FAOSATÖ 14
Fahuhuo Lowalangi I’odela Ndra Sama’ele’ö Khönia
Ifataro ndra sama’ele’ö Yehowa ba wanuriaigö fanguhuku, sumange satulö, ba fanötöna khö Mesia
SAGÖTÖ famatörö razo ba ndraono Gizara’eli ba Yehuda, so mato hadauga ndra matua—si tobali ere. Lö ata’u ira wama’ema fanguhuku moroi khö Lowalangi me no niha samati ira. Faigi zi öfa ngawalö duho nifa’ema ndra sama’ele’ö Lowalangi ba niha.
1. Famakiko Yeruzalema. No ara ba zi lalö me lafa’ele’ö ira—Yesaya ba Yeremia—wa hasambalö tekiko Yeruzalema ba tobali banua si lö niha. Lafo’amaedola wangombakha hadia mbörö wa mofönu Lowalangi ba mbanua andrö. He na lawa’ö wa solo’ö khö Yehowa ira, si ndruhunia ba mbanua andrö afönu fa’alösökhi, agama faya ba fa’afaito.—II Razo 21:10-15; Yesaya 3:1-8, 16-26; Yeremia 2:1-3:13.
2. Ifuli tefosumange Lowalangi si ndruhu. Me no 70 fakhe ndraono Gizara’eli ba Mbabilona, awena te’efa’ö ira. Mangawuli ira ba mbanuara ba lafuli lahaogö gosali Yehowa ba Yeruzalema. (Yeremia 46:27; Amosi 9:13-15) Mato 200 fakhe silalö, no ifa’ele’ö Yesaya haniha zangefa’ö iraono Gizara’eli ya’ia da’ö—Kiro—ya’ia zanudugö Babilona ba sanehegö mangawuli niha Yehuda ba wamosumange Yehowa. No izara-zara wanutunö Yesaya hadia nifalua Kiro ba wanudugö Babilona.—Yesaya 44:24–45:3.
3. Fa’atohare Mesia ba salua khönia. Tumbu Mesia ba Mbetilekhema. (Mikha 5:1) So khönia wangide-ngide’ö, itörö galide me möi ia ba Yeruzalema. (Zakharia 9:9) Hewa’ae sökhi gamuatania ba so khönia wa’ebolo dödö, ato niha si lö omasi khönia ba si lö manema’ö ya’ia. (Yesaya 42:1-3; 53:1, 3) Labunu ia. Hadia zaya-zaya gölö nifaluania? Lö’ö, börö me fa’amatenia zangöhöli horö niha sato. (Yesaya 53:4, 5, 9-12) Awena alua da’ö na no maoso ia moroi ba ngai zimate.
4. Famatörö Mesia ba gulidanö. Lö mo’ahonoa niha gulidanö ba lö fa’ohahau dödö khöra na lafatörö ira samösa, tobali Mesia andrö lafotöi Razo Wa’atulö. (Yesaya 9:6, 7; Yeremia 10:23) Ba wamatörö Mesia so wa’atulö ba gotalua niha hegöi ba gotaluara niha gurifö. (Yesaya 11:3-7) Lö fökhö sa’ae. (Yesaya 33:24) Lö hadöi fa’amate sagötö fa’ara. (Yesaya 25:8) Ba wamatörö Mesia, tesusugi fefu niha si no mate ba gulidanö.—Danieli 12:13.
—Te’odane-dane ba mbuku Yesaya, Yeremia, Danieli, Gamosi, Mikha, ba Zakharia.
