼokhögöra. Baero daʼö, böi fariawö ndraʼugö ha ba niha si fagölö ohitö dödö khöu. Tandraigö fariawö khö ndra talifusöda si faböʼö-böʼö waö-waö waʼauri ba zilalö. Moguna göi taforege ba wangeheta ba dödöda wanahö-nahö dödö.—Baso 1 Fetero 2:17. a

3. Hadia nifaluamö na fatiti ndraʼugö khö zi samösa talifusöda?

Sindruhu sa, so khöda wahasara dödö, hizaʼi lö moʼahonoa ita. Itaria afatö dödö niha böʼö mazui afökhö dödöra tabeʼe. Andrö wa iʼamenesi ita Taromali Lowalangi, ”Böi tebulö . . . miʼefaʼö zala nawömi . . . simane fangefaʼö Yehowa salami soroi ba dödö, mifalua göi zimane daʼö.” (Baso Kolose 3:13.) Asese taʼafökhöiʼö dödö Yehowa. Hizaʼi, lö tebulö iʼefaʼö zalada. Omasi göi ia na lö mamalö taʼefaʼö zala ndra talifusöda. Na öʼila so zabao dödö niha böʼö khömö, alui lala ba wangasiwai daʼö enaʼö atulö ami.—Baso Mataiʼo 5:23, 24. b

 ODÖDÖGÖ NASA WANGALUI

4. Timbagö wanahö-nahö dödö

Omasi sibai ita wangomasiʼö ira talifusöda maʼafefu. Hizaʼi, te abua khöda fahuwu ba niha si faböʼö-böʼö waö-waö waʼauri moroi khöda. Hadia zi tola manolo yaʼita? Baso Halöwö Zinenge 10:34, 35, ba beʼe wanema li ba wanofu-nofu daʼa:

• Omasi Yehowa wanemaʼö fefu niha moroi ba ngawalö soi enaʼö tobali Samaduhuʼö khönia. Hewisa woloʼöu Yehowa ba ginötö fariawö ndraʼugö ba niha si faböʼö-böʼö waö-waö waʼauri moroi khömö?

• Hadia manö wanahö-nahö dödö sinangea ötimbagö sasese lafalua niha ba mbanua si toröi yaʼugö?

Baso 2 Korindro 6:11-13, ba beʼe wanema li ba wanofu daʼa:

• Moloʼö yaʼugö, hewisa enaʼö aro wahuwusamö khö ndra talifusöda si faböʼö waö-waö waʼauri moroi khömö?

5. Taʼefaʼö zala ndra talifusöda soroi ba dödö ba taforege enaʼö atulö ita khöra

Lö moguna khö Yehowa wangefaʼö sala moroi khöda. Hewaʼae simanö, lö tebulö iʼefaʼö zalada soroi ba dödönia. Baso Zinunö 86:5, ba beʼe wanema li ba wanofu-nofu daʼa:

• Moroi ba ayati daʼa, hadia wamahaʼö nihalöda sanandrösa khö Yehowa?

• Hana wa öʼandrö sibai saohagölö börö me lö mamalö iʼefaʼö zalamö Yehowa?

• Hadia manö zalua irege abua khöda ba wondrorogö faʼatulö ba niha böʼö?

Hewisa woloʼöda Yehowa hegöi ba wondrorogö fahasara dödö khö ndra talifusöda? Baso Gamaedola 19:11, ba beʼe wanema li ba wanofu-nofu daʼa:

• Na so zangafökhöiʼö tödömö, hadia nifaluamö enaʼö ifuli atulö ami?

 Itaria göi taʼafökhöiʼö dödö niha böʼö. Na simane daʼö zalua, hadia nifaluamö? Futa VIDEO, ba beʼe wanema li ba wanofu-nofu daʼa:

• Ba video andrö, hadia nifalua dalifusöda ira alawe enaʼö tola atulö ira?

 RAHU-RAHU WAMAHAʼÖ

Tola örorogö wahasara dödö ba mbanua niha Keriso na lö mamalö öʼefaʼö zala ndra talifusöda ba öʼomasiʼö ira.

Hadia Wamahaʼö si Tola Öhalö?

• Hewisa enaʼö lö khöu fanahö-nahö dödö?

• Hadia nifaluamö na no fatiti li ndraʼugö khö dalifusöda si sara lala wamati?

• Hana wa omasi ndraʼugö öʼoʼö duma-duma Yehowa si lö mamalö mangefaʼö sala?