FAOSATÖ 20
Labunu Yesu Keriso
Ihonogöi gowasa si bohou Yesu; la’a mbölinia ba la’osö ia ba döla geu
MENO tölu fakhe amatonga mamaha’ö ba manuriaigö Yesu, i’ila wa lö aratö ginötö wa’aurinia ba gulidanö. La’osara’ö dödöra ira sangila amakhoita ba wamunu ya’ia, hiza’i ata’u ira börö niha sato, börö me lawa’ö Yesu andrö sama’ele’ö. Hiza’i gasa-gasa da’ö, samösa ba gotalua ndra nifaha’ö Yesu si 12 sotöi Yuda ni’oguna’ö Gafökha ba wemanga mböli Yesu. Sondrönia’ö ba agama labe’e gefe khö Yuda 30 rufia ba wemanga böli Yesu.
Ba zi bongi fatua lö mate Yesu, i’owuloi ndra nifaha’önia ba wemanga Fasa. Me no ifofanö Yuda, awena ihonogöigö gowasa si bohou, ya’ia da’ö Bongi Watomesa Zo’aya. Ihalö roti, ba mangandrö ia, iboboto roti andrö ba ibe’e khö ndra si-11 nifaha’önia. Imane, ”Botogu da’e nibe’e salahimi, mitörö-törö tödömi ndra’o ba zimane.” Ba simanö göi mako andrö me no aefa manga ira, imane, ”Amabu’ula li si bohou mako andre, ba ndrogu saduwa dania salahimi.”—Luka 22:19, 20.
Oya ni’ombakha’ö Yesu khö ndra nifaha’önia ba zi bongi andrö. Ibe’e khöra goroisa si bohou—ena’ö faoma la’omasi’ö nawöra. Imane khöra, ”Ba da’ö aboto ba dödö niha fefu wa no nifaha’ögu ami na so khömi wa’omasimi nawömi.” (Yohane 13:34, 35) I’o’ou ndra nifaha’önia ena’ö böi abu dödöra ba zalua khönia dania. Aefa da’ö, mangandrö Yesu salahi ndra nifaha’önia. Manunö ira ba wanuno Lowalangi awena mofanö ira ba Kabu Gezemane, ba mbongi da’ö.
Me larugi Gezemane, ituhi danö Yesu, itutunö nösi dödönia khö Lowalangi ba wangandrö. Lö ara aefa da’ö, tohare ndra saradadu si so fangöna, ere, ba niha tanö bö’ö ba wondra’u Yesu. Fa’ago bawa Yuda khö Yesu ena’ö la’ila ia. Lara’u Yesu ira saradadu ba laböbö, ba moloi ndra nifaha’önia.
Ifaduhu’ö Yesu föna zatua mbanua wa ya’ia andrö Ono Lowalangi. Lasalaikö ia ira satua mbanua, lamane no i’elifi Lowalangi, sinangea nibunu ia. Aefa da’ö, la’ohe Yesu föna Gumandru Romawi, Wondrio Filato. Hewa’ae i’ila Filato wa lö fasala Yesu, itou’ö ia ba danga niha sato ba niha si’ao-ao ena’ö labunu Yesu.
La’ohe Yesu ba Gologata, ba la’osö ia ba döla geu ira saradadu Roma. Izumaigö ogömi danö. Ba zi tanö owi da’ö, mate Yesu, ba alua ndruru danö sabölö-bölö. Lahalö mboto Yesu, la’ohe ba lewatö si bohou lakhao ba dögi gara. Mahemolunia, lafotandro lewatö ira sangila amakhoita ba lafataro samösa zanarogö. Hadia ba da’ö manö so Yesu ba lewatö? Lö’ö. So zi lö aratö alua sahöli-höli dödö.
—Te’odane-dane ba mbuku Matai’o faza 26 ba 27; Mareko faza 14 ba 15; Luka faza 22 ba 23; Yohane faza 12 irugi 19.
^ par. 15 Ena’ö ö’ila danö bö’ö nasa sanandrösa ba wa’amate Yesu, faigi ba faza 5 ba mbuku Apa yang Sebenarnya Alkitab Ajarkan?
