Iʼowuloi ngaʼötö Gaberahamo Lowalangi tobali sambua soi ba ibeʼe khöra goroisa. Ifotöi ira ”iraono gizaraʼeli” iʼogunaʼö ira Lowalangi enaʼö lö tebulö daromalinia ba famosumange satulö. (Zinunö 147:19, 20) Börö daʼö, ato niha moroi ba ngawalö soi tola latema howu-howu.​—Baso I Moze 22:18.

Ituyu ndraono Gizaraʼeli Lowalangi tobali samaduhuʼö khönia. Hadia zalua ba ndraono Gizaraʼeli meföna, daʼö zangoromaʼö wa moguna na taʼoʼö goroisa Lowalangi. (V Moze 4:6) Iʼodela ndraono Gizaraʼeli Lowalangi enaʼö fefu soi aboto ba dödöra haniha Lowalangi sindruhu.​—Baso Yesaya 43:10, 12.

Ba gafuriatania, lö itema Lowalangi zumange nibeʼe ndraono Gizaraʼeli. Ituyu mbanua niha Keriso Yehowa si tobali fogati. (Mataiʼo 21:43; 23:37, 38) Iadaʼa, niha keriso sindruhu daʼö wogati ndraono Gizaraʼeli ba tobali ira samaduhuʼö khö Yehowa.​—Baso Halöwö Zinenge 15:14, 17.

Iʼowuloi Yesu ndra nifahaʼönia ba wanuriaigö ba bawamahaʼö fefu soi. (Mataiʼo 10:7, 11; 24:14; 28:19, 20) Halöwö fanuriaigö no arakhagö awai ba ginötöda andre. Yehowa zangosambuaʼö niha sato moroi ba ngawalö soi tobali samolakhömi töinia ba gangowuloa satulö, lö irai alua zimanö meföna. (Famaʼeleʼö 7:9, 10) Teʼowuloi niha keriso sindruhu enaʼö faoma latolo ba lafarou dödö nawöra. Ba zi sagörö ulidanö fagölö-gölö latema wamahaʼö moroi ba Zura Niʼamoniʼö ba nahia gangowuloa zamosumange Lowalangi.​—Baso Heberaiʼo 10:24, 25.

Ba ndröfi 1870, so zangalui faʼaboto ba dödö ba Zura Niʼamoniʼö, lö atoto ira, ibörögö lasöndra zi ndruhu si lö irai muʼila ba zilalö. Aboto ba dödöra wa no ifasindro Yesu sambua gangowuloa niha Keriso, ba wanuriaigö Taromali Lowalangi. Andö wa labörögö wangombakha famatörö Lowalangi ba zisagörö ulidanö. Me döfi 1931 la fotöi ira Samaduhuʼö Yehowa.​—Baso Halöwö Zinenge 1:8; 2:1, 4, 11; 5:42.

Ba götö ndra nifahaʼö Yesu, banua niha Keriso moroi ba soi böʼö la tema wanuturu lala moroi khö zondröniaʼö yaʼira si faduhu tödö wa Yesu zi tobali högö mbanua niha keriso. (Halöwö Zinenge 16:4, 5) Simanö göi ba ginötö andre, ira Samaduhuʼö Yehowa ba zi sagörö ulidanö latema wanuturu lala moroi khö zondröniaʼö yaʼira, yaʼia daʼö, Ira Satua sangai halöwö satua-tua. Yaʼira zamaigi-maigi halöwö ndra Samaduhuʼö Yehowa samoʼeluaha ngawalö li, samazökhi, ba samazaewe buku niʼogunaʼö ba wamomaha ba Zura Niʼamoniʼö ba zi töra 600 ngawalö li. Ira satua sangai halöwö la henaigö wondrara dödö moroi ba Zura Niʼamoniʼö ba zi 100.000 (otu ribu) banua niha Keriso ba zisagörö ulidanö. Ero sambua banua niha Keriso so ndra matua sinangea mangai halöwö, yaʼira zo kubaloi biri-biri rorogöfö Lowalangi sifao faʼomasi.​—Baso I Fetero 5:2, 3.

Tefasindro gangowuloa ndra Samaduhuʼö Yehowa ba wanuriaigö turia somuso dödö ba bawamahaʼö niha. Simane ira sinenge Yesu, möi ira manuriaigö misa ba niha. (Halöwö Zinenge 20:20) Labeʼe göi wamahaʼö moroi ba Zura Niʼamoniʼö ba niha sangomasiʼö sindruhu. Ira Samaduhuʼö Yehowa tenga ha si sambua angowuloa manö. Yaʼira hulö zi sambua foʼama laʼameʼegö tödö ba laʼomasiʼö nawöra. (II Tesalonika 1:3) Börö me daʼö gohitö dödö wa tefasindro gangowuloa khö Yehowa ba wagomusoiʼö tödönia ba bawanolo niha böʼö, andrö wa hayaʼira zanöndra faʼomuso dödö ba halöwö fanuriaigö.​—Baso Zinunö 33:12; Halöwö Zinenge 20:35.