FAMAHA’Ö 3
Mamati Rakhaba khö Yehowa
Khalaigö atö na so ndra’ugö ba Yerikho, ba danö Gana’ana. So ndra’ugö ba gotalua niha si lö mamati khö Yehowa. So samösa ndra alawe sotöi Rakhaba, si toröi ba mbanua andrö.
I’otarai me’ide-ide Rakhaba, no irongo-irongo waö-waö ndraono Gizara’eli. Duma-dumania, me i’ohe ndraono Gizara’eli Moze moroi ba danö Miserai ba la’ötö Nasi Soyo. No irongo göi me ifemöna ndraono Gizara’eli Yehowa ba wasuwöta. Iada’a, no irongo wa no lafasui Yerikho iraono Gizara’eli!
Ibini’ö zamauze andrö Rakhaba börö me mamati ia khö Yehowa
Me ba zi bongi, möi darua ndraono Gizara’eli mamauze Yerikho ba wamaigi hewisa mbanua andrö. Larugi nomo Rakhaba, ba ifa’amöi ira yomo. Ba da’ö mörö ira. Irongo Razo Yerikho bongi da’ö wa so zamauze banuania, ba ba nomo Rakhaba so ira. Ifatenge ngoni-ngoninia Razo Yerikho ba wondra’u ya’ira. Ba ibini’ö zamauze andrö Rakhaba ba dete nomonia. Aefa da’ö, imane khö ngoni-ngoni razo andrö, ’Duhu no möi ira khögu mege, ba iada’a no mofanö ira. Na migohi ira iada’a, hasambalö mikhamö!’ Molo’ö ya’ugö, hana wa ibini’ö zamauze andrö Rakhaba?— Börö me mamati ia khö Yehowa ba faduhu dödönia wa ibe’e danö Gana’ana ba ndraono Gizara’eli.
Fatua lö mofanö zamauze andrö moroi ba nomo Rakhaba, lafabu’u khönia wa la’orifi ia hegöi ösi nomonia na lasuwö Yerikho dania. Hiza’i, so sambua ni’andröra khö Rakhaba. Ö’ila hadia da’ö?— Lamane, ’Ötawi zinali soyo andre ba zandrelau. Na öfalua da’ö, te’orifi fefu zi so ba nomou.’ Ba i’o’ö Rakhaba da’ö. Hadia zalua aefa da’ö?—
I’orifi Rakhaba Yehowa awö nösi nomonia
Lö ara aefa da’ö, lö nini-ninira ba lafasui Yerikho iraono Gizara’eli. Lafasui mbanua andrö sakali ma’ökhö, önö ngaluo wa’ara. Hiza’i, ba ngaluo si fitu, lafasui mbanua andrö fitu kali. Aefa da’ö, la’ebua’ö lira we’ao. I’anemai’ö adudu göli kara ba Yerikho ibe’e Yehowa. Hiza’i, lö adudu nomo si so zinali soyo andrö. Hezo nomonia ba gambara andre?— Te’orifi Rakhaba awö nösi nomonia!
Hadia zi tobali famaha’ö khöu moroi ba waö-waö Rakhaba andre?— Mamati Rakhaba khö Yehowa börö me no irongo wa’abölö Yehowa. Öfaha’ö göi ndra’ugö iada’a sanandrösa ba wa’abölö Yehowa. Mamati göi ndra’ugö khö Yehowa lö?— Baga da’ö!
