FAOSATÖ 19
Fama’ele’ö Niwa’ö Yesu Irugi ba Ginötö si So Miföna
No’izara-zara wangombakha Yesu hadia dandra we’asonia na tobali razo ba tandra gamozua götö danö
BA HILI Wanikha, oroma Yeruzalema awö gosali Lowalangi si sökhi sibai, daöfa ndra nifaha’ö Yesu sangondrasi ya’ia ba wanofu hadia geluaha niwa’önia khöra. Awena i’ombakha’ö khöra Yesu wa hasambalö tekiko gosali si so ba Yeruzalema. Ba zilalö no irai i’ombakha’ö khöra Yesu sanandrösa ”gamozua götö danö”. (Matai’o 13:40, 49) Iada’a, lasofu khönia ira nifaha’önia, ”Hadia dandra wa’asomö ba tandra wa’atua danö?”—Matai’o 24:3.
Itema lira Yesu, itutunö khöra hadia zalua fatua lö adudu Yeruzalema. Fehede Yesu andrö tenga ha ba ginötö da’ö alua ia. Alua göi ba zi sagörö ulidanö. Ifa’ele’ö Yesu hadia zalua ba zi sagörö ulidanö si tobali tandra wa’asonia. Salua andrö zangoroma’ö ba niha ba zi sagörö ulidanö wa no ibörögö mamatörö Yesu ba zorugo. Fehede tanö bö’ö, salua andrö zangoroma’ö wa Yesu zi no ifataro Yehowa tobali Razo si no ara ifabu’u. Salua andrö zi tobali tandra wa lö aratö ihori fefu niha si lö sökhi Famatörö Lowalangi, aefa da’ö i’a’asogö wa’atulö ba niha ba zi sagörö ulidanö. Fefu zalua si no ifa’ele’ö Yesu da’ö dandra wa no ngaluo safuria—ba zohalöwö ba agama, ba wamatörö niha gulidanö, ba tanö bö’önia si so ba ginötö andre—aefa da’ö tohare wamatörö si bohou.
I’ombakha’ö Yesu hadia zalua ba gulidanö me no tobali Razo ia ba zorugo, simane fasuwöta ba zi sagörö ulidanö, fa’olofo, duru danö sabölö-bölö, ba fökhö. Tedou wa’alösökhi. Fefu zolo’ö khö Yesu möi ira manuriaigö Banua Lowalangi ba zi sagörö ulidanö. Ba fozunia ba ”wamakao sabölö-bölö”, famakao si lö irai alua.—Matai’o 24:21.
Hewisa ena’ö la’ila ira nifaha’ö Yesu wa no ahatö wamakao sabölö-bölö andrö? Imane Yesu, ”Ba marafala mitöngöni wamaedo andrö”. (Matai’o 24:32) Na tumbu lehe-lehenia da’ö dandra wa no ahatö mbaŵa wa’aukhu zino. Simanö göi, na ha samuza ginötö wa’alua fefu nifa’ele’ö Yesu, da’ö dandra wa no ahatö ginötö wa’atua danö. Samösa lö sangila inötö ba baŵa wa’alua wamakao sabölö-bölö andrö baero Nama. Börö da’ö, i’o’ou ndra nifaha’önia Yesu, ”Mifaigi, böi miförö; lö sa mi’ila ginötö.”—Mareko 13:33.
—Te’odane-dane ba mbuku Matai’o faza 24 ba 25; Mareko faza 13; Luka faza 21.
^ par. 14 Ena’ö ö’ila danö bö’ö nasa sanandrösa ba nifa’ele’ö Yesu, faigi nga’örö 86-95 ba mbuku Apa yang Sebenarnya Alkitab Ajarkan? nifazökhi ndra Samaduhu’ö Yehowa.
