FAMAHA’Ö 1
Omuso Dödöda Na Ta’ila Huhuo si Tobini
Hadia no irai örongo huhuo si tobini?— * So huhuo si tobini ba Zura Ni’amoni’ö. Töinia ”si tobini ni’amoni’ö”. Lafotöi ia si tobini börö me samösa lö sangila ba mböröta. Ba lafotöi ia ni’amoni’ö, börö me moroi khö Lowalangi. Omasi ndra mala’ika la’ila hadia huhuo so tobini andrö. Hadia omasi ndra’ugö ö’ila göi?—
Molo’ö ya’ugö, hadia zomasi la’ila ira mala’ika?
Ba götö meföna, ifazökhi Lowalangi ndra matua ba ira alawe si föföna. Töira Adamo ba Khawa. Tebe’e khöra nahia si sökhi nifotöi Kabu Edena. Na la’o’ö li Lowalangi, ya’ira ba nga’ötöra tola labali’ö faradaiso si sökhi zi sagörö ulidanö. Ba ba da’ö monahia ira. Hiza’i, hadia nifalua Gadamo ba Khawa?—
Lö la’o’ö li Lowalangi ira Adamo ba Khawa. Andrö wa tenga ba Waradaiso so ita iada’a. Hiza’i, imane Lowalangi, ifuli ifazökhi gulidanö andre dania simane Faradaiso, ba fefu niha sauri ba da’ö ohahau dödöra. Hewisa wamalua Lowalangi da’ö? Ngahönö fakhe ba zilalö samösa lö sangila fanema li, börö me lö ni’ombakha’ö nasa.
Me möi Yesu ba gulidanö, no ifatunö huhuo si tobini andrö ba niha bö’ö. Imane, famatörö Lowalangi dania zombali’ö ulidanö andre tobali Faradaiso. Andrö wa ifarou ita Yesu ba wo’angandröi Banua Lowalangi ena’ö alio tohare.
Hadia omuso dödöu me no ö’ila huhuo si tobini andrö?— Böi olifu’ögö, ha niha solo’ö khö Lowalangi zi tola auri ba Waradaiso. Oya waö-waö wa’auri zolo’ö khö Lowalangi nidunö-dunö ba Zura Ni’amoni’ö. Hadia omasi’ö ö’ila waö-waö wa’aurira?— Datafaigi haniha manö ira ba hewisa lalada ba wolo’ö amuatara.
BASO BA ZURA NI’AMONI’Ö
^ par. 3 Ero sambua famaha’ö, labe’e dandra simane da’a (—) na no aefa wanofu. Eluahania, ibatogö huhuonia satua ena’ö tola latema li iraono.
