NGAHÖNÖ fakhe ba zilalö no ifabu’u Yehowa ba nga’ötö Gaberahamo wa ya’ira zangokhögö tanö Kana’ana andrö. Iada’a Yosua zondrönia’ö iraono Gizara’eli ba wangokhögö Tanö Amabu’ula.

No ihalö gangetula Lowalangi wa sinangea mufakiko ndrawa Gana’ana. No afönu mbanua andrö amuata si lö sökhi, fohorö, ba famunu niha. Börö da’ö, fefu niha ba mbanua Gana’ana labubunu iraono Gizara’eli.

Hewa’ae simanö, fatua lö larugi mbanua andrö, ifatenge darua zamauze Yosua, larugi Yerikho ba mörö ira ba nomo Rakhaba. Ifatenge ira yomo Rakhaba, hewa’ae i’ila wa ya’ira iraono Gizara’eli, ilumö’ö ira ba danga zi fa’udu khöra. Mamati Rakhaba khö Lowalangi ndraono Gizara’eli börö me no irongo hewisa wangorifi Yehowa banuania. I’andrö khö zamauze andrö ena’ö möi ira ba hölu khönia wa lö labunu ia awö zoroi yomonia.

Me larugi danö Kana’ana ba lasuwö Yerikho, ifalua dandra sahöli-höli dödö Yehowa irege adudu göli kara ba Yerikho. Lafa’u’u mbanua andrö ira Yosua ba lasuwö, ba lö labunu Rakhaba ba soroi yomonia. Barö zi önö fakhe fa’ara, arakhagö ahori ifa’u’u Danö Amabu’ula Yosua. Aefa da’ö, ibagi-bagi danö andrö ba mado ndraono Gizara’eli.

Me arakhagö awai halöwö Yosua, i’owuloi fefu ndraono Gizara’eli. Ifasugi ba dödöra hadia nifalua Yehowa khö ndra tuara meföna, ifarou göi dödöra ba wanga’i halöwö Yehowa. Hiza’i, me no mate Yosua faoma awönia, laröi Yehowa iraono Gizara’eli ba lafosumange nadu. Arakhagö 300 fakhe lö la’odödögö iraono Gizara’eli wolo’ö oroisa Yehowa. Ba ginötö da’ö, itehegö Yehowa khö ndrawa Wilisiti ba wamakao iraono Gizara’eli. Me la’angaröfili Yehowa iraono Gizara’eli, ifataro 12 zanguhuku—ba wanolo ya’ira.

Fefu ngawalö nifalua Zanguhuku andrö no tesura ia ba zura Zanguhuku, i’otarai khö Gotenieli irugi khö Zimesono, niha fondrege zabölö sibai. Si tobali famaha’ö khöda ba zi no tesura ba zura Zanguhuku andrö ya’ia da’ö: Tatema howu-howu na ta’o’ö li Yehowa, ba fa lö molo’ö fa’ate’ala lua-luania.

​—Te’odane-dane ba mbuku Yosua; Zanguhuku; III Moze 18:24, 25.