FAOSATÖ 18
Ifalua Dandra Sahöli-höli Dödö Yesu
Ba dandra sahöli-höli dödö nifalua Yesu, ba da’ö oroma hewisa wangoguna’önia fa’abölö na mamatörö ia tobali Razo
IBE’E Lowalangi wa’abölö khö Yesu ba wamalua tandra sahöli-höli dödö si tebai lafalua niha gulidanö. Oya dandra sahöli-höli dödö nifalua Yesu—sasesenia föna niha sato. Tandra sahöli-höli dödö andrö zangoroma’ö fa’abölö Yesu ba wolawa udu ba ba wangeheta sanaisi si tebai laheta niha gulidanö si lö mo’ahonoa. Faigi duma-duma andre.
Ibe’e gö niha ba idanö nibadu. Tandra sahöli-höli dödö si föföna nifalua Yesu, ya’ia da’ö ibali’ö agu nidanö. Ba ginötö tanö bö’ö dua kali ibe’e gö niha solofo, ngahönö wa’ato, ha ma’ifu gi’a ba roti. Oya zi töra gö ba zi dua kali ibe’e gö niha sato.
Ifadöhö wökhö. Ifadöhö Yesu ngawalö wamakao ”ba ngawalö wökhö fefu, awö ngawalö wa’atebai”. (Matai’o 4:23) Ifadöhö hörö zau’a, tögi dalinga zafiso, sobou auri, saniri, sakela-kela ba tanö bö’önia. Lö fökhö si tebai ifadöhö.
Tola ifahono mbade. Me la’ötö nidanö Galilaia awö ndra nifaha’önia, tohare mbade sabölö-bölö. Ata’u ndra nifaha’önia. Ha ifaigi mbade andrö Yesu ba imane, ”Böi hede-hede sa’ae!, Honogö’ö!” Ba tebato nangi ba tobali ahono sibai. (Mareko 4:37-39) Ba ginötö tanö bö’ö, mowaö-waö ia ba dete nidanö si so bade sabölö-bölö.—Matai’o 14:24-33.
Ifofanö mbekhu. Abölö mbekhu moroi ba niha. Ato niha si tebai mangefa’ö ya’ira moroi ba danga zi fa’udu khö Lowalangi andre. Hiza’i, tenga ha sakali ifofanö mbekhu Yesu, ena’ö aheta ira ba niha nifakao-kaonia. Lö ata’u Yesu khöra. Ya’ira zata’u khö Yesu börö me no la’ila wa’abölönia.
Isusugi zi no mate. Fa’amate lafotöi ia ”safuria zi fa’udu”, börö me fa’amate andrö si fa’udu si tebai lalawa niha gulidanö. (I Korindro 15:26) Hewa’ae simanö, no isusugi zi no mate Yesu, isusugi nono matua ono lakha mbanua, isusugi göi nono alawe ono Ya’iro. Sabölö ahöli-höli dödöda, me tesusugi Lazaro si fahuwu khö Yesu, ifalua da’ö föna niha sato si no abu tödö, hewa’ae no öfa bongi Lazaro ba lewatö! Si fa’udu khö Yesu lafaduhu’ö wa no ifalua dandra sahöli-höli dödö.—Yohane 11:38-48; 12:9-11.
Hana wa ifalua Yesu fefu dandra sahöli dödö andrö? Hadia tenga no ahori mate fefu niha nitolonia andrö? Atulö, hiza’i, moguna dandra sahöli-höli dödö nifalua Yesu andrö ba zi so föna. Da’ö zangoroma’ö wa si ndruhu-ndruhu alua fefu zi no tefa’ele’ö sanandrösa ba wa’a Razo Mesia. Lö mangiwa dödöda wa Razo si no ifataro Lowalangi tola iheta wa’olofo, fökhö, bade samakiko niha, bekhu, mazui fa’amate. No iforoma’ö wa no ibe’e khönia wa’abölö Lowalangi ba wamalua da’ö.
