Hadia nifaluau na so khöu wa’ata’u?​— Tola manö ö’alui bapamö mazui mamamö. Hiza’i, so danö bö’ö si tola manolo ya’ugö baero ira. Abölö ia moroi ba danö bö’ö. Ö’ila haniha ia?​— Atulö, ya’ia andrö Lowalangi Yehowa. Databaso waö-waö nono matua sotöi Dawido ba Zura Ni’amoni’ö. Faduhu dödönia wa lö aefa itolo ia Yehowa. Andrö lö fa’ata’u khö Dawido.

I’otarai ono sawuyu Dawido, no lafaha’ö ia satuania ba wangomasi’ö Yehowa. Andrö lö ata’u ia na so gameta’uö. I’ila wa si fahuwu khönia Yehowa, sanolo ya’ia. Samuza ma’ökhö, me ikubaloi mbiri-biri Dawido, so zingo sangoloi’ö biri-birinia! Hadia ö’ila hadia nifalua Dawido? Igohi zingo andrö ba ibunu hewa’ae lö fangönania! Aefa da’ö, me igohi mbiri-birinia berua, ibunu göi mberua andrö Dawido! Molo’ö ya’ugö, hana wa lö ata’u Dawido?​— Atulö, börö me itolo ia Yehowa.

Aefa da’ö, i’oroma’ö Dawido wa lö khönia fa’ata’u. Me fasuwö ndraono Gizara’eli ba ndrawa Wilisiti, so zaradadu ndrawa Wilisiti, niha sebua sibai boto! Töinia Goliato. Niha sebua boto andrö, i’o’aya Yehowa hegöi iraono Gizara’eli. I’andrö Goliato ena’ö lalawa ia iraono Gizara’eli. Hiza’i, ata’u ira wolawa ya’ia. Me irongo da’ö Dawido, imane khö Goliato, ’Ulawa ndra’ugö! Hasambalö itolodo Yehowa, ba kala ndra’ugö!’ Molo’ö ya’ugö, hadia da’ö nifotöi fa lö ata’u?​— Atulö, lö ata’u ia. Datafaigi hadia zalua aefa da’ö.

Ihalö ribo-ribo Dawido, mazui katafele, ba lima ngawua nono gara. Ba ihatö’ö ia khö Goliato. I’o’aya Dawido Goliato börö me ha iraono soyo bu ia. Imane Dawido, ’Ö’ondrasi ndra’o faoma si’öli ba toho, ba ya’o, ba döi Yehowa möido khöu!’ Aefa da’ö, ituyu sambua nono gara ba mbolania, ba iriboini Goliato, göna ba gangangonia!  Telögu Goliato ba danö ba mate! Ata’u fefu ndrawa Wilisiti ba moloi ira. Hana wa tola ikalaisi zebua moroi khönia Dawido?​— Börö me itolo ia Yehowa. Abölö nasa Yehowa moroi khö Goliato!

Hadia zi tobali famaha’ö khöda ba nifalua Dawido?​— Abölö Yehowa moroi ba danö bö’ö. Ba ya’ia, si fahuwu khöu. Andrö na ata’u ndra’ugö, itolo’ö Yehowa!