FAMAHA’Ö 11
Lasura Waö-Waö Wa’auri Yesu
Hadia ö’ila haniha zi so ba gambara andre?— Töira ya’ia da’ö, Matai’o, Mareko, Luka, Yohane, Fetero, Yakobo, Yuda, ba Faulo. Ba götö Yesu auri ira, ba ya’ira zanura waö-waö wa’auri Yesu ba Zura Ni’amoni’ö. Datafaha’ö ita ba zanura waö-waö Yesu andre.
Hadia zi no aboto ba dödöu khö ndra niha da’a?
Datölu ba gotalua zanura Sura Ni’amoni’ö andre zi no irai fao khö Yesu ba wanuriaigö. Haniha döira?— Matai’o, Yohane, ba Fetero. Matai’o faoma Yohane zabölö fahuwu khö Yesu, ba faoma lasura waö-waö wa’aurinia. Yohane zanura buku Wama’ele’ö, hegöi buku I Yohane, II Yohane, III Yohane. Fetero zanura buku I Fetero ba II Fetero. Isura Fetero ba zurania si mendrua wa no irai fahuhuo Yehowa khö Yesu moroi ba zorugo imane, ’Onogu da’ö, ono omasi’ögu.’
Baero ira, so nasa niha bö’ö sanura waö-waö wa’auri Yesu ba gambara andre. Ya’ia da’ö Mareko. I’ila Mareko hadia zalua me lara’u Yesu börö me so ia ba da’ö. Tanö bö’ö ya’ia da’ö Luka. Ya’ia andre doto. Te awena tobali ia niha Keriso me no mate Yesu.
Daruatö danö bö’ö sanura waö-waö Yesu si so ba gambara andre ya’ia da’ö akhi Yesu. Haniha döira?— Yakobo ba Yuda. Lö faduhu dödöra khö Yesu ba wamobörö, lamane owöhö Yesu. Tobali ba gafuriata, awena mamati ira khö Yesu ba la’o’ö ia.
Safuria zanura waö-waö Yesu ni’ilamö ba gambara andre ya’ia da’ö Faulo. Fatua lö tobali ia niha Keriso, Saulo döinia. Fatuwu sibai ia niha Keriso, igohi-gohi ira. Hadia ö’ila hana wa tobali niha Keriso Waulo?— Samuza ma’ökhö, möi Waulo ba mbanua Ndramaseko. Ba zi lö mudöna-döna so zihede moroi ba zorugo. Ya’ia da’ö Yesu! Imane khö Waulo, ’Hana wa ögohi-gohi zolo’ö khögu?’ Me no aefa alua da’ö, ifalalini gera-erania Faulo tobali ia niha Keriso. 14 ngawua mbuku nisura Waulo i’otarai mbuku Roma irugi mbuku Heberai’o.
Ero ma’ökhö tabaso Zura Ni’amoni’ö lö?— Na tabaso Zura Ni’amoni’ö, ta’ila waö-waö wa’auri Yesu. Hadia omasi’ö ö’ila nasa sanandrösa ba wa’auri Yesu?—
