FAMAHAʼÖ 57
Hewisa Na No Öfalua Horö Sebua?
Hewaʼae na no öʼomasiʼö Yehowa, ba sindruhu-ndruhu öforege enaʼö lö öfalua zi möi fangafökhö dödönia, hizaʼi itaria öfalua zala. So zala sabölö ebua moroi ba zala tanö böʼö. (1 Korindro 6:9, 10) Na no öfalua horö sebua, törö tödöu wa iʼomasiʼö nasa ndraʼugö Yehowa. Omasi ia iʼefaʼö zalamö ba itolo ndraʼugö.
1. Hadia zinangea tafalua enaʼö iʼefaʼö zalada Yehowa?
Abu sibai dödö niha sangomasiʼö Yehowa na no ifalua horö sebua. Hizaʼi terara dödönia na itörö tödönia mbuʼusa li Yehowa ba nono mbanuania: ”He no hulö ndro waʼoyo horömi, ba tobali afusi sibai hulö esi.” (Yesaya 1:18) Na sindruhu-ndruhu tafalalini gera-erada, hasambalö iʼefaʼö zalada Yehowa. Hewisa wangoromaʼöda wa no tafalalini gera-erada? Sindruhu-ndruhu taʼandrö waʼebolo dödönia ba zala si no tafalua ba taböhöli wamalua daʼö saʼae. Taʼandrö göi khö Yehowa enaʼö iʼefaʼö zalada. Aefa daʼö, taforege wolawa fangera-ngera hegöi si lö sökhi si toʼölö tafalua samarou yaʼita ba wamalua horö. Taʼodödögö göi woloʼö goi-goi satulö moroi khö Yehowa.—Baso Yesaya 55:6, 7.
2. Hewisa wangogunaʼö Yehowa ira satua sokubaloi ba wanolo yaʼita na no tafalua horö sebua?
Na no tafalua horö sebua, iʼandrö khöda Yehowa enaʼö ’taʼalui ndra satua sokubaloi ba mbanua niha Keriso’. (Baso Yakobo 5:14, 15.) Ira satua sokubaloi andre laʼomasiʼö Yehowa hegöi biri-birinia. No tebeʼe khöra wanuturu lala si tobali fanoloda enaʼö ifuli teʼatulöʼö wahuwusada khö Yehowa.—Galatia 6:1.
Hewisa ndra satua sokubaloi ba wanolo yaʼita na no tafalua horö sebua? So darua mazui datölu ndra satua sokubaloi, laʼogunaʼö ayati moroi ba Zura Niʼamoniʼö sangoromaʼö hadia mbörö wa fasala nifaluada andrö. Labeʼe göi wanuturu lala hegöi mene-mene enaʼö lö ifuli tafalua zala andrö. Na so zamalua horö sebua si lö mamalalini era-era, laheta ia ba mbanua niha Keriso ira satua sokubaloi enaʼö telumöʼö mbanua niha Keriso moroi ba gamuatania si lö sökhi andrö.
ODÖDÖGÖ NASA WANGALUI
Tatutunö dania hadia zanolo yaʼita enaʼö taʼameʼegö tödö wanolo nibeʼe Yehowa na no tafalua horö sebua.
3. Moguna tafatunö horö si no tafalua
Gofu hadia horö nifaluada, möi fangafökhö dödö Yehowa daʼö. Börö daʼö, moguna tafatunö khönia horö si no tafalua. Baso Zinunö 32:1-5, ba beʼe wanema li ba wanofu daʼa:
-
Na tafatunö khö Yehowa horö si no tafalua ba lö taforege waminiʼö horö andrö, hadia mbuania khöda?
Me no tafatunö khö Yehowa horö si no tafalua, moguna göi taʼandrö wanolo moroi khö ndra satua sokubaloi. Daʼö dania zameʼe khöda faʼahono dödö. Futa VIDEO, ba beʼe wanema li ba wanofu daʼa:
-
Ba video andrö, hewisa ndra satua sokubaloi ba wanolo Canon enaʼö mangawuli ia khö Yehowa?
Latolo ita ira satua sokubaloi. Börö daʼö, na fahuhuo ita khöra enaʼö soroi ba dödö ba böi tabiniʼö khöra zala si no tafalua. Baso Yakobo 5:16, ba beʼe wanema li ba wanofu daʼa:
-
Na lö falimo ita ba ginötö fahuhuo ita khö ndra satua sokubaloi, hadia mbörö wa aoha khöra ba wameʼe khöda fanolo?
