FAMAHA’Ö 7
Hadia no Irai Ata’u Ndra’ugö ba zi Ha Ya’ugö?
Faigi gambara nono side-ide da’a. Me lö awönia, hulö zata’u ia. Hadia no irai örasoi zimane da’ö?— Fefu niha no larasoi zimane da’ö. Idunö-dunö khöda Sura Ni’amoni’ö waö-waö zi fahuwu khö Yehowa si no irai ata’u me ha ya’i-ya’ira. Duma-dumania, Elia. Datafaha’ö ita ba zalua khönia.
Omasi Gizebela wamunu Elia
No ara auri Gelia fatua lö si tumbu Yesu. Ba danö ndraono Gizara’eli toröi ia. Gahabi razo me luo da’ö, lö ifosumange Yehowa. Ahabi ba fo’omonia Izebela, lafosumange nadu. Börö da’ö, ato ndraono Gizara’eli sanömba adu. Lö sökhi gamuata Gizebela. Ibunu fefu zamosumange Yehowa. Omasi göi ia ibunu Gelia! Hadia nifalua Gelia?—
Moloi Gelia! Möi ia ba danö si mate, ba ibini’ö ia ba dögi narö hili. Molo’ö ya’ugö, hana wa ibini’ö ia Elia?— Atulö, börö me ata’u ia. Si ndruhunia lö moguna ata’u Gelia, börö me i’ila itolo ia Yehowa. No irai iforoma’ö Yehowa wa’abölönia khö Gelia. Duma-dumania, ibe’e galitö moroi ba zorugo me i’andrö khönia Elia. Iada’a, hasambalö itolo Gelia Yehowa!
Hewisa lala Yehowa ba wanolo Elia?
Me so Gelia ba dögi narö hili, isofu khönia Yehowa, ”Hadia nihalöu ba da’e Elia?” Imane Elia, ’Hatö ya’odo zamosumange ya’ugö. Ba ata’u ndra’o na labunudo.’ Iwalingagö no ahori labunu fefu zamosumange Yehowa Elia. I’abe’e’ö dödönia Yehowa, ’Lö’ö, so nasa 7.000 niha tö zamosumange ya’o. Böi ata’ufi. So halöwö tanö bö’ö zinangea öfalua!’ Molo’ö ya’ugö, hadia omuso dödö Gelia wamondrongo da’ö?—
Hadia zi tobali famaha’ö khöu ba waö-waö Gelia andrö?— Lö moguna so ba dödöu wa ha ya’u-ya’ugö irege ata’u’ö. So nawöu sangomasi’ö Yehowa ba sangomasi’ö ya’ugö göi. Baero da’ö, abölö Yehowa moroi ba danö bö’ö fefu, ba itolo ndra’ugö! Si ndruhunia, tenga ha ya’u-ya’ugö. Hadia omuso dödöu wamondrongo da’ö?—
