lfazökhi Gadamo ba Khawa Yehowa ena’ö auri ira ba Waradaiso. Itandrawaisi döi Lowalangi Afökha, ilawa wamatörö Yehowa. Fao Gadamo ba Khawa khö Gafökha ba wolawa Lowalangi irege aekhu ira ba horö ba ba wa’amate irugi nga’ötönia

Ihuku Yehowa niha solawa andrö, ifabu’u wa so Zangefa’ö, mazui Ma’uwu, somama högö Gafökha ba sangeheta samobörö horö ba tandrawa

Ifabu’u Yehowa khö Gaberahamo faoma Dawido wa ba nga’ötöra tesöndra Ma’uwu andrö, mazui Mesia, si tobali Razo sagötö fa’ara

I’ombakha’ö Yehowa khö ndra sama’ele’ö wa Mesia zamokai lala ena’ö aefa niha ba horö ba ba wa’amate. Yesu ba awönia razo, mamatörö ira ba Mbanua Lowalangi, ba wangeheta fasuwöta, fökhö, ba fa’amate

Ifatenge Nononia si ha sambua Yehowa ba gulidanö, i’ombakha’ö khöra wa Yesu andrö zi tobali Mesia. Ituriaigö Mbanua Lowalangi Yesu, ibe’e wa’aurinia tobali sumange khö Lowalangi. Aefa da’ö, isusugi ia Yehowa tobali boto eheha

Ifataro Nononia Yehowa tobali Razo ba zorugo, ba da’ö ibörögö ngaluo safuria. Ibe’e wanuturu lala Yesu ba niha solo’ö khönia si so ba gulidanö ena’ö tola laturiaigö Mbanua Lowalangi ba zi sagörö ulidanö

Ibe’e wanuturu lala Yehowa khö Nononia ena’ö alua Wamatörönia ba gulidanö. Ihori fefu wamatörö niha gulidanö, i’asogö Waradaiso, i’ohe niha si lö faröi ba wamo’ahonoa. Tefaduhu’ö wamatörö Yehowa, ba te’amoni’ö döinia sagötö fa’ara