FEHEDE andre ngawua wehede famasao si no irai tesura ba si no tehöngö. ”Ba mböröta ifazökhi Lowalangi mbanua siyawa, awö danö.” (I Moze 1:1) Hewa’ae no adogo-dogo wehede andrö, hiza’i molakhömi, börö me itutunö khöda haniha wondrege zalawa, si tehöngö ba sabölö ya’ia da’ö, Yehowa. Ba ayati da’ö i’ombakha’ö khöda wa Lowalangi Zamazökhi banua siyawa awö danö si toröi ya’ita. Ba ayati tanö bö’ö, itutunö khöda ha wa’oya ginötö ni’oguna’ö Yehowa ba wamazökhi ösi gulidanö si so ya’ita awö zahöli-höli dödö ni’ilada.

Sabölö ahöli-höli dödöda ba niwöwöi Lowalangi ba gulidanö, ya’ia da’ö niha. Da’a nifazökhi Lowalangi si fakhili khönia, si tola mamalua amuata Yehowa, simane fa’omasi ba fa’atua-tua. Ifazökhi Lowalangi niha moroi ba dambu. Labe’e töinia Gadamo ba ifataro ia ba kabu faradaiso ya’ia da’ö–Kabu Edena. Lowalangi samösa zamazökhi kabu da’ö, ibe’e ngawalö geu sowua si sökhi.

I’ila Lowalangi wa niha andrö omasi ia na so nawönia. Ihalö sara döla nosu Gadamo ibali’ö ira alawe, i’ohe khö Gadamo, tobali ngambatönia ba tefotöi ia Khawa. Imane Adamo, ”Töla föfö dölagu da’ö ba nagole föfö nagolegu.” Imane Lowalangi, ”Andrö i’erogö ndra amania inania niha, ba molemba ia ba ngambatönia, ba tobali ha sambua boto ira.”​—I Moze 2:22-24; 3:20.

Ibe’e Lowalangi dombua goroisa khö Gadamo ba Khawa. Si oföna, ifarou ira Lowalangi ba wangehaogö ulidanö nahia si toröi ya’ira irugi lafönui gulidanö nga’ötöra. Si dua, iwa’ö khöra Lowalangi ena’ö böi la’a mbua geu si so ba dalu kabu, ya’ia da’ö ”eu famotokhi ba dödö si sökhi ba si lö sökhi”. (I Moze 2:17) Na lö la’o’ö da’ö, ba mate ira. Ba zi dombua goroisa andrö, ibe’e khöra ginötö Yehowa ba wangoroma’ö hadia latema ia tobali Samatörö ya’ira. Folo’öra zangoroma’ö wa so khöra wa’omasi ba fangandrö saohagölö. Oya zi tobali dane-dane khöra wa sinangea latema wamatörö si sökhi moroi khö Yehowa. Niha si darua si no mo’ahonoa andrö lö sinegu khöra. Sura Ni’amoni’ö zanguma’ö, ”I’ila Lowalangi, sökhi sibai fefu nifazökhinia.”​—I Moze 1:31.

​—Te’odane-dane ba I Moze faza 1 ba 2.