FAMAHA’Ö 12
Ono Mbene’ö Waulo si Lö Fa’ata’u
Iada’a, datafaha’ö ita khö nono matua sanolo sibayania. Töi zibayania ya’ia da’ö Faulo. Lö ta’ila haniha döi nono matua andrö. Hiza’i, faduhu dödöda wa ya’ia andrö niha si lö fa’ata’u. Omasi’ö ö’ila hadia nifaluania?—
Labe’e ba gurunga Waulo ba Yeruzalema, börö me idunö-dunö waö-waö Yesu. So niha si lö sökhi si fatiu tödö khönia. Mamagölö ira, lamane, ’Data’andrö khö gumandra ena’ö la’ohe Waulo ba rafe mahemolu. Ba tatarogö ia ba lala ba wamunu ya’ia!’
Ifatunö khö Waulo ono mbene’önia hegöi khö gumandra huhuo niha sedöna mamunu Faulo
No irongo ono mbene’ö Waulo huhuora andrö. Hadia nifaluania? Möi ia ba gurunga ba wangombakha khö Waulo. Ifatenge ia Faulo ba wangombakha khö gumandra huhuo nirongonia sanandrösa ba wamunu Faulo. Molo’ö ya’ugö, hadia aoha khö nono mbene’ö Waulo wangombakha da’ö?— Lö’ö, börö me kumandra andrö niha sebua faka. Hiza’i, lö ata’u nono mbene’ö Waulo fahuhuo khönia.
Me irongo da’ö kumandra, i’anemai ifatenge 500 zaradadunia bongi da’ö ba wolohe Faulo ba Kaizaria. Hadia mate Waulo?— Lö’ö, börö lö lalara wamunu ya’ia! Lö alua ni’era-erara.
Hadia zi tobali famaha’ö khöu ba zalua andre?— Tola lö khöu fa’ata’u simane ono mbene’ö Waulo. Lö moguna ata’u ita wanutunö sanandrösa khö Yehowa. Hadia omasi’ö zimane ono matua si lö ata’u wamatunö sanandrösa khö Yehowa?— Na lö khöu fa’ata’u, tola te’orifi niha bö’ö.
