Ba gosali toröi Zamueli me’ide-ide ia ba wangai halöwö Lowalangi. Osali ya’ia da’ö nahia ba wamosumange Yehowa. Ö’ila hadia mbörö wa toröi Zamueli ba da’ö? Si’oföna datafaigi ua waö-waö Hana, ina Zamueli.

Omasi sibai Hana na so nononia, hiza’i, lö mo’ono ia. Mangandrö ia khö Yehowa. Ifabu’u na ibe’e khönia nono, itehegö toröi ba gosali ba wangai halöwö Lowalangi. Ifondro-ndrongo wangandrönia Yehowa, ba tumbu khönia nono ibe’e töi Samueli. Ifalua zi no ifabu’u Hana. I’ohe Zamueli ba gosali me no tölu mazui öfa fakhe ndröfinia ba wangai halöwö Yehowa.

Ere sebua Eli me luo da’ö ba gosali. Ere göi nononia si dombua. Börö me osali andrö nahia wamosumange Lowalangi, sinangea na sohalöwö ba da’ö niha si sökhi bua-bua. Hiza’i, lö sökhi gamuata nono Eli. I’ila-ila gamuatara andrö Samueli. Hadia igo’ö-go’ö Samueli gamuatara andrö?​— Lö’ö, lö tebulö ono si sökhi ia, i’o’ö wamaha’ö zatuania.

Molo’ö ya’ugö, hadia zinangea ifalua Eli ba ndraononia?​— Sinangea na ihuku ira Eli ba lö itehe tobali ira ere ba nomo Yehowa. Hiza’i, lö ifalua da’ö Eli. Andrö mofönu Yehowa khö Eli ba khö ndraononia, ihuku ira fefu Yehowa.

Samuza inötö ba zibongi me no mörö Zamueli, irongo so zi’ao khönia, ”He Samueli!” Ba möi Zamueli khö Eli. Imane khönia Eli, ”Lö si’aodo khöu.” Tölu kali alua zimane da’ö. Me ifuli möi Zamueli ba zi medölu kali khö Eli, imane khönia Eli na so zi’ao khöu dania ba ötema linia ömane, ”Hede Yehowa! Irongo enoniu.” Ifalua da’ö Samueli. Imane Yehowa khö Zamueli, ’Wa’ö khö Eli wa no u’etu’ö huku zi sambua omo andrö khönia börö me lö sökhi gamuatara.’ Molo’ö ya’ugö, hadia aoha wangombakha turia da’ö khö Eli?​— Abua  wamalua da’ö khö Zamueli. Ata’u ia wangombakha khö Eli. Hewa’ae simanö, i’o’ö niwa’ö Yehowa. Alua zi no iwa’ö Yehowa, mate Eli ba ononia si darua.

No ibe’e khöda duma-duma si sökhi Samueli. Lö tebulö wa’asökhi gamuatania hewa’ae no so ia ba gotalua ndraono si lö sökhi amuata. Hewisa na ya’ugö zimanö? Omasi ndra’ugö simane Samueli? Na ö’o’ö zimane amuatania, omuso dödö Yehowa hegöi satuau.