No tesura ba mbuku Niʼamoniʼö duria si sökhi wa so waʼauri si lö aetu ba gulidanö. (Zinunö 37:29) Sura Niʼamoniʼö teʼoli moroi ba zi 66 buku. Iʼogunaʼö 40 niha ndra matua Lowalangi ba wanura yaʼia. Sara irugi lima Moze, daʼö mbuku si föföna ni sura Moze, töra 3.500 fakhe ba zilalö. Yohane zanura buku safuria yaʼia zura Wamaʼeleʼö, töra 1.900 fakhe ba zilalö. Bua gera-era haniha nisurara? Iʼodela gehehania Lowalangi ba wahuhuosa khöra. (II Zamueli 23:2) Bua gera-era Lowalangi nisurara, tenga bua gera-erara samösa. Börö zimanö, bua gera-era Yehowa nösi Zura Niʼamoniʼö andre.​—Baso II Timoteo 3:16; II Fetero 1:20, 21.

Faigi video Haniha Bua Gera-eraʼö Daromali Lowalangi Andrö?

Faduhu dödöda wa Sura Niʼamoniʼö siʼotarai Lowalangi börö me fefu nifaʼeleʼönia sanandrösa ba zi so föna, noʼizara-zara wa nutunö ba ahori itörö. Lö niha si tola manutunö khöda simanö. (Yosua 23:14) Ha Lowalangi fondrege zabölö zangila hadia zalua ba zi so föna.​—Baso Yesaya 42:9; 46:10.

Buku siʼotarai khö Lowalangi faböʼö moroi ba mbuku tanö böʼö. Oya Zura Niʼamoniʼö si no lafazökhi moroi ba ngawalö li ba no tefazawili ba zisagörö ulidanö. He no arara me tefazökhi ia, Sura Niʼamoniʼö fagölö ba waʼagatua-tua niha si no lasöndra iadaʼa. Aefa daʼö nisura zi 40 niha andre oi moʼamakhaita. * Ha ba Zura Niʼamoniʼö tesura nifotöi faʼomasi, ha Lowalangi sebua faʼomasi zi tola manutunö yaʼia. Sökhi lala waʼauri niha na lafalua niwaʼö Daromali Lowalangi. Börö me Lowalangi fondrege zabölö ia, lö itehegö na labulöʼö Daromalinia. Daʼö mbörö wa ato niha si faduhu tödö wa Sura Niʼamoniʼö andre Taromali Lowalangi.​—Baso Yesaya 40:8; I Tesalonika 2:13.

Faigi video Hana Faduhu Dödöda Wa Sindruhu Nösi Zura Niʼamoniʼö?

Asese idunö-dunö Sura Niʼamoniʼö waʼibeʼe Lowalangi waʼohahau dödö ba niha ba zi so föna. Sura Niʼamoniʼö zangombakha wa no taya waʼauri si lö aetu ba waradaiso ba götö Gadamo meföna, ba tefangawuli waradaiso si no taya andrö ba zi so föna.​—Baso Famaʼeleʼö 21:4, 5.

Ba Daromali Lowalangi, so goroisa, so goi-goi, so mene-mene. Aefa daʼö idunö-dunö hadia nifalua Lowalangi ba niha. Daʼö zangoromaʼö hewisa gamuata Lowalangi. Andrö, Sura Niʼamoniʼö tola itolo ita enaʼö aboto ba dödöda Lowalangi. Ituturu khöda lala enaʼö tobali ita si fahuwu khö Lowalangi.​—Baso Zinunö 19:8, 12; Yakobo 2:23; 4:8.

Ifahaʼö ita buku andre simane famahaʼö Yesu niha meföna enaʼö aboto ba dödöda nösi Zura Niʼamoniʼö. Itötöi ayati Daromali Lowalangi ba ifoʼeluaha.​—Baso Luka 24:27, 45.

Lö sadöni dödöda baero duria somuso dödö moroi khö Lowalangi. Ba hiza so niha si lö mameʼe ba dödönia, baso göi niha si lö omasi mamondrongo. Böi faogö ndraʼugö khöra. Tola ösöndra waʼauri si lö aetu na so waʼaboto ba dödöu Lowalangi.​—Baso Yohane 17:3.