MENO ifalalini agamania Faulo, terou sibai dödönia wamatunö turia Mbanua Lowalangi—me no aefa igohi niha Keriso, iada’a lagohi-gohi göi ia. Lö adage-dage ia wofanö-fanö ba mbanua saröu ba wanuriaigö Banua Lowalangi, samalua ohitö dödö Lowalangi ba niha gulidanö ba mböröta.

Ba Lisitera irugi Faulo me awena möi ia manuriaigö, ba da’ö ifadöhö zombuyu-mbuyu töla i’oroi me tumbu. Ba da’ö mu’ao-ao niha lamane: Faulo faoma Baranaba no Lowalangi ira. Ya’ira si darua andre arakhagö tebai latenawa niha same’e sumange khöra. Hiza’i, börö wa’afökhö dödöra khö ndra Faulo, ba gafuriata niha sato nomege laböbözi Waulo, aefa da’ö laröi ia lawalingagö no mate. Lö simate Waulo me luo da’ö, lö ara aefa da’ö ifuli möi Waulo ba mbanua andrö ba wamarou tödö ndra talifusö.

Lö fahasara dödö ba gotalua niha Yehuda si no tobali niha Keriso, börö me lö lafalua goroisa Moze niha baero si no tobali niha Keriso. Ifatunö Faulo zalua andrö khö ndra satua ba Yeruzalema. Me no aefa lafareso Zura Ni’amoni’ö, ba me no ituturu khöra lala eheha ni’amoni’ö, satua no mege lafa’ohe’ö zura ba mbanua niha Keriso ba la’amenesi ira ena’ö böi lababaya gö nadu, ba do, mazui nagole si lö aduwa do, ba fohorö. Da’a goroisa ”si lö tola lö’ö” lafalua, tenga eluahania hasambalö lafalua goroisa Moze.​—Halöwö Zinenge 15:28, 29.

Ba wofanö-fanö Waulo si mendrua, möi ia ba Mberea, lafotöi ia iada’a Yunani. Niha Yehuda si so ba da’ö omasi ira lafondro-ndrongo daromali, ero ma’ökhö la’alu-alui ba Zura na si ndruhu wamaha’ö Waulo. So wanandraigö salua zui irege iheta ia ba da’ö, möi ia ba Atena. Ifa’ema wehede si tefaudu Faulo föna niha sagatua-tua ba Atena, da’ö zi tobali duma-duma khöda ba wa’atua-tua, ba wangila wetahögö, ba ba wa’onekhe.

Me no aefa manuriaigö ia si medölu, möi Waulo ba Yeruzalema. Me möi ia ba gosali, ato niha Yehuda si fagua-gua somasi mamunu ya’ia. Lahalö Waulo ira saradadu Roma ba lazofu-zofu khönia. Börö me niha Romawi ia, ibu’a ba hulunia Faulo föna Gumandru ba Roma, sotöi Felisi. Tebai la’asogö dandra niha Yehuda wa fasala Waulo. Ena’ö lö latou’ö Waulo ba danga niha Yehuda ira Feso ba Felisi, imane Faulo, ”Ufuli möi khö Kaizaro!” Itema linia Feso, ”Khö Kaizaro möi’ö.”​—Halöwö Zinenge 25:11, 12.

Ba lafoloyo Waulo ba Gitalia ba wanguhuku ya’ia. Börö me aboto nowora ba dalu nasi, andrö wa itörö Hulo Melite. Me no larugi Roma, i’okosi nomonia dua fakhe wa’ara. Hewa’ae so zaradadu sanarogö ya’ia, lö ibato Faulo wangombakha turia Mbanua Lowalangi ba zangondrasi ya’ia.

​—Te’odane-dane ba Halöwö Zinenge 11:22–28:31.