SIMANE nifa’ele’ö Yehowa, tebagi ndraono Gizara’eli me no faröi Zelomo khö Yehowa. Rehabeamo ono Zelomo zi tobali razo fangalinia, niha si lö sökhi. Lua-luania, molawa zi fulu mado moroi ba ndraono Gizara’eli ba lafasindro khöra wamatörö tanö ba gaekhula. Si dombua mado ndraono Gizara’eli lö faröi ira khö razo moroi ba nga’ötö Dawido si so ba Yeruzalema ba lafasindro wamatörö Yehuda tanö raya.

Lö fahasara dödö ba zi dombua famatörö andrö, börö me no faröi razora ba lö la’o’ö niwa’ö Yehowa. Abölö wa’alösökhi ndraono Gizara’eli moroi ba niha Yehuda tanö raya, börö me i’otarai wamobörö no i’o’ou ira razora ba wanömba nadu. Hewa’ae so zahöli-höli dödö nifalua genoni Lowalangi simane Elia ba Elisa—lasusugi niha si no mate—ba lafuli-fuli ira iraono Gizara’eli ba lala si lö sökhi. Ba gafuriata, itehe Lowalangi ba ndrawa Asiria ba wangohori famatörö ndraono Gizara’eli si so ba gaekhula.

Abölö ara wamatörö Yehuda moroi ba wamatörö ndraono Gizara’eli, hewa’ae simanö, ihuku ira Lowalangi. So ösa razo moroi ba Yehuda sangonorogö tödö famangelama moroi khö genoni Lowalangi, ba la’o’ou nono mbanuara ena’ö lafuli ira khö Yehowa. Duma-dumania, Razo Yosia ibörögö iheta fefu nadu si so ba Yehuda, ibohouni gosali Yehowa. Me lasöndra nga’ölu zura Goroisa Lowalangi nibe’enia khö Moze, tefarou dödö Yosia ba wondrönia’ö ono mbanuania ba wamalua oroisa Lowalangi.

Alimagö sibai, razo si tobali fangali Yosia lö la’o’ö duma-duma nibe’enia. Andrö wa ilulu niha Yehuda Yehowa ba danga Mbabilona ba wamakiko Yeruzalema awö gosalinia. Niha sauri te’oloi’ö ba Mbabilona. Ifa’ele’ö Yehowa, wa 70 fakhe wa’arara ba Mbabilona. Sagötö fe’asora ba Mbabilona, tobali si lö niha-niha mbanua Yehuda—irugi mangawuli dania ira ba Yehuda simane si no ifabu’u Yehowa.

I’otarai da’ö lö hadöi razo ba nga’ötö Dawido, irege tohare Zangefa’ö andrö si no tefabu’u, ya’ia da’ö Mesia. Ato ba gotalua razo si dadao ba dadaoma Dawido andrö zangoroma’ö wa niha si lö mo’ahonoa tenga sinangea mamatörö tobali razo. Ha Mesia zinangea tobali razo ba wamatörö. Andrö imane Yehowa khö razo safuria ba nga’ötö Dawido, ”Niheta zaembu, niheta dakula.. . .ba si lö sa’e dania, irege so zokhö andrö, ba khönia ube’e.”​—Hezekieli 21:31, 32.

​—Te’odane-dane ba I ba II Razo; II Nga’ötö faza 10 irugi 36; Yeremia 25:8-11.