ARAKHAGÖ 350 fakhe me no aefa Anönö Danö Idanö ba götö Noakhi. So samösa niha samati sotöi Aberahamo niha si kayo si toröi ba mbanua Guri, banua da’ö lafotöi ia iada’a Irak. Aberahamo andre sebua famati khö Lowalangi. Iada’a tetandraigö wamatinia.

Iwa’ö Yehowa khö Gaberahamo ena’ö iröi mbanua si tumbu ya’ia, isawa mbanua Kana’ana. I’o’ö Aberahamo wehede Lowalangi. I’ohe zoroi yomonia, fo’omonia Sara’i, ba Loti ono dalifusönia. Me no aröu lala latörö, larugi danö Kana’ana ifazökhi nosenia ba da’ö. Fawu’u li Yehowa khö Gaberahamo wa tobali ia dania soi sebua, ba tefahowu’ö fefu nga’ötönia ba ya’ira zangokhögö tanö Kana’ana.

Itugu tedou manö gokhöta Gaberahamo faoma Loti, börö me itugu oya guriföra. Aberahamo tenga ha tana khönia ni’era-erania. Iwa’ö khö Loti, faigi hezo mbanua somasi’ö. Ituyu khönia Loti mbanua Yoridano satabö sinanö ba soya idanö, sahatö ba mbanua Zodoma. Niha Zodoma andrö—sebua horö föna Yehowa.

Ifuli ifaduhu’ö Yehowa khö Gaberahamo, wa simane fa’oya ndröfi ba dalu mbanua wa’oya nga’ötönia. Mamati Gaberahamo ba nifabu’u Yehowa. Hiza’i, fo’omo Gaberahamo ni’omasi’önia sotöi Sara’i, lö so’ono. Me no 99 fakhe ndröfi Gaberahamo ba lö aratö 90 fakhe ndröfi Zara’i, imane Lowalangi tumbu dania nono matua khö Gaberahamo ba khö Zara’i. Itörö niwa’ö Lowalangi, mo’ono Zara’i, ya’ia da’ö Iza’aki. Ba tumbu nasa ndraono tanö bö’ö khö Gaberahamo, tobali, moroi ba nga’ötö Giza’aki tumbu dania Zangefa’ö andrö si no tefabu’u ba kabu Edena.

Loti ba soroi yomonia toröi ba mbanua Zodoma. Loti niha satulö tödö, tenga simane niha Zodoma sebua horö föna Lowalangi. Me ihalö gangetula Yehowa ba wamakiko Sodoma, ifatenge mala’ikania khö Loti ba wamangelama ya’ia wa hasambalö alua wamakiko andrö. Lafangaösö Loti ba soroi yomonia ira mala’ika andrö ena’ö moloi ira laröi Zodoma ba tebai lafaigi furi. I’ekhugö Lowalangi dalö balera ba alitö ba mbanua Zodoma ba Gomora, irugi tehori niha ba mbanua andrö. Te’orifi Loti ba ononia alawe si darua. Hiza’i, ifaigi furi fo’omo Loti börö me no toröi dödönia ba harato. Lua-luania, tobali ia kara mo’asio.

​—Te’odane-dane ba I Moze 11:10-19:38.