Lahalö gangetula ira niha Keriso sindruhu, wa lö latehegö gofu haniha mazui gofu hadia zi tola mamakiko fahuwusara khö Yehowa. Tatu örasoi göi zimane daʼö. Iʼameʼegö tödö sibai Yehowa waʼalöfaröi niforomaʼömö. (Baso 1 Ngaʼötö 28:9.) Hadia manö zalua si tola manandraigö faʼalöfaröimö khö Yehowa ba hadia zi tola manolo yaʼugö irege lö faröi ndraʼugö khönia?

1. Hadia nifalua niha böʼö ba wanandraigö faʼalöfaröida khö Yehowa?

So ösa niha sanaisi yaʼita enaʼö taböhöli wamosumange Yehowa. Duma-dumania, so ösa niha sondröi sindruhu laʼobousi organisasi Yehowa enaʼö awuwu wamatida. Mufotöi ira andre niha si no mondröi sindruhu. Baero daʼö, so ösa ndra sondröniaʼö ba agama lafaʼema gangombakhata si fasala sanandrösa khöda irege niha si lö mangelama tola manö laröi zindruhu. Börö daʼö, moguna mangelama ita enaʼö böi fabuʼa-buʼa ita khö ndra samadaö andrö. Böi tabaso mbuku mazui nisurara, böi tabokai situs web khöra mazui tafaigi video nifazökhira. Nehegö hadia niwaʼö Yesu sanandrösa ba niha sanaisi yaʼita enaʼö taböhöli wangai halöwö khö Yehowa: ”Böi mihalö fökhö högömi ira. Niha sauʼa ira, sanuturu lala ba nawöra sauʼa. Na iʼohe danga nawönia sauʼa awönia sauʼa, faoma aekhu ira ba goho-koho.”—Mataiʼo 15:14.

2. Hewisa gangetula nihalöda tobali tandra wa lö faröi ita khö Yehowa?

Börö me taʼomasiʼö Yehowa, lö omasi ita farahu ba agama sofaya ba ngawalö hadia ia. Ifangelama ita Yehowa, ”Miheta ami [moroi ba Mbabilona Sebua] yaʼami banuagu.” (Famaʼeleʼö 18:2, 4) Börö daʼö, moguna tatatugöi halöwö hegöi nifaluada enaʼö lö moʼamakhaita ia ba agama sofaya. Lö göi omasi ita fao ba organisasi soʼamakhaita ba agama sofaya.

 ODÖDÖGÖ NASA WANGALUI

3. Angelama khö ndra samahaʼö sofaya

Hewisa ita na tarongo wehede fangobousi sanandrösa ba organisasi Yehowa? Baso Gamaedola 14:15, ba beʼe wanema li ba wanofu daʼa:

• Hana wa tebai tafaduhusi tödö fefu duria nirongoda?

Baso 2 Yohane 9-11, ba beʼe wanema li ba wanofu-nofu daʼa:

• Hewisa zinangeania ita ba niha si no mondröi sindruhu?

• Hewaʼae lö si fahuhuo ita ba niha si no mondröi sindruhu, hewisa lalara ba wondrönisi tödöda enaʼö adöni dödöda ba wamahaʼöra?

• Moloʼö yaʼugö, hewisa dödö Yehowa na tafondrondrongo ngawalö zi lö sökhi nifaʼema niha si no mondröi sindruhu sanandrösa khö Yehowa hegöi organisasinia?

4. Böi faröi khö Lowalangi na so dalifusöda samalua horö sebua

Hewisa na taʼila so samösa dalifusöda ba mbanua niha Keriso samalua horö sebua? Hadia zinangea tafalua? Nehegö goi-goi moroi ba goroisa Lowalangi nibeʼenia ba ndraono Gizaraʼeli me föna. Baso 3 Moze 5:1.

Simane nifatunönia ba ayati daʼö, na so niʼilada dalifusöda samalua horö sebua, moguna tafatunö khö ndra satua sokubaloi. Hizaʼi, fatua lö tafalua daʼö, moguna taʼandrö khö dalifusöda andrö enaʼö iʼondrasi ndra satua sokubaloi ba ifatunö zala si no ifalua. Na tafalua daʼö, no taforomaʼö khönia waʼahakhö dödö. Na lö omasi ia iʼondrasi ndra satua sokubaloi, yaʼita zamatunö khö ndra satua sokubaloi hadia zi no ifalua andrö. Moroi ba nifaluada andrö, hewisa wangoromaʼöda wa taʼomasiʼö ba lö faröi ita . . .

• khö Lowalangi Yehowa?

• ba niha samalua horö andrö?

• khö ndra talifusöda ba mbanua niha Keriso?

 5. Heta ndraʼugö moroi ba Mbabilona Sebua

 RAHU-RAHU WAMAHAʼÖ

Enaʼö lö faröi ita khö Yehowa, böi fariawö ita ba niha somasi mamaelungu yaʼita.

Hadia Wamahaʼö si Tola Öhalö?

• Hana wa tebai tafondrondrongo niwaʼö niha si no mondröi sindruhu?

• Hadia zinangea tafalua na taʼila so samösa dalifusöda samalua horö sebua?

• Hewisa woloʼöda oroisa me iwaʼö miheta ami moroi ba agama sofaya?