So niha si lö omasi na tadunö-dunö khöra sanandrösa khö Yehowa. La’o’aya ita ba mofönu ira khöda. Da’ö wa tola ata’u ita wamatunö sanandrösa khö Yehowa. Hadia no irai örasoi zimane da’ö?​— So waö-waö nono matua si bohou ebua sotöi Yeremia nidunö-dunö ba Zura Ni’amoni’ö. I’omasi’ö sibai Yehowa, hiza’i, no irai arakhagö ibato wamatunö Taromali Yehowa. Databaso waö-waönia.

Me awuyu-wuyu Yeremia, i’o’ou ia Yehowa ba wamangelama niha ena’ö labato wamalua si lö sökhi. Abua khö Yeremia wamalua da’ö. Ba ata’u ia. Imane khö Yehowa, ”Lö u’ila fahuhuo, me iraono na ndra’odo.” Ba imane  khönia Yehowa, ”Böi ata’ufi ira, utolo ndra’ugö.”

Ibörötaigö ifangelama niha Yeremia, na lö lafalalini gera-erara ba tehuku ira. Molo’ö ya’ugö, hadia la’o’ö niwa’ö Yeremia niha andrö?​— Lö’ö. La’o’aya ia, ba mofönu ira khönia. So göi zomasi mamunu ya’ia! Molo’ö ya’ugö, hewisa dödö Yeremia meluo da’ö?​— Ata’u sibai ia. Imane, ’Lö ufa’ema sa’e niwa’ö Yehowa.’ Hadia si ndruhu-ndruhu ibato wama’ema niwa’ö Lowalangi?​— Lö’ö, lö ibato. I’omasi’ö sibai Yehowa, andrö wa lö ibato wamatunö oroisa Yehowa. Börö da’ö, ilumö’ö ia Yehowa.

Duma-dumania, so niha si lö sökhi sanibo’ö Yeremia ba dögi si so tambu. Lö labe’e gönia ba lö labe’e önia nidanö. Laröi manö Yeremia ba da’ö ena’ö mate ia. Hiza’i, itolo ia Yehowa, lö mate ia!

Hadia zi tobali famaha’ö khöu ba waö-waö Yeremia andre?​— Hewa’ae ata’u Yeremia, lö ibato wamatunö Taromali Yehowa. Tola göi öfalua zimane da’ö. So zango’aya ya’ugö ba sofönu khöu na öfatunö Daromali Yehowa irege aila ba ata’u ndra’ugö. Tobali, böi bato wanuriaigö. Itolo ndra’ugö Yehowa simane fanolonia Yeremia.