BUKU safuria moroi ba Zura Ni’amoni’ö ya’ia da’ö Fama’ele’ö, da’ö zame’e fanötöna ba niha gulidanö. Ba mbuku nisura Yohane andre oya gangilata, awena ahori alua na no a’ozu gohitö dödö Yehowa.

Ba gangilata si föföna, isuno, itegu mbanua niha Keriso Yesu. Ba gangilata aefa da’ö, oroma dadaoma si so ba zorugo, ba ato ndra mala’ika samosumange Yehowa.

Me lö aratö alua gohitö dödö Lowalangi, tebe’e ba danga Nono Mbiri-biri ya’ia da’ö Yesu nga’ölu zura si fitu tandro. Me ibokai dandro si sara irugi öfa, oroma ba gulidanö zi no amaedola zi fakudo. Si fakudo si föföna ya’ia da’ö Yesu, fakudo ia ba kudo safusi no ifake dakula Wa’arazo. Aefa da’ö, oroma zui zi fakudo si fabö’ö-bö’ö, molo’ö angilata ya’ia da’ö fasuwöta, lofo, ba fökhö—fefu da’ö alua ba ngaluo safuria andre. Me ibokai dandro si fitu, la’o’ö ia dafitu mala’ika samoli torofe si fitu si no amaedola zangombakha fanguhuku Lowalangi. Ba fitu wamakao salua, mazui fönu Lowalangi.

Mosindro ba zorugo Wamatörö Lowalangi si no amaedola nono matua sawena tumbu. Alua wasuwöta, ba tetibo’ö ba gulidanö Gafökha faoma mala’ika si lö sökhi. So li sebua si’ao imane, ”Alai gulidanö.” Mofönu sibai Gafökha me no i’ila wa lö aratö ginötö nitehegö khönia.​—Fama’ele’ö 12:12.

Oroma khö Yohane Yesu ba zorugo si no amaedola nono mbiri-biri, ba 144.000 ngahönö zi fao khönia nihalö moroi ba gotalua niha gulidanö. ’Mamatörö ira tobali razo awö’ Yesu ba zorugo. I’ombakha’ö buku Wama’ele’ö wa fa’ato nasa ma’uwu si no tefabu’u andrö 144.000.​—Fama’ele’ö 14:1; 20:6.

Owulo razo ba gulidanö ba wamaondragö Hamagedo, ”ba wanuwö andrö na baŵa sebua khö Lowalangi samatörö fefu hadia ia”. Lasuwö zi fakudo yawa ba kudo safusi, ya’ia da’ö Yesu, razo mala’ika ba zorugo. Tehori fefu razo ba gulidanö andre. Larate Gafökha, ba mamatörö Yesu ba gulidanö faoma si 144.000, ”saribu fakhe wa’ara”. Ba gafuriata zihönö fakhe, labunu Gafökha.​—Fama’ele’ö 16:14; 20:4.

Hadia lua-lua Wamatörö Keriso awö zi fao khönia ba zi Saribu Fakhe fa’ara ba niha si lö faröi? Imane Yohane, ”I’osi dania [Yehowa] dawa hörö fefu ba höröra, lö fa’amate sa’ae, ba lö fa’abu dödö, ba lö fege-ege, ba lö fa’afökhö sa’ae, me no numalö zi föföna andrö.” (Fama’ele’ö 21:4) Tobali faradaiso gulidanö!

Börö da’ö, Fama’ele’ö, mbuku safuria ba Zura Ni’amoni’ö. Ba Wamatörö Mesia, te’amoni’ö döi Yehowa, ba tefaduhu’ö wamatörönia sagötö fa’ara!

​—Te’odane-dane ba mbuku Fama’ele’ö.