FAMAHAʼÖ 7
Hadia Mbanua Lowalangi Andrö?
1. Hadia Mbanua Lowalangi andrö?
Hana wa sökhi na Yesu zi tobali Razo?—MAREKO 1:40-42.
Banua Lowalangi andrö yaʼia daʼö sambua famatörö ba zorugo. Famatörö daʼö zangeheta fefu famatörö tanö böʼö ba iʼaʼasogö gohitö dödönia Lowalangi ba zorugo hegöi ba gulidanö. Tatu manö, omuso dödöda wamondrongo daʼö. Moguna ba niha wamatörö si sökhi, ba zi lö aratö tohare wamatörö Lowalangi. Famatörö daʼö zangosambuaʼö fefu niha ba gulidanö.—Baso Danieli 2:44; Mataiʼo 6:9, 10; 24:14.
Ha samösa razo samatörö. Yesu nifataro Yehowa tobali Razo ba wamatörö ono mbanuania andrö.—Baso Famaʼeleʼö 11:15.
Faigi video Hadia Mbanua Lowalangi Andrö?
2. Hana wa sökhi na Yesu zitobali Razo?
Sökhi na Yesu zi tobali Razo börö me yaʼia sebua faʼahakhö dödö, ba samatörö si ndruhu. (Mataiʼo 11:28-30) Börö daʼö, so khönia waʼabölö ba wanolo niha me ba zorugo iʼotarai wamatörö ulidanö. Me no aefa tesusugi ia, manahae möi ba zorugo mudadao ia ba gambölö Yehowa. (Heberaiʼo 10:12, 13) Aefa daʼö, ibeʼe khönia waʼabölö Lowalangi ba wamatörö.—Baso Danieli 7:13, 14.
3. Haniha zi fao khö Yesu ba wamatörö?
So nifotöi ”niha niʼamoniʼö” fao ira khö Yesu ba wamatörö ba zorugo. (Danieli 7:27) Si oföna tobali niha niʼamoniʼö yaʼia daʼö, ira nifahaʼö Yesu si lö faröi. Irugi iadaʼa, ifili nasa ndra matua ba ira alawe samati Yehowa tobali ira niha niʼamoniʼö. Si mane Yesu, tesusugi ira ba mboto eheha.—Baso Yohane 14:1-3; I Korindro 15:42-44.
Hadauga niha simöi ba zorugo? Ifotöi ira Yesu ”ngawawa si lö atoto”. (Luka 12:32) Faʼatora 144.000 (otu a öfa wulu a öfa ngahönö). Fao ira khö Yesu ba wamatörö ulidanö.—Baso Famaʼeleʼö 14:1.
4. Hadia zalua meʼibörögö wamatörönia Yesu?
Me döfi 1914 * ifasindro wamatörönia Lowalangi ba zorugo. Si föföna nifalua Yesu me no tobali ia Razo yaʼia daʼö, itiboʼö sitou ba gulidanö zatana awö malaʼikania andrö. Mofönu sibai zatana ba iʼaʼasogö gabula dödö ba gulidanö. (Famaʼeleʼö 12:7-10, 12) Iʼotarai daʼö, itugu tedou manö gabula dödö ba niha gulidanö. Fasuwöta, lofo, fökhö, duru danö, daʼö dandra wa löʼaratö alua wamatörö Lowalangi ba gulidanö.—Baso Luka 21:7, 10, 11, 31.
5. Hadia nifalua Wamatörö Lowalangi andrö?
Halöwö fanuriaigö nifalua ba zi sagörö ulidanö, Famatörö Lowalangi zangosambuaʼö niha moroi ba ngawalö soi. Ato niha sangataʼufi Lowalangi tobali ira ono mbanua Yesu. Terorogö ira na inötö tefakiko wamatörö niha gulidanö. Andrö, fefu niha somasi manema howu-howu ba Wamatörö Lowalangi lö tola löʼö lafalua niwaʼö Yesu.—Baso Famaʼeleʼö 7:9, 14, 16, 17.
Sagötö zi 1.000 fakhe, alua gohitö dödö Lowalangi ba wamatörö ulidanö. Tobali faradaiso zi sagörö ulidanö. Afuriatania, ifuli Yesu ba danga namania wamatörö. (I Korindro 15:24-26) Haʼökhö zomasiʼö ödunö-dunö Mbanua Lowalangi andrö?—Baso Zinunö 37:10, 11, 29.
^ par. 6 Enaʼö taʼila zi no izara-zara nifaeleʼö Daromali Lowalangi sanandrösa ba ndröfi 1914, faigi ngaʼörö 215-218 ba mbuku Apa yang Sebenarnya Alkitab Ajarkan? (Lö hadöi ba bahasa Nias)
