HADIA zalua na fefu soi la’o’ö gamakhoita Yehowa Razo si lö tebulö? Tola ta’ila wanema li ba wamatörö Razo Selomo si 40 fakhe.

Fatua lö mate Dawido, ifataro nononia Selomo tobali fangalinia ba wa’arazo. Ba wangifi, isofu Lowalangi khö Zelomo hadia ni’andrönia. I’andrö wa’atua-tua Selomo ba fa’aboto ba dödö ena’ö atulö wanguhukunia iraono Gizara’eli. Omuso dödö Yehowa, ibe’e khö Zelomo dödö satua-tua ba fa’aboto ba dödö. Ifabu’u khönia Yehowa wa ibe’e gokhöta khö Zelomo, lakhömi, ba fa’anau noso asala lö faröi ia khö Lowalangi.

Tehöngö Zelomo börö wa’atua-tuania ba wanguhuku. Samuza inötö, darua ndra alawe samadöni samösa nono sawuyu ono matua, faoma lamane onogu da’ö. Imane Selomo ena’ö labagi dalu nono andrö, tambai zamösa ira. Fao dödö ndra alawe si oföna, tobali si ndruhu nina nono andrö lö fao dödönia, i’andrö ena’ö labe’e nono andrö khö ndra alawe si oföna. Ba da’ö i’ila Selomo haniha zi ndruhu nina nono andrö börö me so khönia wa’ahakhö dödö, lahalö nono ba labe’e khönia. Me larongo iraono Gizara’eli gangetula nihalö Zelomo, aboto ba dödöra wa so wa’atua-tua Lowalangi khö Zelomo.

Sambua halöwö sebua si no ifalua Selomo ya’ia da’ö me ifazökhi gosali Yehowa—si so ba Yeruzalema nahia ndraono Gizara’eli ba wamosumange Lowalangi. Me la’amoni’ö gosali andrö, mangandrö Zelomo, ”Hiza, lö itaha ia sorugo ba fondrege zorugo, ba he moroi itaha ia osali andrö, nilaugu?”​—I Razo 8:27.

Tehöngö wa’atua-tua Zelomo ba soi tanö bö’ö, irugi khö Razo Zaba ira alawe si so ba soi Arab. Möi ia ba wamaigi lakhömi ba fa’ebua gana’a Zelomo, ba möi ia wanandraigö fa’atua-tua Zelomo. Ahöli dödö razo Zaba wa’atua-tua Zelomo ba fa’ebua gana’ania, irege isuno Yehowa börö me no ifili razo safönu fa’atua-tua andrö. Si ndruhunia, börö howu-howu Yehowa wa tola mo’ana’a ndraono Gizara’eli ba so khöra wa’ohahau dödö sagötö famatörö Zelomo.

Alimagö sibai, lö anau gölö Zelomo ba wamalua somasi Yehowa. I’osiwawöi goroisa Lowalangi, ngaotu ndra alawe si tobali fo’omonia, ato ba gotaluara zamosumange adu. Arara manö, ladönisi dödönia fo’omonia ba wanömba adu irege i’erogö Yehowa. I’ombakha’ö khö Zelomo Yehowa wa tebagi wamatörönia. Imane Yehowa, so ösa zi fao khönia moroi ba nösi nomonia, börö gamabu’ula linia khö Dawido, ama Zelomo. Hewa’ae faröi Zelomo, ba lö faröi Yehowa ba gamabu’ula linia khö Dawido, sanandrösa ba Wamatörö.

​—Te’odane-dane I Razo faza 1 irugi 11; II  Nga’ötö faza 1 irugi 9; V Moze 17:17.