Atua-tua zomböi yaʼita moroi khöda. Simane ama sebua faʼomasi, iʼosinangegö ba omasi ia na ohahau dödöda. Baero daʼö, tebai auri ita na lö sanuturu lalada. (Yeremia 10:23) Simane iraono moguna khöra wanuturu lala moroi khö zatua, simanö göi ita moguna ituturu lalada Lowalangi. (Yesaya 48:17, 18) Goi-goi Zura Niʼamoniʼö daʼö zi tobali fanuturu lala niʼamualagö Lowalangi khöda.​—Baso II Timoteo 3:16.

Na tafalua goi-goi Yehowa, tola tasöndra waʼauri si sökhi iadaʼa ba howu-howu si lö tebulö ba zi so föna. Börö me Lowalangi zomböi yaʼita, no sinangea moroi ba dödöda woloʼö fanuturu lala si otarai ia.​—Baso Zinunö 19:8, 12; Famaʼeleʼö 4:11.

Goi-goi Zura Niʼamoniʼö yaʼia daʼö, dane-dane wamahaʼö sindruhu. Na Oroisa moguna ba zi sambua inötö. (V Moze 22:8) Moguna taʼangeraigö enaʼö taʼila hezo gamaudu tafalua goi-goinia. (Gamaedola 2:10-12) Duma-dumania, ifahaʼö ita Sura Niʼamoniʼö wa faʼaurida andre moroi khö Lowalangi. Goi-goi moroi ba Zura Niʼamoniʼö andrö zoʼamenesi yaʼita ba nahia wohalöwöda, ba nomo, ba balala wofanö. Na itörö tödöda goi-goi andrö, taʼangelamaisi enaʼö böi teʼala ita.​—Baso Halöwö Zinenge 17:28.

Iʼombakahʼö khöda Yesu dombua goi-goi sabölö moguna. Si oföna, moʼamakhaita ba lua-lua waʼauri niha, yaʼia daʼö enaʼö aboto ba dödöra Lowalangi, laʼomasiʼö ia, ba lö faröi ira weʼamöi enoninia. Goi-goi si oföna andre moguna ta törö tödöda na tahalö ngawalö gangetula. (Gamaedola 3:6)  Dozi samalua goi-goi daʼe, tobali ira sifahuwu khö Lowalangi, ba lasöndra waʼohahau dödö, ba faʼauri si lö aetu.​—Baso Mataiʼo 22:36-38.

Si dua, ituturu khöda lala enaʼö tola fahuwu ita khö nawöda. (I Korindro 13:4-7) Ba wamalua goi-goi si dua andre, tagoʼö duma-duma nibeʼe Lowalangi hadia zi no ifalua ba niha.​—Baso Mataiʼo 7:12; 22:39, 40.

Na mufalua goi-goi Zura Niʼamoniʼö, so wahasara dödö yomo ba nomo börö me faoma laʼomasiʼö nawöra. (Kolose 3:12-14) Terorogö zi sambua omo na laʼoʼö goi-goi tanö böʼö si so ba Zura Niʼamoniʼö. Sura Niʼamoniʼö zangumaʼö wa si no mangowalu tefaböbö ira irugi zi lö aetu.​—Baso I Moze 2:24.

Na mufalua goi-goi Zura Niʼamoniʼö, so khöda waʼohahau dödö ba tebönökhi zoguna khöda bongi maʼökhö. Duma-dumania, omasi niha na so zohalöwö khönia si lö falimo ba owölö-ölö, börö me ifalua goi-goi Zura Niʼamoniʼö. (Gamaedola 10:4, 26; Heberaiʼo 13:18) Taromali Lowalangi zamahaʼö yaʼita enaʼö ahono dödöda ba zi no so khöda, ba muʼofönaiʼö wahuwusa khö Lowalangi moroi ba wangalui anaʼa.​—Baso Mataiʼo 6:24, 25, 33; I Timoteo 6:8-10.

Terorogö mbotoda na tafalua goi-goi Zura Niʼamoniʼö. (Gamaedola 14:30; 22:24, 25) Duma-dumania, na taʼoʼö goroisa Lowalangi sotegu yaʼita enaʼö böi mabu-mabu, tola aefa ita moroi ba wangala ba fökhö solohe ba waʼamate. (Gamaedola 23:20) Itehe khöda Yehowa wamadu tuo asala böi mabu. (Zinunö 104:15; I Korindro 6:10) Moguna khöda goi-goi nibeʼe Lowalangi. Moroi ba daʼö wa tefahaʼö ita ba telumöʼö moroi ba gamuata ba fangera-ngera si lö sökhi. (Zinunö 119:97-100) Wa laʼoʼö goi-goi Zura Niʼamoniʼö ira niha Keriso sindruhu tenga ha enaʼö ohahau dödöra, tobali, lafalua ia enaʼö tefolakhömi Lowalangi.​—Baso Mataiʼo 5:14-16.