BUKU sabölö oya faza bakha ba Zura Ni’amoni’ö ya’ia da’ö buku zinunö Dawido. Fa’ara wanura ya’ia arakhagö 1.000 fakhe. Si no tesura ba mbuku Zinunö Dawido andre da’ö zimöi fondrou’ö wamatida börö me no ladunö-dunö wa’afaduhu dödöra. Oya zi no larasoi nidunö-dunöra, simane, fa’omuso dödö, fanunora Lowalangi, fangandrö saohagölö, fa’abu dödö si no lataögö, ba famalalini era-era. Sanura buku zinunö andre fahuwu ba mamati ira khö Lowalangi. Faigi duho-tuho moroi ba zinunö si no lasura.

Aro Wamatörö Yehowa, sinangea nifosumange ia ba nisuno. ”Wa no ha ya’ugö zotöi Yehowa, wa ha ya’ugö Wondrege zalaŵa ba gulidanö ma’asagörö,” da’ö niwa’ö ba zura Zinunö 83:19. So zinunö sanuno Yehowa börö niwöwöi dangania, simane döfi ba dalu mbanua, fa’auri si so ba gulidanö, mazui famazökhinia niha sahöli-höli dödö. (Zinunö 8, 19, 139, 148) Tanö bö’önia, lasuno Yehowa börö me no ibe’e wangorifi, ba me no ilumö’ö niha si lö faröi khönia. (Zinunö 18, 97, 138) Tanö bö’ö göi, lasuno ia börö me Lowalangi satulö, sangefa’ö niha ba wamakao, ba sanguhuku niha si lö sökhi.​—Zinunö 11, 68, 146.

Yehowa zanolo ba sondrara tödö niha sangomasi’ö Ya’ia. Tola manö, ha Zinunö 23 zabölö la’ila niha, börö me ba da’ö isura Dawido wa Yehowa andrö no amaedola Gubalo sebua fa’omasi, sanuturu lala, solumö’ö, ba sondrorogö biri-birinia. Ba zura Zinunö 65:3 i’ombakha’ö khöda wa Lowalangi Yehowa ”Samondrongo fangandrö”. Ato niha si no mamalua horö, terara dödöra me labaso Zinunö 39 ba 51, börö me ba da’ö tesura hewisa wamalalini Dawido era-erania ba horö si no ifalua, awö wa’afaduhu dödönia wa i’efa’ö horönia Yehowa. Ba Zinunö 55:23 so wamarou dödö ena’ö manötöna ita khö Yehowa ba tabe’e khönia noro dödöda.

Ibohouni gulidanö Yehowa, i’odela Wamatörö Mesia. Oya ayati ba mbuku Zinunö saekhu khö Mesia, Razo si no tefa’ele’ö. Ba Zinunö 2 no tefa’ele’ö, wa Razo andre zangohori ngawalö soi si lö sökhi solawa ya’ia. Ba Zinunö 72 i’ombakha’ö wa Razo andre dania zangeheta lofo, fa lö atulö, ba famakao. Molo’ö Zinunö 46:10, i’odela Wamatörö Mesia Lowalangi ba wangeheta fasuwöta, ifakiko fefu fakake ba wasuwöta. Ba Zinunö 37, tabaso ba da’ö wa tehori niha si lö sökhi, tobali niha satulö tödö auri ira ba gulidanö sagötö fa’ara, so khöra wa’omuso dödö ba fahasara dödö.

​—Te’odane-dane ba mbuku Zinunö Dawido.