Fatunö horö si no öfalua, böi biniʼö wangombakha khö ndra satua sokubaloi, ba tema wanolo moroi khö Yehowa sebua faʼomasi
4. Iforomaʼö waʼahakhö dödö Yehowa ba niha samalua horö
Na so zamalua horö sebua ba lö omasi ia iʼoʼö goi-goi Yehowa, muheta ia moroi ba mbanua niha Keriso ba lö saʼae fariawö ita khönia. Baso 1 Korindro 5:6, 11, ba beʼe wanema li ba wanofu daʼa:
-
Hulö simane ragi nifaruka ba hamo darigu, hadia lua-luania na fariawö niha si lö mamalalini era-era ba mbanua niha Keriso?
Iforomaʼö Yehowa waʼahakhö dödö ba niha samalua horö. Omasi göi ndra satua sokubaloi ba woloʼö duma-duma Yehowa andrö. Laforege ba wangalui hegöi ba wanolo niha samalua horö si no muheta ba mbanua niha Keriso. Ato niha si no muʼefasi ba mbanua niha Keriso, ba gafuriata lafuli ira. Hewaʼae afökhö na muheta zi samösa niha ba mbanua niha Keriso, hizaʼi daʼö zanolo yaʼira irege aboto ba dödöra wa fasala zi no lafalua.—Sinunö 141:5
Moroi ba nifalua Yehowa ba niha samalua horö, hezo oroma wa no iforomaʼö waʼahakhö dödö, falöfatandro, hegöi faʼomasi?
5. Iʼefaʼö zalada Yehowa na tafalalini gera-erada
So sambua gamaedola nitutunö Yesu sanolo yaʼita enaʼö taʼila hewisa dödö Yehowa ba ginötö ifalalini gera-erania si samösa niha. Baso Luka 15:1-7, ba beʼe wanema li ba wanofu daʼa:
-
Moroi ba gamaedola daʼö, hadia wamahaʼönia khöu sanandrösa khö Yehowa?
Baso Hezekieli 33:11, ba beʼe wanema li ba wanofu daʼa:
-
Hadia zi lö tola löʼö tafalua sangoromaʼö wa no tafalalini gera-erada?
Simane si samösa kubalo, iʼomasiʼö sibai nono mbiri-birinia Yehowa
SO ZANGUMAʼÖ: ”Ataʼudo ufatunö zalagu khö ndra satua sokubaloi, ma dania laʼefasi ndraʼo ba mbanua niha Keriso.”
-
Hadia öbeʼe fanema li na so zangumaʼö simane daʼö?
RAHU-RAHU WAMAHAʼÖ
Na no tafalua horö sebua, hizaʼi sindruhu-ndruhu maniasa ita ba tahalö gangetula wa lö saʼae tafalua zi lö sökhi andrö, hasambalö wa iʼefaʼö horöda Yehowa.
Hadia Wamahaʼö si Tola Öhalö?
-
Hadia mbuania na tafatunö khö Yehowa horö si no tafalua?
-
Hadia zinangea tafalua enaʼö teʼefaʼö horöda?
-
Na no tafalua horö sebua, hadia mbörö wa taʼandrö wanolo khö ndra satua sokubaloi?
ALUI NASA DANÖ BÖʼÖ
Faigi hewisa zi samösa ira matua wanemaʼönia faʼahakhö dödö Yehowa simane niwaʼö ba Yesaya 1:18.
Hadia gunania gamakhoita sanandrösa ba wangefasi?
”Mangoromaʼö Faʼomasi hegöi Faʼahakhö Dödö ba Niha Samalua Horö” (Manuriaigö, Baŵa si Walu 2024)
Baso atö hewisa wangoromaʼö faʼomasi hegöi faʼahakhö dödö ba niha samalua horö si lö mamalalini era-era
”Fanolo ba Niha Niheta ba Mbanua Niha Keriso” (Manuriaigö, Baŵa si Walu 2024)
Baso hewisa zi samösa ira matua si no mondröi sindruhu irasoi wa hulö no ifuli idöni ia Yehowa, tuhonia ”Hasambalö Ufuli Ndraʼo khö Yehowa”.
”Sura Niʼamoniʼö Zombulöʼö Faʼauri” (Menara Pengawal, 1 Mbaŵa si Öfa 2012)
Te Göi Adöni Dödöu
SASESE LASOFU NIHA
Hewisa Wamahaʼö Zura Niʼamoniʼö Nifaʼema Ndra Samaduhuʼö Yehowa?
Lö muʼandrö gefe ba program daʼa. Tola öʼogunaʼö gofu hadia manö wamoʼeluaha Zura Niʼamoniʼö somasiʼö. Tola göi ökaoni nawöu mazui ösi nomou ba wefao khöu.
