FAMAHA’Ö 2
Omasi Rebeka Wangomusoi’ö Tödö Yehowa
Rebeka, ira alawe sangomasi’ö Yehowa. Töi wo’omonia Iza’aki, sangomasi’ö Yehowa. Hamega falukha Giza’aki khö Rebeka? Hadia dandra wa i’omusoi’ö dödö Yehowa? Databaso waö-waönia.
Iza’aki ono Gaberahamo ba Sara’i. Ba danö Gana’ana toröi ira, ba gotalua niha si lö mamosumange Yehowa. Andrö wa lö omasi Gaberahamo na mangowalu Giza’aki ba Ndrawa Gana’ana. I’o’ou zawuyunia sotöi Eliezeri we’amöi ba Harana ba zi so talifusönia, ba wangalui ono alawe fo’omo Giza’aki.
Ifangörö-ngörö ia Rebeka wana’u idanö ö gondra
Mofanö ndra Eliezeri faoma sawuyu tanö bö’ö. Aröu danö la’ofanöi. La’ohe fulu nga’eu gondra ba wonoro gama-gamara awö mbualara. Hewisa ena’ö i’ila Geliezeri haniha nono alawe si sökhi bua-bua si tobali fo’omo Giza’aki? Molombase ira ba Harana ba ngai mba’a, börö me la’ila wa ato niha sana’u idanö ba da’ö. Ba mangandrö Geliezeri khö Yehowa imane, ’Ba na u’andrö dania nidanö khö nono alawe sana’u idanö, ba na ibe’e ögu nidanö ba ö gondragu göi, da’ö nono alawe nihonogöimö khö genoniu Iza’aki.’
Lö ara aefa da’ö, möi Rebeka ba mba’a andrö. Si sökhi bawa ia iwa’ö Sura Ni’amoni’ö. I’andrö khönia nidanö Eliezeri, ba imane ono alawe andrö, ’Lau, badu tua. Da uta’u-ta’u göi ö gondra khöu.’ Khalaigö atö! Ogoya sibai mamadu idanö gondra, ba ifangörö-ngörö ia Rebeka ba wana’u idanö öra. Faigi atö gambara andre. Owölö-ölö sibai ia lö?— Omuso sibai dödö Geliezeri me no ifondro-ndrongo wangandrönia Yehowa.
Aefa da’ö, ibe’e mbuala Eliezeri khö Rebeka, ba i’ohe ira Rebeka ba nomo ena’ö falukha khö ndra talifusönia. Ifatunö Eliezeri hana wa möi ira ba Harana. Aefa da’ö imane, Rebeka andre nifili Yehowa tobali fo’omo Giza’aki. Omuso dödö nösi nomo Rebeka ba latehegö mangowalu ia khö Giza’aki.
Fao Rebeka khö Geliezeri ba danö Gana’ana, ba mangowalu ia khö Giza’aki
Molo’ö ya’ugö, hadia omasi Rebeka mangowalu khö Giza’aki?— I’ila Rebeka wa Yehowa zanuturu lala khö Geliezeri. Andrö, me lasofu khö Rebeka ira talifusönia hadia edöna möi ia ba Gana’ana ba mangowalu khö Giza’aki, itema li, ’E, edönado’. Ba mofanö Rebeka fao ia khö Geliezeri. Me no larugi danö Kana’ana, mangowalu Rebeka khö Giza’aki.
Börö me i’omusoi’ö dödö Yehowa Rebeka, ifahowu’ö ia Yehowa. Andrö, ba nga’ötönia tumbu Yesu! Na ö’omusoi’ö dödö Yehowa simane Rebeka, ifahowu’ö ndra’ugö Yehowa.
