FULU ngaluo me no aefa manahae Yesu ba zorugo, owulo ndra nifaha’ö si 120 ba zi sambua nahia ba Yeruzalema me luo Wendrakose ba niha Yehuda, me döfi 33 M. I’ozumaigö so li sihöngö, hulö itörö angi sabölö-bölö, ba ifönui nomo andrö si so ya’ira. Ba fahuhuo ira ba li si lö irai la’ila. Hana wa tola alua da’ö? No ibe’e gehehania Lowalangi khöra.

No owulo baero niha sato simöi ba wangondrasi angowuloa Wendrakose andrö. Ahöli dödö niha sato me la’ila onekhe ndra nifaha’ö wangoguna’ö lira. Me idunö-dunö Fetero hadia zalua, ifatunö hadia zi no tefa’ele’ö ba mbuku Yoeli, wa ”ilau” ba niha gehehania Lowalangi, irege tola lafalua dandra sahöli-höli dödö niha si no manema eheha andrö. (Yoeli 3:1, 2) Fame’e Lowalangi ehehania ba niha andrö, da’ö zangoroma’ö wa so zi no fabö’ö: Ya’ia da’ö no aheta wa’omasi Lowalangi ba ndraono Gizara’eli, no ibe’e ba niha Keriso sawena ifasindro. Niha somasi mamosumange Lowalangi si tefaudu ba zomasi ia, la’o’ö Keriso iada’a.

Aefa da’ö, itugu tedou wamakao, labe’e ba gurunga ndra nifaha’ö. Hiza’i, ba zibongi da’ö, ibokai khöra mbawandruhö gurunga mala’ika, ifatenge ira wanuriaigö. Da’ö nifaluara me arakha moluo. Momöi ba gosali ba labörötaigö mamaha’ö turia somuso dödö sanandrösa khö Yesu. Ba mofönu zangila amakhoita khö ndra nifaha’ö, latenawa ira ena’ö laböhöli wanuriaigö. Ba lö ata’u ndra nifaha’ö wanema li, ”Ni’o’ö khö Lowalangi moroi ba wolo’öda ba niha.”​—Halöwö Zinenge 5:28, 29.

Itugu abölö-bölö wamakao. So ba gotalua niha Yehuda zamöbögö si lö duhu khö Zitefano wa no itandrawaisi Lowalangi, ya’ia andre nifaha’ö Yesu, ba latebu ia kara irugi mate. Samösa nono matua sotöi—Saulo moroi ba Dareso—i’ila ba fao dödönia wamunu Sitefano. Aefa da’ö, möi Zaulo ba Ndramaseko ba wondra’u fefu solo’ö khö Keriso. Ba wofanö-fanönia ba lala, i’anemai’ö so haga moroi ba mbanua ba zi tefasui Saulo ba so li sihede, imane, ”He Saulo! he Saulo! hana wa ögohido?” Ba alau ia tou ba danö, imane, ”He So’aya, haniha ndra’ugö?” Imane, ”Yesu ndra’o nigohiu.”​—Halöwö Zinenge 9:3-5.

Tölu ngaluo aefa da’ö, ifatenge samösa nifaha’önia Yesu, sotöi Anania ba we’amöi khö Zaulo ena’ö ifuli i’ila niha. Tebayagö idanö Zaulo, aefa da’ö ibörötaigö möi manuriaigö sanandrösa khö Yesu lö khönia fa’ata’u. Ba gafuriatania, Saulo andre tobali nifaha’ö Yesu ba lafotöi ia Faulo, aefa da’ö tobali ia ono mbanua niha Keriso sowölö-ölö ba wanuriaigö.

Ha ba niha Yehuda ba ba niha Zamaria laturiaigö Mbanua Lowalangi ira nifaha’ö Yesu. Iada’a, so samösa mala’ika sangoroma’ö ya’ia khö Konelio, kumandra zaradadu ba Roma sangata’ufi Lowalangi, imane khönia mala’ika andrö fatenge niha ba wogaoni Fetero. Möi ndra Fetero ba awönia tanö bö’ö ba wangombakha turia mbanua Lowalangi khö Konelio hegöi ba nösi nomonia. Me inötö fahuhuo Wetero, i’ozumaigö möi geheha ni’amoni’ö ba niha baero si no mamati, ba lafarou dödöra ira nifaha’ö ena’ö lafabayagö’ö ira idanö ba döi Yesu. I’otarai da’ö, tetehegö ba niha moroi ba ngawalö soi ba wanöndra fa’auri si lö aetu. Iada’a, manuriaigö mbanua niha Keriso ba ngawalö soi misa.

​—Te’odane-dane ba mbuku Halöwö Zinenge 1:1–11:21.