BA ME no ibörötaigö ato niha ba gulidanö, itugu oya horö ba fa’alösökhi. Samösa genoni Lowalangi sotöi Khenoki, ifangelama niha wa samuza ma’ökhö ihori niha si lö sökhi Lowalangi. Hiza’i, itugu tedou wa’alösökhi. So ösa ndra mala’ika solawa Yehowa, laröi nahiara ba zorugo si no tetatugöi khöra, ba labali’ö ira niha gulidanö ba mangowalu ira ba nono alawe somasi ira. Ba wangowalura si tenga sinangea andrö, tumbu khöra ndraono sagabölö ba Segebua Boto, somasi mamakao niha. Lua-luania, itugu monönö wa’alösökhi ba famunu niha ba gulidanö. Ba afökhö sibai dödö Lowalangi wamaigi me no tekiko niwöwöi dangania ba gulidanö.

Me no aefa mate Khenoki, so samösa ndra matua si fabö’ö moroi ba niha si tefasui ya’ia. Töinia Noakhi. Noakhi ba soroi yomonia la’odödögö wamalua si sökhi föna Lowalangi. Me inötö ihalö gangetula Lowalangi ba wangohori niha si lö sökhi, omasi ia i’orifi Noakhi awö ngawalö gurifö. Andrö, iwa’ö Lowalangi khö Noakhi ba wamazökhi owo—hulö göfa sebua si öfa sagi. Börö me ba nowo so ira, andrö wa tola te’orifi Noakhi ba soroi yomonia, awö ngawalö gurifö, ba wa’anönö danö idanö si lö aratö tohare. I’o’ö Noakhi li Lowalangi. Arakhagö 50 fakhe wamazökhinia owo ba owölö-ölö ia ’wanuriaigö fa’atulö dödö’. (II  Fetero 2:5) Ifangelama göi niha sato wa lö aratö anönö danö idanö, hiza’i lö labe’e dödöra ba niwa’önia. Irugi inötö we’amöi ba nowo Noakhi awö zoroi yomonia ba fefu ngawalö gurifö. Aefa da’ö, ikusi Lowalangi mbawandruhö nowo andrö. Ba tohare deu sabölö-bölö.

Tohare deu sabölö-bölö 40 ngaluo ba 40 wongi wa’ara irege anönö danö idanö. Ba mate niha si lö sökhi. Ha’uga waŵa aefa da’ö, alö nidanö, ba tosake nowo ba dete hili. Döfi wa’arara ba nowo, awena tola möi ira baero. Si tobali fangandrö saohagölö, ibe’e zumange Noakhi khö Yehowa. Itema Yehowa zumange Noakhi andrö, ifabu’u khö Noakhi ba khö zoroi yomonia wa lö i’a’asogö sa’ae wa’anönö danö idanö ba wangohori niha ba gulidanö. Ibe’e ndrumi Yehowa, si tobali fanörö tödö ba wawu’usa linia khö Noakhi.

Me no aefa Wa’anönö Danö Idanö, ibe’e khöra goroisa si bohou Yehowa. Itehegö khöra wemanga nagole gurifö, hiza’i lö itehe khöra wemanga do. Ibe’e goroisa Lowalangi ba nga’ötö Noakhi ena’ö muzawili ira ba gulidanö, tobali so ösa ba gotaluara zi lö molo’ö. So khöra wahasara dödö ba wamatörö Nimerodi, ba lafazökhi khöra malige salawa ba mbanua Mbabilona. Ohitö dödöra ya’ia da’ö ba wolawa oroisa Lowalangi ena’ö muzawili niha ba gulidanö. Tobali, lö itehegö Lowalangi ni’era-era dödöra, andrö wa ifawukaisi lira. Muhede ira ba li si fabö’ö-bö’ö. Börö me lö la’ila fahuhuo khö nawöra, laröi halöwöra ba muzawili ira ba gulidanö.

​—Te’odane-dane ba I Moze faza 6 irugi 11; Yuda 14, 15.