FAMAHA’Ö 10
Lö Tebulö Wolo’ö Yesu
Hadia lö tebulö ö’o’ö li zatuamö?— Itaria abua wolo’ö li zatua. Hadia ö’ila wa lö tebulö wolo’ö Yesu li Yehowa hegöi satuania ba gulidanö?— Na öbaso waö-waö Yesu, hasambalö ö’o’ö li zatuau hewa’ae afökhö. Iada’a, databaso waö-waönia.
Ba zorugo toröi Yesu khö Namania Yehowa fatua lö möi ia ba gulidanö. Me so ia ba gulidanö, so göi zatuania sotöi Yosefo ba Maria. Hewisa wa tola tobali ira satua Yesu?—
Megenia ba zorugo so Yesu, aefa da’ö tefawu’a wa’aurinia ba dalu Maria. Andrö wa tola tumbu ia ba gulidanö. Ha Yehowa zi tola mamalua simane da’ö! Itugu tedou wa’ebua Yesu ba dalu Maria, hulö simane ono sawuyu tanö bö’ö ba dalu ninania. Me no irugi siŵa waŵa, tumbu Yesu. Simanö waö-waönia wa tola tobali satua Yesu Maria ba Yosefo.
Yesu, i’omasi’ö sibai Namania sotöi Yehowa. Iforoma’ö wa’omasinia andrö me 12 fakhe ia, me möi ira fefu ba Yeruzalema ba wamalua gowasa Fasa. Aröu danö latörö. Me so ndra satuania ba lala ba wangawuli, awena la’ila wa lö Yesu ba gotaluara. Molo’ö ya’ugö, hezoso so Yesu?—
Hadia nifalua Yesu ba gosali?
La’anemai mangawuli ira Yosefo ba Maria ba Yeruzalema ba wangalui Yesu. Abu sibai dödöra me lö la’ila hezo so Yesu. Tölu ngaluo aefa da’ö awena lasöndra Yesu. Ba gosali so ia! Hadia halöwö Yesu ba da’ö?— Ifaha’ö ia sanandrösa khö Namania, Yehowa. I’omasi’ö sibai Yehowa, andrö i’alui lala ba wangomusoi’ö tödö Namania. Me no ebua ia, lö tebulö i’o’ö li Yehowa, hewa’ae afökhö, ba itörö wamakao. Hadia Yesu andrö i’o’ö göi li ndra Yosefo ba Maria?— I’o’ö, simane niwa’ö Zura Ni’amoni’ö.
Hadia zi tola ö’o’ö ba nifalua Yesu?— O’ö li zatuau, hewa’ae afökhö. Hadia omasi’ö ö’o’ö lira?—
